Biblia uelis kuali techixyekanas

Komo tikixtaliaj tein kuali yetok sayoj ika tein tiknemiliaj oso ika tein oksekin kinemiliaj, amo uelis tikmatiskej ox tein tikixtaliskej tikchiuaskej yekmelauj techpaleuis. Biblia techiluia keyej panoua nejon, uan no techpaleuia maj tikmatikan toni kuali yetok uan toni amo uan ijkon maj tiyolpakikan.

MONEKI MAJ DIOS TECHIXYEKANA

Jehováa Dios techiluia itech Biblia ke moneki techpaleuis, porin amo techchijchiuak kemej toselti uelis timoixyekanaskej (Jeremías 10:23). Yejua ika itech Biblia techiluia tein techpaleuis maj kuali tikixtalikan tein tikchiuaskej. Dios semi techtasojta uan amo kineki maj timopolokan keman tikixtaliskej tikchiuaskej teisa porin nejon kichiua maj titajyouikan uan maj amo tiyolpakikan (Deuteronomio 5:29; 1 Juan 4:8). Yejuatsin techchijchiuak, semi tamatkej uan kuali techixmati, yejua ika tein techyolmajxitia yekmelauj uelis techpaleuis (Salmo 100:3; 104:24). Sayoj ke Dios amo techchikaujkauia para maj tikchiuakan tein tanauatia.

Jehová kinmakak Adán uan Eva, yekinika takat uan yekinika siuat, nochi tein monekia para maj yolpakikan (Génesis 1:28, 29; 2:8, 15). No kinnauatij seki taman tein amo ouij tein monekia kitakamatiskej. Sayoj ke kinkauak maj yejuan kiixpejpenanij ox kitakamatiskiaj oso amo (Génesis 2:9, 16, 17). Sayoj ke Adán uan Eva kiixtalijkej amo kitakamatiskej Jehová uan kichiujkej tein yejuan kinekkej (Génesis 3:6). ¿Uan toni panouani porin tejuan tikixtalianij tikchiuaskej tein tiknemiliaj ke kuali yetok? ¿Nochi kuali kisani? Amo. Ijkon kemej panouanij xiujmej tikitanij ke se kitapanauilis itanauatiluan Dios amo kichiuani maj tiyolseujkanemikan nion maj tiyolpakikan (Eclesiastés 8:9).

Maski seseko tikayomej, Biblia kuali techyolmajxitia para maj tikixtalikan tikchiuaskej tein kuali yetok (2 Timoteo 3:16, 17; xikonita recuadro “Se amatajkuilol tein nochin uelis kinpaleuis”). Maj tikitakan keniuj Dios techixyekana ika tein kijtoua Biblia.

Xikonita keyej uelis tikneltokaskej ke Biblia yejua iTajtol Dios (1 Tesalonicenses 2:13). Itech jw.org xikonita video ¿Akoni itanemililuan tein ijkuiliujtok itech Biblia?

KEYEJ SEKIN AMO KINELTOKAJ KE BIBLIA UELIS KINPALEUIS

Sekin kijtouaj ke Biblia amo yekmelauj uelis kuali techixyekanas. Yejuan ueliskia kijtoskej nejin:

Tein ueliskia kijtoskej: “Tein kijtoua Biblia moixnamiki”.

Tein melauak: Ueliskia moitas ke seki taman tein kijtoua Biblia amo mouika ika okseki taman tein ompa no kijtoua. Sayoj ke komo tikitaj kemanian uan toni panotoya keman moijkuiloj, tikonitas ke tein ompa kijtoua amo moixnamiki.

Komo tikonneki tikonitas seki taman tein kinextia nejon, xikontemo tamachtilis “¿Se contradice la Biblia?” itech jw.org.

Tein ueliskia kijtoskej: “Akin kineltokaj tein kijtoua Biblia no kichiuaj tein amo kuali, yejua ika tein tayolmajxitia amo semi tapaleuia”.

Tein melauak: Sekin kichiuaj tein amo kuali porin amo kitakamatij tein Biblia tayolmajxitia. Itech Biblia moijtojka ke miakej, hasta akin taixyekanaj itech taneltokalismej, amo kichiuaskiaj tein tamachtiskiaj. No kijtoj ke kemej ijkon kichiuaskiaj, oksekin eliuis kijijtoskiaj tein Biblia tamachtia (2 Pedro 2:1, 2).

