Keniuj tiktekitiltiskej amaix ¿Akonimej kichiujtokej itanejnekilis Jiova itech nejin tonalmej?
Yankuik amaix tein tapaleuis maj momachtianij pouikan itech inechikol Dios
1. ¿Keyej mochijchiuak amaix Itanejnekilis Jiova?
1 ¿Peuakya tikontekitiltia yankuik amaix ¿Akonimej kichiujtokej itanejnekilis Jiova itech nejin tonalmej? Nejin mochijchiuak kemej kinpaleuis akin kiselijtokej se nemachtil: 1) maj kinixmatikan itaixpantijkauan Jiova, 2) maj kiixmatikan tein tikchiuaj uan 3) maj kinnextili keniuj mochiua tekit itech tonechikol. Amaix Itanejnekilis Jiova kipia tamachtilismej itech sayoj sejse página tein uelis tikixpanoskej itech makuil oso majtakti minuto satepan ijkuak tiktamiskej sejse nemachtil iuan taltikpaknenkej.
2. Xikonijto keniuj chijchiujtok yankuik amaix.
2 Keniuj chijchiujtok. Amaix exkan xeliujtok, uan sejse taxelol kimelaua se taman tein ika moixmati inechikol Jiova uan kinamiki ika sejse taman tein tikitakej achto. Nochi amaix kipia 28 tamachtilismej, uan sejse ijkuiliujtok kemej netajtanil, uan tajkuilolmej tein okachi tijtiltik ijkuiliujtok yejua tanankililmej. Moajsij taixkopimej tein mokixtijkej itech panoua 50 uejueyi altepemej, nejon kinextia hasta kani ajsi tekit tein tikchiuaj. Miak tamachtilismej kipiaj kampa kijtoua “Okseki taman tein uelis tikonmatis”, tein ika uelis tikonyoleuas akin tikonmachtia maj kichiua kemej ompa kijtoua.
3. ¿Keniuj uelis tiktekitiltiskej amaix Itanejnekilis Jiova iniuan akin tikinmachtiaj?
3 Keniuj uelis tiktekitiltiskej. Keman tionpeuas xikonnextili netajtanil tein moajsi itech itokay tamachtilis. Ompa, ijkuak tikonixtajtoltilijtos tamachtilis, xikonyeknexti tajtolmej tein okachi tijtiltik ijkuiliujtok. Satepan, xikonchiua netajtanilmej tein moajsij tatsintan. Uelis tikonixtajtoltis nochi tamachtilis oso tikonitstiyas sejse taxelol. Xikonixpejpena katiyejua tajkuilol itech Biblia monekis tikonixtajtoltilis. Amo xikonelkaua tikonitas iuan momachtijkej taixkopimej uan kampa kijtoua “Okseki taman tein uelis tikonmatis”. Miakpa monekis tikitaskej tamachtilismej ijkon kemej motojtokaj, sayoj ke kemansa uelis tipanoskej hasta okse tamachtilis tein tikitaskej ke monekis. Kemej neskayot, komo amo uejkaua mochiuas se ueyi nechikol, uelis tipanoskej hasta tamachtilis 11.
4. ¿Keyej tiyolpakij ika nejin yankuik amaix?
4 Keman timomachtiaj ika Biblia iuan aksa, tikpaleuiaj maj kiixmati toTajtsin Dios. Sayoj ke no moneki tikpaleuiskej maj kiixmati inechikol Jiova (Prov. 6:20). ¡Techmaka miak pakilis porin tikpiaj nejin yankuik amaix tein techpaleuis maj amo ouij tikchiuakan nejon!