Maj senkis titayoleuakan

1. ¿Kemanian peuas tikinyoleuaskej oksekin maj yakan itech ueyi nechikol tein uejkaua eyi tonal?

¹ Komo tikinchijchiuiliskiaj totasojikniuan oso tochankauan se tapalol tein semi uelik, ouij uan patiyoj, tikinyoleuaskiaj ika miak pakilis. No ijkon, monekik miak tekit mochiuas ika tamachtilis tein techmaka Jiova tein motemakas itech ueyi nechikol tein uejkaua eyi tonal. Eyi semana achto ke tikpiaskej toueyinechikol, Jiova techmaka tatiochiualis tikinyoleuaskej oksekin maj no yakan. ¿Toni techpaleuis maj tikinyoleuakan ika miak pakilis?

2. ¿Toni techolinis maj senkis tikmoyauakan tayoleualis?

² Tein techpaleuis maj titayoleuakan ika miak pakilis yejua komo kuali tiknemiliaj keniuj techtelpaleuia tisejsemej tamachtilis tein Jiova temaka itech uejueyi nechikolmej (Is. 65:13, 14). No moneki tikelnamikiskej ke nejin tayoleualis kiualkui tein kuali (xikonita recuadro “Semi tapaleuia”). Xa sekin akin tikinyoleuaskej yaskej ueyi nechikol, sayoj ke oksekin amo. Yaskej miakej oso amo, tekit tein tikchiujkej ika nochi toyolo kiueyichiuas Jiova uan kinextis ke yejuatsin kualtakat (Sal. 145:3, 7; Apoc. 22:17).

3. ¿Keniuj tikmoyauaskej tayoleualis?

³ Tayekananij itech sejse nechikol monekis kiixtaliskej keniuj okachi momoyauas tayoleualis, uan ox kikauaskej itech kalmej kampa amo akin yetos oso motemakaskej itech tanojnotsalis senteixtenoj itech xolalmej kampa ixyetok tanojnotsas nechikol. Itamian semana tiktemakaskej revistas iuan tayoleualis komo tikitaj ke ueli. Satepan ke tamis nejon tekit, tiyolpakiskej porin ika nochi toyolo tikinyoleujkej miakej taltikpakneminij maj touan kiselikan tamachtilis tein techmaka Jiova.

Semi tapaleuia

Seki xiujmej achto, se tokniuj siuat akin kimoyaujtoya amat tein ika tikinyoleuaj taltikpakneminij maj touan mosentilikan itech ueyi nechikol tein uejkaua eyi tonal, amo semi kineltokaya maj tapaleui nochi tein kichiujtoya. Motajtaniaya: “¿Yaskej taltikpakneminij ueyi nechikol porin tikinmakaj tayoleualis?”. Tonal sábado kualkan, itech ueyi nechikol, kiitak se takat akin pouia itech taneltokalis sij. Kemej ompakauin motalij, tokniuj siuat kiluij itokay. Nejon takat yajka ueyi nechikol porin kiselij se tayoleualis. Kipiaya miak netajtanilmej tein tokniuj siuat kinankilij ika miak pakilis. Takat kiluij tokniuj ke semi kiuelitstoya ueyi nechikol uan ke kimoujkaitak keniuj takentiayaj uan kemej monejnemiltiayaj akin ompa moajsiaj. Nejon tonal, tokniuj siuat peuak tajtoua iniuan se siuat uan se takat akin namikuanij akin moajsiaj inakastan. Yejuan no kiselijkaj tayoleualis uan yajkaj hasta ompa itech autobús. Kiteluelitakej tamachtilis uan kiixtalijkej oksepa yaskej tonal domingo. Ompa, tokniuj siuat kiajsikamatik ke semi moneki maj tikchiuakan nejin tekit.
Yankuixtok, itech se ueyi nechikol tein uejkaua eyi tonal se takat uan se siuat akin namikuanij uan kichiuaj tekit kemej precursor regular kiniluijkej inintokay se takat uan se siuat akin namikuanij akin okachi xiuejkejya ke yejuan. Takat uan siuat kiniluijkej tokniuan ke amo keman yajtoya itech se ueyi nechikol kemej nejon. Tokniuan kintajtanijkej: “¿Akoni namechyoleuak?”, yejuan tanankilijkej: “Se tonal, keman tiajsikej tochan, tikitakej ke aksa techkauilij tayoleualis itampa puerta”. Kiixtajtoltijkej uan tajkuilojkej itech cupón tein kiualkui tayoleualis. Itech ueyi nechikol, seki tokniuan kinyoleujkej maj iniuan takuakan. Namikuanij semi kinpaktij tamachtilis yejua ika kiixtalijkej yaskej mostika. Motenkaujkej iniuan kemanian kinkalpanoskiaj uan ijkon kinpaleuiskiaj maj kinekikan kimatiskej okachi tein tamachtia Biblia.