Amo xionmosenkaua komo tikonnemilia ke amo tionuelis
1. ¿Keyej sekin amo kinekij kitemakaskej se nemachtil ika Biblia?
1 ¿Mitsonkisa ouij tikontemakas se nemachtil ika Biblia porin tikonnemilia ke amo kuali tiontamachtia? Ne uejkauj, seki itekitikauan akin amo kikaujkej Dios, kemej Moisés uan Jeremías, no kimachiliayaj ke amo ueliskiaj kichiuaskej tekit tein kiselijkaj (Éx. 3:10, 11; 4:10; Jer. 1:4-6). Yejua ika no uelis ijkon kemansa timomachiliskej. ¿Toni uelis tikchiuaskej?
2. ¿Keyej moneki maj amo sayoj tiyakan kajkalpan uan tikauaskej maj oksekin kitemakakan nemachtilmej?
2 Yekinika moneki tikelnamikiskej ke Jiova amo keman techtajtania tein amo uelis tikchiuaskej (Sal. 103:14). Nejin kijtosneki ke komo technauatia maj tikinpaleuikan taltikpakneminij maj mochiuakan imomachtijkauan Jesús uan maj tikinmachtikan, yejua porin ueli tikchiuaj (Mat. 28:19, 20). Jiova amo kinmaka nejin tatiochiualis sayoj akin okachi kipiaj tamatilis (1 Cor. 1:26, 27). Yejua ika, maj amo sayoj tiyakan kajkalpan uan tikauaskej maj oksekin kitemakakan nemachtilmej.
3. ¿Keniuj techmachtia Jiova uan ijkon tiktemakaskej nemachtilmej ika Biblia?
3 Jiova techmachtia. Jiova yejuatsin akin techmachtia keniuj tikinpaleuiskej taltikpakneminij maj mochiuakan imomachtijkauan Jesús (2 Cor. 3:5). Ika inechikol, techmachtiani tein yekmelauj tamachtia Biblia uan nejon nion akin tel tamatinij itech nejin taltikpak kiixmatij (1 Cor. 2:7, 8). Itech Biblia no tikitaj miak taman kemej tamachtiaya Jesús, Ueyi Tamachtijkej. Uan itech nechikol nochipa tikseliaj tamachtilismej. No ijkon tikpiaj amaixmej, kemej amaix Tamachtia Biblia, tein kimelaua tamachtilismej tein moajsij itech Biblia kemej moneki uan kemej amo ouij moajsikamatis. Se kitemakas se nemachtil ika Biblia okachi amo ouij ke tein tiknemiliaj.
4. ¿Keyej uelis titakuaujtamatiskej ke Jiova techpaleuis?
4 Ika inepaleuil Jiova, Moisés uan Jeremías uelik kichiujkej tekit tein kiselijkaj (Éx. 4:11, 12; Jer. 1:7, 8). Yejua ika, maj tiktajtanikan Jiova maj no techpaleui. Uelis titakuaujtamatiskej ke ijkon kichiuas, ta keman titamachtiaj ika Biblia titamachtiaj akoni yekmelauj Dios, uan nejin se taman tein yejuatsin kiyolpaktia (1 Juan 3:22). Yejua ika, maj tikixtalikan tikpeualtiskej se nemachtil ika Biblia. Titelyolpakiskej uan tikseliskej miak tatiochiualismej.