Se tayoleualis tein motelneki
1. ¿Kemanian peuas tikinyoleuaskej oksekin maj yakan itech tataman uejueyi nechikolmej itech nejin xiuit 2014?
1 Komo tikinchijchiuiliskiaj se tapalol totasojikniuan oso tochankauan tein semi uelik, ouij uan patiyoj, tikinyoleuaskiaj ika miak pakilis. No ijkon, monekik miak tekit mochiuas ika tamachtilis tein techmaka Jiova tein motemakas itech ueyi nechikol tein uejkaua eyi tonal, uan kampa mosentiliaj akin kayomej itech okseki uejueyi altepemej nejin xiuit 2014. Eyi semana achto ke tikpiaskej toueyinechikol, tikpiaskej tatiochiualis tikinyoleuaskej oksekin maj no yakan. ¿Toni techpaleuis maj tikinyoleuakan ika miak pakilis?
2. ¿Toni techolinis maj senkis tikmoyauakan tayoleualis?
2 Tein techpaleuis maj titayoleuakan ika miak pakilis yejua komo kuali tiknemiliaj keniuj techpaleuia tisejsemej tamachtilis tein Jiova temaka itech uejueyi nechikolmej (Is. 65:13, 14). No moneki tikelnamikiskej ke nejin tayoleualis kiualkui tein kuali xijxiujtika. Sekin akin tikinyoleuaskej touan mosentiliskej itech ueyi nechikol. Yaskej miakej oso amo, tekit tein tikchiujkej ika nochi toyolo kiueyichiuas Jiova uan kinextis ke yejuatsin kualtakat (Sal. 145:3, 7; Apoc. 22:17).
3. ¿Keniuj tikmoyauaskej tayoleualis?
3 Tayekananij itech sejse nechikol monekis kiixtaliskej keniuj uelis okachi momoyauas tayoleualis, uan ox uelis kikauaskej itech kalmej kampa amo akin yetos oso kitemakaskej itech tanojnotsalis senteixtenoj. Itamian semana tiktemakaskej revistas iuan tayoleualis komo tikitaj ke ueli. Komo yekinika sábado tein kipia metsti uetsi itech tonalmej keman titayoleujtoskej, moneki okachi tiktayekanaltiskej tikmoyauaskej tayoleualis uan amo tikpeualtiskej nemachtilmej ika Biblia. Satepan ke tamis nejon tekit, tiyolpakiskej porin ika nochi toyolo tikinyoleujkej miakej taltikpakneminij maj touan kiselikan tamachtilis tein techmakak Jiova.