Se tekit tein kiualkui tein kuali
Eyi semana achto ke tikpiaskej ueyi nechikol tein uejkaua eyi tonal, mochiuas okse tekit tein ika tikinyoleuaskej taltikpakneminij kampa titanojnotsaj maj yakan, uan tikpiaj keyej moneki titapaleuiskej itech nejin tekit. Akin kiselianij se tayoleualis itech xiujmej tein tiualpanouanij kiteluelitanij tanojnotsmej, keniuj mochiua nochi tataman tekimej uan keniuj tinochin timoyekuikaj uan kuali timonejnemiltiaj (Sal. 110:3; 133:1; Is. 65:13, 14). Miakkan, akin youij ueyi nechikol moneki tel uejkaua ojtokaskej. Sayoj ke, ¿no ijkon panoua ompa?
Satepan keman mochiuak ueyi nechikol tein uejkaua eyi tonal xiuit 2011, itech se kali Betel kiselijkej se amat tein kijkuiloj se siuat akin kincholuiaya itaixpantijkauan Jiova keman yaya kikalpanotij, sayoj ke kiajsika se tayoleualis itech ikaltenoj. Amat kijtouaya: “Nikpia se kualtsin kali uan se tel kuali notakauj, uan niknemiliaya ke nikpiaya nochi tein kichiua maj se yolpaki. Sayoj ke amo ijkon katka, amo niyolpakia. Nejon kichiuak maj niknekini niyas ueyi nechikol se sábado maski monekia nitanejnemiltis 320 kilómetros”. Kiteluelitak ueyi nechikol uan hasta kinotsak inamik uan kiiluij ke amo ajsiskia nejon youak, porin no kinekia yas mostika domingo. Yejua kijtoua: “Nikakik nochi tanojnotsmej uan nikinixmatik miakej itaixpantijkauan Jiova. Amo niknekia maj tatami”. Keman mokepak, peuak momachtia Biblia uan naui metsti satepan mochiuak tanojnotskej akin ayamo moauia. Satepan kijtoj: “¡Tel kuali porin nikajsik nejon tayoleualis itech nokaltenoj! Axkan kemaj yekmelauj niyolpaki”.
Sekin akin kiseliskej tayoleualis yaskej ueyi nechikol. Yejua ika, maj titapaleuikan ika miak yolpakilis itech nejin tekit tein motelneki. Xikonuika itech ueyi nechikol tayoleualismej tein mokauaskej uan xikonmoyaua itech xolal kampa mochiuas.
[Recuadro itech página 5]
¿Keniuj tiktemakaskej tayoleualis?
Kemej tiknekij tikmoyauaskej tayoleualis itech nochi xolalmej kampa titanojnotsaj, monekis maj amo tiuejkauakan. Uelis tikijtoskej satepan ke titetajpaloskej: “Tikchiujtokej maj noyampa taltikpak momoyaua nejin tayoleualis. Nimitsonkauilia se. Nikan tikonajsis toni ika tajtoua, kemanian uan kani mochiuas”. Maj moita toyolpakilis. Keman tikxelojtoskej tayoleualis itamiampa semana, no uelis tiktemakaskej revistas komo tikitaj ke ueli.