Maj titakuaujtamatikan itech inechikol Jehová

1. ¿Keniuj kinixyekanayaj tokniuan itech yekinika siglo?

NOCHIPA keman Jehová kinmaka tekit itekitikauan kineki maj moyekchiua (1 Cor. 14:33). Kemej kiteixmatiltiskej kuali tanauatilmej itech nochi taltikpak (Mat. 24:14). Jehová kiixtalij Jesús maj kiixyekana nejon tekit, uan yejua kiita maj nochi kuali moyekchiua. Itech yekinika siglo ompa Jerusalén tatitanilmej uan tayekananij akin ompa nemiaj kinixyekanayaj nechikolmej uan kiixtaliayaj toni monekia mochiuas (Hech. 15:2; 16:4). Itech nochi nechikolmej kinixtaliayaj tayekananij para maj kinixyekanakan uan para maj kinmatiltikan tokniuan tein kinnauatijkaj (Hech. 14:23). Kemej tokniuan tatakamatiaj, “kisentokakej okachi takuaujtamatkej uan mojmostaj momiakilijtiayaj” (Hech. 16:5).

2. ¿Keniuj desde 1919 Jehová kiixyekanani ixolal uan kinmakani tein moneki?

² Itech nejin tonalmej Jehová kisentokani kiixyekana ixolal. Itech xiuit 1919, Jesús kinixpejpenak seki tokniuan para maj kiixyekananij tanojnotsalis uan maj kinmakanij imomachtijkauan tein kinpaleuiskia maj kuali mouikakan iuan Jehová (Luc. 12:42).a Uan moita keniuj Jehová kitiochiuani tekit tein kichiujtokej nejon tokniuan (Is. 60:22; 65:​13, 14).

3, 4. 1) Xikonmelaua keniuj tapaleuia maj ixyeto keniuj motekitis itech inechikol Jehová. 2) ¿Toni tikitaskej itech nejin tamachtilis?

³ Komo amo ixyetoskia keniuj titanojnotsaskej amo ueliskia tikchiuaskej tekit tein Jesús techmakak (Mat. 28:​19, 20). Komo itech tonechikol amo kiixtaliskiaj kani titanojnotsaskej, tinochin kampa yeski tiaskiaj. Uan xa sayoj seko titanojnotsaskiaj uan okseko amo keman tiaskiaj. ¿Tikonnemilia okseki taman kemej tapaleuia maj ixyeto keniuj tekitis inechikol Jehová?

⁴ Axkan, Jesús kiixyekana ixolal Dios kemej kinixyekanak imomachtijkauan keman yetoya nikan taltikpak. Itech nejin tamachtilis tikitaskej toni kichiuak Jesús uan keniuj inechikol no ijkon kichiua. No tikitaskej toni moneki tikchiuaskej para tiknextiskej ke titakuaujtamatij itech inechikol Jehová.

INECHIKOL JEHOVÁ KICHIUA IJKON KEMEJ JESÚS

5. ¿Keniuj inechikol Jehová kichiua ijkon kemej Jesús? (Juan 8:28).

⁵ Kemej Jesús kiitaya iTajtsin kimatik toni monekia kichiuas uan kijtos. Tein tamachtia uan tein tayolmajxitia inechikol Jehová ualeua itech iTajtol Dios (xikonixtajtolti Juan 8:28; 2 Tim. 3:​16, 17). No techelnamiktia maj nochipa tikixtajtoltikan Biblia uan maj tikchiuakan tein timomachtiaj. ¿Keniuj techpaleuia komo tikchiuaj nejin?

6. ¿Katiyejua se taman kemej techpaleuia maj timomachtikan Biblia?

⁶ Semi techpaleuia maj timomachtikan Biblia uan toamaixuan, porin tikitaj ke tein technauatiani inechikol Dios yejua tein tamachtia Biblia. Keman tikitaj ke nejon tanauatilmej mokixtiaj itech iTajtol Dios techpaleuia maj okachi titakuaujtamatikan itech inechikol Jehová (Rom. 12:2).

7. ¿Toni kiteixmatiltij Jesús, uan keniuj inechikol Jehová no ijkon kichiua?

⁷ Jesús kiteixmatiltij “kuali tanauatilmej tein ika tajtoua iTaixyekanalis Dios” (Luc. 4:​43, 44). Uan kinnauatij imomachtijkauan maj no tanojnotsakan (Luc. 9:​1, 2; 10:​8, 9). Axkan akin pouij itech inechikol Jehová kiteixmatiltiaj iTaixyekanalis Dios maski tataman tekit kipiaskej oso kampa yeski nemiskej.

8. ¿Toni tatiochiualis tikpiaj?

