Ijkon kemej se tanamakakej kiluia itajkuilojkauj maj kijkuilo tein kinemilia, Dios kiniluij takamej akin amo kikaujkej maj kijkuilokan iTajtol tein chipauak.
¿Keniuj toTachijchiujkauj techmatiltia tein kichiuas satepan?
Ne uejkauj, toTachijchiujkauj kiniluiaya ángeles maj kitematiltikan tein yejuatsin kinekia kinmatiltis akin nemiaj itech nejon tonalmej. No kinkuia seki takamej uan siuamej maj kitematiltikan seki taman. Uan no, kiixtalij maj moijkuiloj tein kineki maj tikmatikan uan tein kichiuas. Dios techiluia ke satepan tiyolpakiskej. Sayoj ke, xa timotajtaniskej: “¿Kani kijtoua tein Dios kichiuas?”.
Tein Dios kineki maj tikmatikan yetok itech Biblia (2 Timoteo 3:16). ¿Keniuj takamej uelik kijkuilojkej tein Dios kinekia maj tikmatikan? Dios kintalilij itech inintanemililuan tein yejuatsin kinekia maj kijkuilokan (2 Pedro 1:21). Nejin uelis tiknextiskej ijkon kemej se tanamakakej, keman kineki kitematiltis teisa kiluia itajkuilojkauj maj tajkuilo. Yejua ika, amo uelis tiknemiliskej ke akin tajkuiloj yejua itanemililuan. No ijkon, maski tajkuilojkej takamej, Dios itanemililuan tein ijkuiliujtok itech Biblia.
ITAJTOL DIOS NOCHIN UELIS TIKPIASKEJ
Tein Dios kineki techmatiltis semi moneki, yejua ika yejuatsin kineki maj nochin kiixtajtoltikan uan maj kiajsikamatikan. Axkan, “nochi paísme uan intsalan nochi tataman tagayot uan intsalan nochi tataman pueblojuani uan [...] ten tajtoaj ika tataman tajtolis” kikakij “ne Tajtoltsin de Dios ten [...] amo keman ixpoliuis” (Apocalipsis 14:6). Ika itatiochiualis Dios, iTajtol nochi motajtolkepani oso sayoj tajko itech panoua eyi mil tataman tajtolmej. Amo motajtolkepani okse amatajkuilol ijkon kemej Biblia.