Keniuj tiktekitiltiskej amaix Kuali tanauatilmej tein Dios kitemaka
Yankuik amaix tein techpaleuis keman oksepa titakalpanoskej oso titamachtiskej ika Biblia
1. ¿Toni yankuik amaix tikselijkej itech ueyi nechikol “Maj tikyekpiakan toyolo” tein techpaleuis keman oksepa titakalpanoskej oso titamachtiskej ika Biblia?
1 Itech ueyi nechikol tein uejkaua eyi tonal “Maj tikyekpiakan toyolo”, ika miak pakilis tikselijkej se yankuik amaix tein techpaleuis keman oksepa titakalpanoskej oso titamachtiskej ika Biblia: amaix Kuali tanauatilmej tein Dios kitemaka. Nejin tamati kemej amaix Toni kichia Dios, tein amo tiktekitiltiskejok, uan nejin yankuik amaix amo no uejueyi tamachtilis kipia. Tapaleuis keman tikinmachtiskej taltikpakneminij itech ininkaltenoj. Amaix Toni kichia Dios tamachtia keniuj moneki monejnemiltis se akin kichiua kemej Cristo, nejon uelis kichiuas maj taltikpakneminij kiouijitakan. Sayoj ke nejin yankuik amaix okachi ika tajtoua kuali tanauatilmej tein moajsij itech Biblia (Hech. 15:35).
2. ¿Keyej mochijchiuak amaix Kuali tanauatilmej?
2 ¿Keyej mochijchiuak? Semanauak taltikpak, tokniuan kinekiaj se amaix tein kinyoltilanaskia taltikpakneminij maj momachtikan Biblia uan maj tapaleui maj kinekikan momachtiskej amaix Tamachtia Biblia, ta yejua semej amaixmej tein okachi ika titamachtiaj. Taltikpakneminij akin amo kinekij momachtiskej ika se libro, kemaj kinekij momachtiskej ika se amaix tein amo semi ika se uejkauas. Uan no, se folleto okachi amo ouij kikepaj itech okachi miak tataman tajtolmej.
3. ¿Keniuj nejin amaix amo tamati kemej okseki amaixmej tein ika titamachtiaj?
3 Keniuj chijchiujtok. Miak amaixmej tein ika titamachtiaj ijkuiliujtokej kemej taltikpakneminij uelis kiixtajtoltiskej uan kiajsikamatiskej, maski amo akin kinpaleuis. Nejin amaix tepitsin taman, porin nochipa moneki maj yeto akin tamachtis. Yejua ika, keman tikauiliskej aksa, okachi kuali maj iuan timomachtikan se oso ome párrafo, ta amo uejueyi uan uelis moitas itech ikaltenoj taltikpaknenkej oso kampa tekiti. Maski kuali yetok maj tipeuakan ika tamachtilis 1, tein melauj uelis tikpeualtiskej nemachtil itech tein yeski tamachtilis tein kipia amaix.
4. ¿Keniuj tapaleuia yankuik amaix maj titamachtikan senkis ika Biblia?
4 Itech miak toamaixuan, uelis tikajsiskej tanankililmej itech párrafos, sayoj ke itech nejin amaix, tanankililmej okachi moajsij itech Biblia porin miakej taltikpakneminij kinekij kimatiskej tein tamachtia Biblia uan amo okse amaix. Yejua ika, textos tein moajsij itech amaix amo moijkuilouaj. Moneki moixtajtoltiskej senkis itech Biblia. Nejin kinpaleuis taltikpakneminij maj kiitakan ke tein momachtijtokej yejua tein Dios tamachtia (Is. 54:13).
5. ¿Keyej moneki maj tanojnotskej kuali momachti achto ke yas tamachtitiuj?
5 Nejin amaix amo no kimelaua nochi tajkuilolmej tein moajsij itech Biblia. ¿Keyej? Nejin chijchiujtok kemej kipaleuis taltikpaknenkej maj kichiua netajtanilmej, uan nejon kipaleuis tokniuj maj okachi kuali tamachti. Yejua ika, moneki kuali timomachtiskej achto ke tikmachtitiuij aksa. Maj nochipa tikelnamikikan se taman: moneki maj amo semi titajtokan. Tinochin techmaka miak pakilis tikmelauaskej tein tamachtia Biblia, sayoj ke okachi titapaleuiskej komo tikiluiaj momachtijkej maj kijto keniuj kiajsikamati se tajkuilol. Ika netajtanilmej tein tiktekitiltiskej ika kuali taixejekolis, uelis tikpaleuiskej maj tanemili itech tein kijtosneki se tajkuilol (Hech. 17:2).