⁸ Se ueyi tatiochiualis maj tikinnojnotsakan nochin de iTaixyekanalis Dios. Nejin amo nochin ueli kichiuaj. Keman Jesús yetoya nikan taltikpak amo kikauak maj amokuali ejekamej kiteixmatiltianij ke yejua katka Cristo (Luc. 4:41). Itech totonaluan para maj aksa ueli tanojnotsa iniuan itaixpantijkauan Jehová moneki kichiujtos tein yejuatsin kiyolpaktia. ¿Keniuj tiknextiaj ke tikpatiuitaj maj ueli titanojnotsakan? Komo titanojnotsaj kampa yeski uan keman yeski. Ijkon kemej Jesús, tejuan no tikchiuaj tein tiuelij para tikinnojnotsaskej oksekin uan tikinmachtiskej (Mat. 13:​3, 23; 1 Cor. 3:6).

9. ¿Toni kichiuani inechikol Jehová para kiteixmatiltis itokay Dios?

⁹ Jesús kitematiltij itokay Dios. Kitataujtij iTajtsin uan kiluij: “Nikinixmatiltij motokay” (Juan 17:26). Inechikol Jehová no kichiua kemej yejua porin mochikaua nochin kinixmatiltis itokay Dios. Se taman tein kikui para kichiuas yejua Traducción del Nuevo Mundo, tein moajsi itech 270 tataman tajtolmej. Sayoj nejin Biblia kitaliani itokay Dios kampa moneki yas. Itech apéndice A4 uan A5 kijtoua keyej oksepa nesi itokay Dios. Uan itech apéndice C, tein moajsi itech Biblia de estudio, kinextia keyej itokay Dios moneki yetos 237 viajes itech iTajtol Dios itech tajtol griego.

10. ¿Toni techmachtia tein kipanok se siuatsin de Myanmar?

¹⁰ Ijkon kemej Jesús, tejuan no tiknekij maj miakej kiixmatikan itokay Dios. Ompa Myanmar, se tokniuj kinextilij se siuatsin de 67 xiujmej ke itokay Dios yejua Jehová. Siuatsin semi mouelitak uan hasta peuak chokak, kiluij: “Amo keman nikaktoya itokay Dios. [...] Yejua tein okachi kuali tein nechmachtianij”. Nejin techmachtia ke keman aksa kiixmati itokay Dios ueli kipata kemej nemi.

MAJ TIKSENTOKAKAN TIKNEXTIKAN KE TITAKUAUJTAMATIJ ITECH INECHIKOL JEHOVÁ

11. ¿Keniuj kinextiaj tayekananij ke takuaujtamatij itech inechikol Dios? (No xikonita taixkopimej).

¹¹ ¿Keniuj tayekananij kinextiaj ke takuaujtamatij itech inechikol Dios? Keman kuali kiixtajtoltiaj tein kinnauatiaj uan kitakamatij. Tayekananij kinnauatiaj keniuj moneki mopanoltiskej seki tamachtilismej itech nechikol uan keniuj mochiuaskej netataujtilmej, uan no kiniluiaj keniuj moneki kinyekpiaskej tokniuan. Keman tayekananij kitakamatij nochi tanauatilmej tein kinmaka inechikol Jehová, tokniuan kimachiliaj ke Jehová kintasojta uan kinyekpia.

12. 1) ¿Keyej moneki tikchiuaskej tein technauatiaj akin techixyekanaj? (Hebreos 13:​7, 17). 2) ¿Keyej moneki tikitaskej sayoj tein kuali tein kichiuaj akin techixyekanaj?

¹² Keman tayekananij technauatiskej maj tikchiuakan teisa, tejuan moneki tikchiuaskej. Ijkon tikinpaleuiskej maj kuali kichiuakan inintekiuj. Biblia kijtoua maj tikintakamatikan uan maj timokauakan maj techyekanakan (xikonixtajtolti Hebreos 13:​7, 17). Xa ouij tikchiuaskej nejon porin tayekananij no tajtakolejkej. Sayoj ke maj tikelnamikikan ke komo nochipa tikitaj ininnepololuan uan amo tein kuali tein kichiuaj, tikchiujtoskej tein kinekij akin techtauelitaj. ¿Keyej tikijtouaj nejin? Porin komo amo kuali tikinitaj tayekananij, kichiuas maj amo titakuaujtamatikanok itech inechikol Dios, uan yejua nejon tein kinekij maj tikchiuakan akin techtauelitaj. Sayoj ke, ¿toni uelis tikchiuaskej para tikitaskej uan niman tikixtopeuaskej tein techtakajkayauiliaj akin techtauelitaj?

MAJ AMO AKIN KICHIUA MAJ AMO TITAKUAUJTAMATIKANOK ITECH INECHIKOL JEHOVÁ

13. ¿Toni kijtouaj akin techtauelitaj de inechikol Dios?

¹³ Akin techtauelitaj kinextiaj ke tein kuali tein kichiua inechikol Dios amo kuali yetok. Biblia tamachtia ke Jehová kineki maj itekitikauan chipaujkej, maj kichiuakan tein kuali yetok uan maj kiueyichiuakan kemej yejua kiuelita. Yejua kijtoua ke akin kisentoka kichiua tein amo kuali yetok uan amo moyolpata amo uelis yeskiok itaixpantijkauj Jehová (1 Cor. 5:​11-13; 6:​9, 10). Kemej tiknekij tiktakamatiskej nejin tanauatil, akin techtauelitaj kijtouaj ke amo titeajsikamatij, amo titeikneliaj uan ke timoueyimatij.