Komo tikonneki tikonitas keniuj miakej akin taixyekanaj itech taneltokalismej amo kichiuanij tein Biblia tamachtia, xikontemo tamachtilis “La religión, ¿un gran negocio?” itech jw.org.

Tein ueliskia kijtoskej: “Akin momachtiaj Biblia kinchikoitaj oksekin”.

Tein melauak: Biblia tamachtia ke moneki maj nochin tikinpoujkaitakan. Tamachtia ke nejin moneki tikchiuaskej:

Maj tiknemilikan ke oksekin okachi tayekantokej ke tejuan (Filipenses 2:3).
Maj tikinpoujkaitakan akin tataman tein kineltokaj uan kichiuaj (1 Pedro 2:17).
Maj amo tikinchikaujkauikan oksekin para maj tanemilikan kemej tejuan (Mateo 10:14).

Biblia tamachtia ke Dios yolkuali touan uan nochipa kichiua tein kuali yetok, uan kineki maj tejuan no ijkon tikchiuakan (Romanos 9:14).

Komo tikonneki tikonmatis okachi, xikontemo tamachtilis “¿Techiluia Biblia maj titetakachiuakan?” itech jw.org.

DIOS TECHIXYEKANA IKA TEIN KIJTOUA BIBLIA

Itech Biblia tikitaj keniuj Dios mouikani iniuan akin neminij itech taltikpak. Keman timomachtiaj Biblia tikmatij toni kijtoua Dios ke kuali yetok uan toni amo, oso tein yejuatsin kiita ke techpaleuis oso techijtakos (Salmo 19:7, 11). Uan ijkon tein ompa timomachtiskej nochipa techpaleuis uan ika uelis timoixyekanaskej mojmostaj.

Kemej tein techyolmajxitia Proverbios 13:20 kampa kijtoua: “Akin nentinemi iniuan akin tamatinij mochiuas tamatkej, sayoj ke akin mouika iniuan akin amo tamatij kipias ouijkayot”. Nejin tayolmajxitilis kisentoka techpaleuia axkan ijkon kemej tapaleuij ne uejkauj. Uan itech Biblia tikajsij okseki tayolmajxitilis tein no semi techpaleuiaj (xikonita recuadro “Tein Biblia tayolmajxitia nochipa tapaleuia”).

Xa tionmotajtania: “¿Keniuj uelis nikmatis ox yekmelauj tapaleuia axkan tein Biblia tayolmajxitia?”. Itech okse tamachtilis tikitaskej tein sekin kinpanok.

a Jehová yejua itokay Dios (Salmo 83:18).

TEIN BIBLIA TAYOLMAJXITIA NOCHIPA TAPALEUIA

Maski kipia kemej 2.000 xiuit ke motamiijkuiloj Biblia, kisentoka tapaleuia hasta axkan. Tinochin nochipa tiknekinij tiyolpakiskej uan kuali tinemiskej (Eclesiastés 1:9). Uan tein Biblia tayolmajxitia, uelis techpaleuis maj ijkon tinemikan.

Maj amo titakajkayauakan

“Amo keman tiknekij titakajkayauaskej” (Hebreos 13:18).
“Akin tachteki maj amo tachtekiok, ta maj chikauak tekiti” (Efesios 4:28).

Maj kuali timouikakan iniuan oksekin

“Maj amo akin kitemo sayoj tein yejua kipaleuis, ta tein kinpaleuis oksekin” (1 Corintios 10:24).
“Xiksentokakan ximoxikojtokan se iuan okse uan ximotapojpoluijtokan ika nochi namoyolo” (Colosenses 3:13).

Maj kuali tiknemilikan tein tikixtaliskej tikchiuaskej

“Akin amo tamatkej kineltoka nochi tein kiluiaj, sayoj ke akin tamatkej kuali kiita kani taksas” (Proverbios 14:15).
“Tamatkej kiita ouijkayot uan motatia, sayoj ke akin amo kipiaj tamatilis kisentokaj taixpan uan kijyouiaj tein amo kuali” (Proverbios 22:3).