6. ¿Keniuj uelis tiktekitiltiskej nejin yankuik amaix 1) kampa amo kinekij kineltokaskej Dios nion tein kijtoua Biblia? 2) itech tanojnotsalis kajkalpan? 3) keman titajtaniskej ox kinekij kiseliskej se nemachtil ika Biblia? 4) keman oksepa titakalpanoskej?
6 Kemej okseki amaixmej tein ika titamachtiaj, nejin uelis tiktemakaskej keman yeski, maski amo yejua motemakatos itech nejon metsti. Uelis tiktekitiltiskej keman titajtaniskej ox kinekij kiseliskej se nemachtil ika Biblia uan timomachtiskej itech ininkaltenoj taltikpakneminij. Uan no, kemej moijtoj itech ueyi nechikol, nejin amaix “tapaleuia maj yekmelauj tiyolpakikan keman oksepa titakalpanoskej” (xikonita recuadros itech páginas 7 hasta 9).
7. ¿Keniuj uelis tiktekitiltiskej nejin amaix keman titamachtiskej ika Biblia?
7 Keniuj tiktekitiltiskej itech nemachtil. Uelis tikpeualtiskej nemachtil keman tikixtajtoltiskej semej netajtanilmej tein ijkuiliujtok okachi tijtiltik. Ompa, maj tikixtajtoltikan párrafo tein kipia uan tajkuilolmej itech Biblia tein kijtoua maj moixtajtolti. Maj tiktekitiltikan netajtanilmej ika kuali taixejekolis tein ika tikpaleuiskej taltikpaknenkej maj kiajsikamati tein kijtosneki sejse tajkuilol. Ompa, achtopa ke tipanoskej itech okse netajtanil, maj tikiluikan taltikpaknenkej maj kinankili netajtanil tein achto tikitakej, nejon techpaleuis maj tikmatikan ox kuali kiajsikamatik. Keman ayamo uejkaua tikalpanojtoskej, okachi kuali yeski komo sayoj timomachtiaj se netajtanil. Satepan, uelis okachi tiuejkauaskej nemachtil hasta tikitaskej ajsitok se tamachtilis.
8. ¿Toni moneki tikijtoskej keman tikixtajtoltitij Biblia, uan keyej?
8 Tajkuilolmej tein mokixtiaj itech Biblia kampa kijtoua xikonixtajtolti, yejua tein senkis kinankiliaj netajtanil tein ijkuiliujtok okachi tijtiltik. Keman tikixtajtoltiskej tein kijtoua Biblia, maj amo tikijtokan “tatitanil Pablo kijkuiloj” oso “xikonita tein Jeremías achtopa kijtojka”, porin taltikpaknenkej uelis kinemilis ke tikixtajtoltijtokej tein kinemiliayaj seki taltikpakneminij. Okachi kuali maj tikijtokan “iTajtol Dios kijtoua” oso “xikonita tein achtopa moijtojkaya itech Biblia”.
9. ¿Moneki tikixtajtoltiskej itech nemachtil nochi tajkuilolmej tein kisaj itech Biblia?
9 ¿Moneki tikixtajtoltiskej nochi tajkuilolmej oso sayoj tein kijtoua “xikonixtajtolti”? Yeski ijkon kemej monekis. Nochi tajkuilolmej itech Biblia onkak se taman keyej ompa moajsij uan sejse kiualkui tataman tanemilil tein tapaleuia. Sayoj ke kemansa, xa porin taltikpaknenkej amo semi kemanti, amo semi kiyoltilana kiitas se tamachtilis oso amo yektaixmati, sayoj tikixtajtoltiskej tajkuilolmej kampa kijtoua “xikonixtajtolti”.
10. ¿Kemanian uelis timomachtiskejya ika amaix Tamachtia Biblia?
