ITajtol Dios kipia chikaualis
1. ¿Keniuj motokaytis ueyi nechikol tein uejkaua se tonal itech xiujtekit 2014?
1 Nion se taman tein kichijchiuaj taltikpakneminij kipias chikaualis tein kipia Biblia, porin sayoj nejin amatajkuilol uelis kichiuas maj totanemilil uan tein tikchiuaj mouika iuan itanejnekilis Dios. Sayoj ke ¿hasta kani ajsi chikaualis tein kipia iTajtol Dios? ¿Keniuj uelis tiktekitiltiskej nejon chikaualis itech tonemilis? ¿Keniuj uelis okachi kuali tiktekitiltiskej keman tikinpaleuiskej oksekin? Nejin netajtanilmej monankiliskej itech ueyi nechikol tein uejkaua se tonal itech xiujtekit 2014. Ueyi nechikol tein semi techyolchikauas motokaytis “ITajtol Dios kipia chikaualis” uan mokixtia itech Hebreos 4:12.
2. ¿Toni netajtanilmej monankiliskej itech ueyi nechikol?
2 Netajtanilmej tein tayekantokej. Keman tikonkaktos tanojnotsmej, xikonijkuilo itanankililuan netajtanilmej tein nikan moajsij.
• ¿Keyej moneki titakuaujtamatiskej itech iTajtol Jiova? (Sal. 29:4.)
• ¿Keniuj uelis tikitaskej ke techpaleuia itech tonemilis chikaualis tein kipia iTajtol Dios? (Sal. 34:8.)
• ¿Keniuj uelis nochipa tiktekitiltiskej chikaualis tein kipia iTajtol Dios itech tanojnotsalis? (2 Tim. 3:16, 17.)
• ¿Toni uelis techpaleuis maj amo techkajkayaua tein mochiujtok itech taltikpak kampa Satanás taixyekantok? (1 Juan 5:19.)
• Telpoch uan ichpoch, ¿toni namechpaleuis maj kuali kisa tein nankichiuaj itech itekiyo Jiova? (Jer. 17:7.)
• ¿Toni techyolchikauas maski tikmachiliskej ke amo tikpiaj chikaualis? (2 Cor. 12:10.)
• ¿Toni techpaleuis maj tiksentokakan tikpatakan tein moneki itech tonemilis, maski tiknejnekijok tikchiuaskej tein amo mouika ika itanauatiluan Dios oso amo titanemiliaj kemej moneki? (Efes. 4:23.)
3. Maski itech ueyi nechikol tikakiskej tanojnotsmej, ¿toni okseki taman no uelis tikchiuaskej tein techpaleuis?
3 Tikakiskej tanojnotsmej techtelpaleuis. Uan no, itech ueyi nechikol tein uejkaua se tonal, ijkon kemej tein uejkaua ome tonal uan eyi tonal, uelis tikinixmatiskej tokniuan akin pouij itech okseki nechikolmej uan tisenyolpakiskej (Sal. 133:1-3; 2 Cor. 6:11-13). Yejua ika, maj tiktemokan titajtoskej iniuan totasojikniuan uan maj tikinnojnotsakan okseki tokniuan akin no uelis iniuan kuali timouikaskej. Uan komo itech ueyi nechikol kampa tiyaskej kiixtaliaj se tokniuj maj kitemakati tanojnotsmej, kemej se tokniuj takalpanojkej itech distrito oso se akin tekiti itech kali Betel, uelis tiyaskej tiktajpalotiuij yejua uan inamik. Tikpiaj keyej tikchixtoskej ika miak pakilis ueyi nechikol tein uejkaua se tonal.