¿Toni uelis techpaleuis maj tikchiakan kuali tinemiskej?

Kemej tikitakejya, miakej kitemouaj okachi kuali nemiskej keman takuaujtamatij itech nemachtil, tomin oso kinemiliaj ke moneki maj yolkualmej uan ke ixyetokya tein kinpanos. Sayoj ke, tikchiuaskej nejin kemej yeskia tiknekiskej tiajsiskej kansaika uan tikuij se mapa tein amo kuali yetok. Nejin amo kijtosneki ke amo tikpiaj tein uelis techpaleuis maj tikchiakan kuali tinemiskej.

TEIN KUALI TECHIXYEKANAS UAN TAKUAUJTAMACH

Keman moneki tikixpejpenaskej teisa, miakpa tiktajtaniaj aksa akin okachi kimati ke tejuan oso akin techyekana. Yejua ika, komo tiknekij kuali tinemiskej moneki iuan titakuaujtamatiskej akin okachi kimati ke tejuan uan okachi tamatkej. Uelis tikleroskej tein techyolmajxitia itech se amatajkuilol tein monotsa Biblia, tein peuak moijkuiloua kemej 3,500 xiujmejya.

¿Keyej uelis tiontakuaujtamatis itech Biblia? Porin akin kichiuak maj moijkuilo yejua akin okachi tamatkej. Yejuatsin “Akin xiuejya itech Tonalmej”, akin nemini “itech tonalmej tein amo kipia ipeujyan uan hasta itech tonalmej tein amo kipia itamian” (Daniel 7:9; Salmo 90:2). Yejuatsin “akin kichijchiuak iluikak, Dios akin melauak, akin Kichijchiuak taltikpak” (Isaías 45:18). Yejuatsin techiluia katiyejua itokay: Jiova (Salmo 83:18).

Kemej Biblia ualeua imako Akin techchijchiuak, amo tamachtia ke kemej nemij sekin uan kemej ixtamatij okachi kuali ke oksekin. Tein tayolmajxitia nochipa tapaleuiani uan kinpaleuiani akin seseko kayomej. Se amatajkuilol tein okachi motajtolkepani uan tein okachi momoyauani itech nochi taltikpak.a Yejua ika akin yeski uelis kimatis tein kijtoua uan ika uelis moixyekanas. Biblia kijtoua:

“Dios amo kinchichikojtasojta in tagayot. Ta, Yejuatsin kiniknelia [...] tech nochi in senmanauak komo yejuan kimouistiliaj [...] uan chipaukanentinemij” (HECHOS 10:34, 35).

Ijkon kemej se tepopaj akin kintasojta ikoneuan uan kinpaleuia, Jiova toTajtsin akin techtasojta uan techpaleuia ika iTajtol, Biblia (2 Timoteo 3:16). Tejuatsin uelis tiontakuaujtamatis itech iTajtol Dios, kemej yejuatsin techchijchiuak kimati keniuj okachi kuali tietoskej.

UELIS TITAKUAUJTAMATISKEJ ITECH BIBLIA

Uelis tikneltokaskej ke Biblia ueli techixyekana, porin panokya kemej 2,000 xiujmej keman moijtoj seki taman tein panoskia uan keniuj miakej yeskiaj itech nejin tonalmej.

TEIN PANOUA

“Moteuis se altepet iuan okse uan se tekiuajyot iuan okse tekiuajyot. Mochiuas uejueyi talolinilis uan kampa yeski onkas mayan uan uejueyi kokolismej” (LUCAS 21:10, 11, TNM).