10 Kemanian uelis timomachtiskejya ika amaix Tamachtia Biblia. Satepan ijkuak miakpa timomachtiskej uan kisentokaya nemachtil, uelis timomachtiskejya ika amaix Tamachtia Biblia oso tiksentokaskej ika amaix Kuali tanauatilmej hasta timatamiskej. Tokniuan uelis kuali kiitaskej kemanian kipataskej amaix. Komo ijkon, ¿moneki tikpeualtiskej itech ipeujyan amaix Tamachtia Biblia? Amo onkak se taman tein kinextia maj nochipa ijkon mochiua, porin amo sayoj se taman taltikpaknenkej tikmachtiaj. Maski ijkon, miakej momachtianij okachi kinpaleuia komo oksepa kiitaj se tamachtilis tein ipa achto kiitakajya, sayoj ke axkan ika okachi nejmachkayot ika amaix Tamachtia Biblia.
11. ¿Keyej moneki kuali tiktekitiltiskej nejin yankuik amaix?
11 Itech nejin tonalmej keman amo semi mokaki kuali tanauatilmej, tikpiaj tatiochiualis tikmoyauaskej okachi kuali tanauatilmej tein uelis onkas: iTekiuajyo Dios taixyekantok uan amo uejkaua kichiuas maj onka se yankuik taltikpaknemilis ika melaujkayot (Mat. 24:14; 2 Ped. 3:13). Tikmatij ke akin kikakiskej nejin kuali tanauatil kijtoskej ke melauak nejin tajtolmej: “Semi kualtsin kuak ejkotiuits ya ne tanojnotsani ten kitetapouijtiuits in Tajtoltsin de Dios ten kualkui ne yolseuilis” (Rom. 10:15). Maj tiktekitiltikan nejin yankuik amaix uan maj ika tikinixmatiltikan kuali tanauatilmej taltikpakneminij akin okachi kinekij kimatiskej.
[Recuadro itech página 7]
Kampa taltikpakneminij amo kinekij kineltokaskej Dios nion tein kijtoua Biblia
● Itech seki xolalmej, taltikpakneminij amo kinekij tajtoskej ika Dios oso Biblia. Komo ijkon panoua itech toxolal, itech yekinika takalpanolis uelis titajtoskej sayoj ika seki taman tein panoua ompakauin uan tein kitekipachoua taltikpaknenkej, kemej kani uelis tikajsiskej tein kinpaleuis kalyetouanij, ke moneki maj techixyekanakan kuali tekiuanij, uan toni techpanos satepan. Satepan keman miakpa tikalpanoskej uan iuan tikitaskej keniuj uelis tikmatiskej ke nemi se Dios uan keyej uelis titakuaujtamatiskej itech tein kijtoua Biblia, uelis tiknextiliskej amaix Kuali tanauatilmej.
[Recuadro itech página 8]
Keman tiyaskej kajkalpan
● “Miakej motajtaniaj toni kinemilia kichiuas Dios iniuan taltikpakneminij, uan nikneki nimitsonnextilis ke amo ouij se kimatis nejon. ¿Kemansa tionmotajtaniani ox Dios kijkuanis nochi tein techtajyouiltia? [Xikonkaua maj tanankili.] Nejin amaix kinextia kani itech Biblia uelis tikajsiskej itanankilil nejon netajtanil. [Xikonmaka amaix uan xikonixtajtolti yekinika párrafo itech tamachtilis 1 uan Jeremías 29:11.] Ika nejin, ¿tikonnemilia ke taixejekol maj Dios kineki maj tikpiakan se okachi kuali nemilis satepan? [Xikonkaua maj tanankili.] Komo tikonneki, uelis nimitsonkauilis nejin amaix. Ijkuak oksepa niualas, uelis tikitaskej ojpatika párrafo uan tikmatiskej keniuj Dios kitamis tein techtajyouiltia.” Komo moita ke taltikpaknenkej tepitsin kemanti, uelis iuan tikonitas ojpatika párrafo uan ome tajkuilolmej tein kijtoua maj tikixtajtoltikan. Iuan xionmotenkaua kemanian tionmokepas uan tikonitas ojpatika netajtanil.
