Keniuj tikuiskej amaix Tamachtia Biblia tein chijchiujtok ika tajtol tein amo ouij

Amaix What Can the Bible Teach Us? tamati kemej amaix Tamachtia Biblia. Nejin ome amaixmej moajsiskej itech miak tataman tajtolmej. Yankuik amaix no kimelaua tamachtilismej uan capítulos tekpantokej ijkon kemej itech amaix ¿Toni yekmelauj Tamachtia Biblia? Sayoj ke nejin yankuik amaix, tein ika kitemoua tetanemililtis uan tajtolmej tein kikui okachi amo ouijkej. Mochijchiuak kemej kinpaleuis akin kinouijmaka kiajsikamatiskej amaix Tamachtia Biblia. Itamian nejin amaix, amo moajsiok se tamajsikayot, ta notas tein amo ouij kimelauaj tein kijtosnekij seki tajtolmej uan tanemililmej tein kipia amaix. Capítulos amo kipiaj netajtanilmej tein ika peuaj nion recuadro tein ika tami. Ta, itamian sejse capítulo kipia tanemililmej tein tayekantokej tein kimelaua tamachtilismej tein moita itech párrafos. Ijkon kemej amaix Tamachtia Biblia, nejin yankuik amaix uelis motemakas keman yeski, maski motemakatos okse amaix itech metsti. ¿Keniuj uelis tiktekitiltiskej tein kipia nejin yankuik amaix keman titamachtiskej ika Biblia?

TANEMILILMEJ TEIN TAYEKANTOKEJ. Uelis tiksentokaskej titamachtiskej kemej ipa tikchiuaj ika amaix Tamachtia Biblia, tikixtajtoltiskej párrafos uan tikchiuaskej netajtanilmej. Sayoj ke, ¿komo taltikpaknenkej amo semi kiajsikamati tajtol tein ika tikmachtijtokej oso amo semi ueli taixtajtoltia? Komo ijkon, tanojnotskej uelis kikuis amaix Tamachtia Biblia tein chijchiujtok ika tajtol tein amo ouij. Keman kimachtis taltikpaknenkej uelis kikuis tanemililmej tein tayekantokej tein kipia itamian sejse capítulo tein kimelaua tamachtilismej uan xa kiluis maj iselti kiixtajtolti capítulo. Miakpa, se tamachtilis tein kipia Biblia ueli momelaua kemej itech quince minutos. Tanemililmej tein tayekantokej amo kimelauaj miak taman ijkon kemej capítulos. Nejin kijtosneki ke tanojnotskej moneki achto kuali momachtis uan kiitas keniuj uelis kipaleuis momachtijkej. Uan komo momachtiaj seki párrafos, tanojnotskej uelis kikuis tanemililmej tein tayekantokej uan ika kielnamikiskej tein momachtijkej.

NOTAS TEIN KIMELAUAJ TAMACHTILIS. Tajtolmej uan tanemililmej tein kipia nejin notas moajsij ijkon kemej ixnesij itech sejse capítulo. Tanojnotskej kiixejekos ox kiitaskej nejin notas keman momachtijtoskej amaix.