TEIN MIAKEJ KICHIUAJ

“Itech itamian tonalmej yeskij tonalmej ouijkej tein teouijmakas se kiixnamikis. Porin takamej sayoj yejuan motasojtaskej, kitasojtaskej tomin, moueyinekiskej, moueyichiuaskej, tauijuikaltiskej, amo kintakamatiskej inintatuan, amo motasojkamatiskej, tekauaskej, amo teikneliskej, amo kiseliskej tein moixtalia, tetakajkayauiliskej, amo motsakuiliskej, tetajyouiltiskej, amo kitasojtaskej tein kuali, tenekepiliskej, amo takakiskej, senkis moueyinekiskej, moyolpaktiskej yejuan uan amo kiyolpaktiskej Dios” (2 TIMOTEO 3:1-4, TNM).

Keman tikonita tein Biblia achto kijtojka uan keniuj mochiujtok tein uejkaujya moijkuiloj, ¿toni tikonnemilia tejuatsin? Xa no tiontanemilia kemej Leung, se takat akin kayot Hong Kong. Yejua kijtoj: “Tein moijtoj itech Biblia ke mochiuaskia uejkaujya moijkuiloj, uan se takat amo ueliskia kijtos nochi tein mochiuaskia. Yejua ika, Biblia moneki maj iaxka aksa akin okachi tamatkej ke tejuan”.

Itech Biblia tikajsij miak taman tein moijtojka ke mochiuaskia uan mochiuakya.b Nejin kinextia ke iTajtol Dios. Jiova kijtoua: “Nejua niDios, uan amo moajsi okse kemej nejua. Keman peua teisa, nikijtoua keniuj tamis” (Isaías 46:9, 10). Yejua ika, uelis titakuaujtamatiskej itech tein Biblia kijtoua ke mochiuas.

TEIN KUALI MITSONIXYEKANAS AXKAN UAN NOCHIPAYA

Keman tikonchiua tein Biblia tayolmajxitia mitsonpaleuia. Ika xiontanemili nejin.

TOMIN UAN TEKIT

“Okachi kuali maj se moseui ke chikauak se motekitiltis uan se kitojtokas ejekat” (ECLESIASTÉS 4:6).

TOCHANKAUAN

“Cada se teyokich moneki kitasojtas isiuau ijkon keme [...] mopialitinemi yejua [...] tetasojtalis. Ika ya nojon cada se tesiuau moneki ma momouiskauika iuan iyokich” (EFESIOS 5:33).

KEMEJ TIMOUIKAJ INIUAN OKSEKIN

“Ximoijkuanili kualanyot uan xikaua yolkualanyot; amo xikualani uan amo xikchiua tein amo kuali” (SALMO 37:8).

Komo tikonchiua tein Biblia tayolmajxitia, mitsonpaleuis axkan uan mitsonpaleuis xikonchia okachi kuali tionnemis. Biblia techiluia keniuj tinemiskej kemej Dios motenkaua.

YOLSEUILIS UAN AMO MOUJKANEMISKEJ

“Yolpakiskej porin kipiaskej ueyi yolseuilis” (SALMO 37:11).

NOCHIN KIPIASKEJ TEIN KIKUASKEJ UAN KANI NEMISKEJ

“Kinchijchiuaskej kalmej uan ompa nemiskej; kitokaskej uvajmekat uan kikuaskej itakilo” (ISAÍAS 65:21).

AMO AKIN KOKOLISPEUAS NION MOMIKILIS

“Amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok” (APOCALIPSIS 21:4).

¿Toni moneki tikonchiuas para tikonselis nejin? Tikonitas itech okse tamachtilis.

a Komo tikonneki tikonmatis okachi keniuj momoyaua uan motajtolkepa Biblia, xikonita www.jw.org/ncj. Xikonpatskili TEIN BIBLIA TAMACHTIA > BIBLIA UAN TEIN MOCHIUJTIUALAJ.

b Komo tikonneki okachi tikonmatis xikonita amatajkuilol La Biblia... ¿la Palabra de Dios, o palabra del hombre?, itech capítulo 9 tein kichijchiujkej itaixpantijkauan Jiova. Tikonajsis itech www.jw.org. Xikonpatskili itech BIBLIOTECA > OTRAS PUBLICACIONES.