● “Miakej taltikpakneminij kichiuaj netataujtilmej, uan okachiok keman kipiaj kuejmolmej. ¿Tejuatsin kemansa tikonchiua netataujtilmej? [Xikonkaua maj tanankili.] ¿Tikonnemilia ke Dios kinkaki nochin taltikpakneminij keman kichiuaj netataujtil, oso xa sekin amo kinkaki? [Xikonkaua maj tanankili.] Nikualkui se amaix tein kinextia kani uelis tikajsiskej itech Biblia itanankililuan nejon netajtanilmej. [Xikonmaka amaix uan iuan xikonita yekinika párrafo itech tamachtilis 12 uan tajkuilolmej tein kijtoua “xikonixtajtolti”.] ¿Melauj ke semi kualtsin tikmatiskej ke Dios kineki techkakis? Sayoj ke tikseliskej tatiochiualismej komo kuali tikixmatij. [Xikontapo itech tamachtilis 2 uan xikonnexti netajtanilmej.] Komo tikonneki, uelis nimitsonkauilis nejin amaix, uan okse tonal uelis tikitaskej keniuj Biblia kinankilia nejin netajtanilmej.”
● “Tikinkalpanojtokej taltikpakneminij porin tikmatij ke miakej kintekipachoua tein uelis techpanos satepan. ¿Tikonnemilia ke se tonal moyektalis tein axkan tikpanotokej? [Xikonkaua maj tanankili.] Miakej taltikpakneminij kimoujkaitaj keman kiitaj ke Biblia kijtoua seki taman tein kuali tein mochiuas amo uejkaua. Nikan moajsij seki netajtanilmej tein monankiliaj itech Biblia.” Xikonmaka amaix uan xikonilui maj kiixpejpena se netajtanil tein okachi kiuelitas tein moajsi itech itamiampa amaix. Ompa, xikontapo itech tamachtilis tein kiixpejpenas uan xikonnextili keniuj mochiua nemachtil. Xionmotenkaua iuan kemanian nankisentokaskej nankiitaskej okse netajtanil.
[Recuadro itech página 9]
Xikonyejyeko tiontajtanis ox kiuelitaskiaj kiseliskej se nemachtil ika Biblia
● “Nimintsonkalpanoua uan nikneki nimitsontapouis ke moajsi se yankuik taman kemej uelis se momachtis Biblia. Nejin amaix kipia 15 tamachtilismej uan kinextia kani uelis tikonajsis itech moBiblia itanankililuan nejin netajtanilmej tein motelnekij. [Xikonnextili ipeujyan uan itamiampa amaix.] ¿Kemansa tikonyejyekouani tikonajsikamatis tein kijtoua Biblia? [Xikonkaua maj tanankili.] Nikneki nimitsonnextilis ke nejin tamachtilismej amo ouij ika se momachtis. [Xikonita tamachtilis 3 uan iuan xikonita yekinika párrafo tein moajsi itech expatika netajtanil, uan xikonixtajtolti Apocalipsis 21:4, 5. Komo tikonita ke ueli, xikonita okse párrafo uan tajkuilolmej tein kijtoua maj se kiixtajtolti.] Komo tikonneki, uelis nimitsonkauilis nejin amaix. Uelis timomachtiskej maski sayoj sepa. Komo tikonneki uelis tikonsentokas tionmomachtis. Keman oksepa niualas, uelis timomachtiskej yekinika tamachtilis, uan kemej tikonita, sayoj se página.”
[Recuadro itech página 9]
Xikonnexti ijkuak oksepa tiontakalpanos
● “Nechmaka pakilis oksepa nimitsonitas. Nimitsonualkuilia se amaix kampa kipia tanankililmej tein moajsij itech Biblia ika miak netajtanilmej tein motelnekij. [Xikonmaka amaix uan xikonilui maj kiita itech itamiampa.] ¿Katiyejua tamachtilis okachi tikonuelita? [Xikonkaua maj tanankili, uan ompa xikontapo itech tamachtilis tein kiixpejpenas.] Nikneki nimitsonnextilis keniuj uelis tikontekitiltis nejin amaix uan tikonajsis itech Biblia itanankilil nejon netajtanil.” Xikonnextili keniuj mochiua nemachtil. Xikonita se oso ome párrafo uan tajkuilolmej tein kijtoua maj se kiixtajtolti. Kemej tikitaj, ¡amo ouij se kipeualtis se nemachtil ika Biblia! Xikonkauili amaix uan xionmotenkaua iuan kemanian oksepa tikonkalpanos. Keman nankitamiitaskej se tamachtilis, uelis nankiitaskej okse tein taltikpaknenkej kiixpejpenas, oso no uelis tionpeuas itech yekinika tamachtilis.