ITajtol Dios kitemaka kuali tamachtilis
1. ¿Keniuj motokaytis ueyi nechikol tein uejkaua ome tonal itech xiujtekit 2014, uan toni netajtanil monankilis ijkuak?
1 ‘ToUeyi Tamachtijkauj’, Jiova, yejuatsin okachi kuali tamachtijkej (Is. 30:20, 21). Yejuatsin techmachtia ika se amatajkuilol tein amo onkak okse kemej nejon: Biblia, iTajtol tein moijkuiloj ika inepaleuil. ¿Uan keniuj uelis techyolchikauas itamachtilisuan, techpaleuis maj kuali tiyetokan, maj titanemilikan kemej moneki uan maj tikchikauakan tokuali uikalis iuan Dios? Tanankilil motemakas itech ueyi nechikol tein uejkaua ome tonal itech xiujtekit 2014, tein itokay “ITajtol Dios kitemaka kuali tamachtilis”, uan nejin mokixtia itech 2 Timoteo 3:16.
2. ¿Toni netajtanilmej techpaleuiskej maj tikajsikan tanemililmej tein okachi tayekantokej itech ueyi nechikol?
2 Tanemililmej tein okachi tayekantokej. Nejin netajtanilmej techpaleuiskej maj tikajsikan tanemililmej tein okachi tayekantokej itech ueyi nechikol:
• ¿Keniuj techpaleuia itamachtilis Dios itech tonemilis? (Is. 48:17, 18.)
• ¿Toni uelis tikyekmatiskej ke panos komo tikpataj tein moneki itech tonemilis uan ijkon uelis tikchiuaskej tekit tein ika motayekanaltia itekiyo Jiova? (Mal. 3:10.)
• ¿Toni moneki tikchiuaskej keman tikitaskej tamachtilis tein amo mouika iuan iTajtol Dios? (Heb. 13:9.)
• ¿Keniuj uelis titamachtiskej ijkon kemej Jesús? (Mat. 7:28, 29.)
• ¿Keyej akin tamachtiaj itech nechikol moneki achto yejuan kichiuaskej tein tamachtiaj? (Rom. 2:21.)
• ¿Toni ika tapaleuia iTajtol Dios? (2 Tim. 3:16.)
• ¿Toni kinpanos taltikpakneminij keman Dios ‘kintsetselos’ altepemej? (Ageo 2:6, 7.)
• ¿Toni kiyekmati Jiova ke uelis tikchiuaskej? (Efes. 5:1.)
• ¿Keyej moneki timochikauaskej amo tikauaskej itamachtilis Jiova? (Luc. 13:24.)
3. ¿Keyej motelneki maj amo timopolouilikan nion se tanojnots tein motemakas itech ueyi nechikol?
3 Itech 2 Timoteo capítulo 3, achto ke tiajsiskej itech versículo 16 kampa mokixtia itokay ueyi nechikol, moijtoua ke mochiujtoskia tein amo kuali itech itamian tonalmej. Pablo kijkuiloj: “Uan nochi nojon taka ten amo yolkualime, uan nochi nojon takajkayauani, yejuan nojonkes kueyiltijtinemiske ika ne amokuali nintachiualisuan. Uan yejuan nojonkes kisentokaske takajkayautinemiske uan maski yejuan san moyolkajkayautinemiske san” (2 Tim. 3:13). Komo amo tiknekij maj techkajkayauakan, motelneki maj tikakikan uan maj tikchiuakan tein Dios techmachtia. Tamachtilis tein motemakas kitelnamiki tikakiskej itech nejin tonalmej. Yejua ika, maj timochikauakan amo timopolouiliskej nion se tanojnots tein motemakas itech ueyi nechikol.