14. ¿Akoni kitakajkayauilia inechikol Dios?

¹⁴ Maj tikelnamikikan akoni kichiua maj techixnamikikan. Satanás yejua “akin peuak takajkayaua”, uan kichiua maj kitakajkayauilikan inechikol Dios (Juan 8:44; Gén. 3:​1-5). Amo tikmojkaitaj maj kichiua maj oksekin takajkayauakan, porin ipa ijkon kichiujkaya itech yekinika siglo.

15. Akin taixyekanayaj itech taneltokalis, ¿toni kinchiuilijkej Jesús uan imomachtijkauan?

¹⁵ Maski Jesús, iKonetsin Dios, amo katka tajtakolej uan kichiuaya miak milagros, Satanás kichiuak maj sekin kitakajkayauilikan. Akin taixyekanayaj itech taneltokalis kijtouayaj ke Jesús kinkalankixtiaya amokuali ejekamej porin “akin kinixyekanaya amokuali ejekamej” kipaleuiaya (Mar. 3:22). Satepan uejueyi tiopixkamej uan taixyekananij judíos kijtojkej ke yejua kiuijuikaltijka itokay Dios uan kichiujkej maj nochin tajtanikan maj kimiktikan Jesús (Mat. 27:20). Satepan ke imomachtijkauan Cristo peujkej tanojnotsaj, akin kintauelitayaj “kichiujkej maj kualanikan” uan “maj kinixnamikikan” (Hech. 14:​2, 19). Amaix La Atalaya 1 de diciembre xiuit 1998 ika tajtoj Hechos 14:2 uan kijtoj ke judíos akin kintauelitayaj amo sayoj kiixtopeujkej tein ika kinnojnotsayaj, ta peujkej kinijtouiliaj tein amo melauak para maj amo akin kinkakini uan maj kintauelitanij imomachtijkauan Cristo.

16. ¿Toni moneki tikchiuaskej komo tikakij teisa tein ika kitakajkauiliaj inechikol Dios?

¹⁶ Satanás kisentoka kinkajkayaua “nochin akin nemij nikan taltikpak” (Apoc. 12:9). Yejua ika, komo tikakij ke kitakajkayauiliaj inechikol Dios uan tokniuan akin taixyekanaj, maj tikelnamikikan toni kinchiuilijkej Jesús uan imomachtijkauan. Yejua kijtoj ke miakej kiixnamikiskiaj itekitikauan Jehová uan kintakajkayauiliskiaj (Mat. 5:​11, 12). Akin techtauelitaj amo techkajkayauaskej komo niman tikelnamikij akoni kichiua maj techtakajkayauilikan uan niman tikchiuaj tein techpaleuis. ¿Toni moneki tikchiuaskej para timoyekpiaskej?

17. ¿Toni moneki tikchiuaskej komo techtapouiaj tein amo melauak? (2 Timoteo 1:13; no xikonita recuadro “¿Toni moneki tikonchiuas komo mitsontapouiaj tein amo melauak?”).

¹⁷ Maj tikixtopeuakan nochi taman tein ika kitakajkayauiliaj inechikol Dios. Tatitanil Pablo kijtoj toni moneki tikchiuaskej. Itech 1 Timoteo 1:​3, 4 tanauatij ‘maj amo tikakikan tein amo melauak tein tetapouiaj’. Uan no kiyolmajxitij Timoteo: “Xikixtopeua tein amo melauak tein kitetapouiaj” (1 Tim. 4:7). Xikonnemili nejin: se konetsin ueliskia motenakis teisa tein uetstok, sayoj ke aksa akin moskaltijya amo keman kichiuaskia nejon porin kimati ke nejon ueliskia kijtakos. No ijkon, tejuan amo tikinkakij akin tetapouiaj tein amo melauak, ta sayoj tikakij “kuali tajtolmej” tein kijtouaj tein melauak (xikonixtajtolti 2 Timoteo 1:13).

18. ¿Keniuj uelis tiknextiskej ke nochipa titakuaujtamatij itech inechikol Jehová?

¹⁸ Axkan tikitakej sayoj eyi taman kemej inechikol Dios kichiua ijkon kemej Jesús, sayoj ke ijkon kemej tionmomachtijtias Biblia tikonitas ke onkak okseki taman. Xikonsentoka xikonpaleui tokniuan maj takuaujtamatikan itech inechikol Jehová. Xikonsentoka xikontekitili Jehová, uan maj nion teyi kichiua xikonkaua inechikol kampa uelis tikonueyichiuas iniuan oksekin uan tikonchiuas tein yejuatsin kineki (Sal. 37:28). Semi kualtsin maj ueli tiktekitilikan Jehová itech se nechikol kampa tinochin semi timotasojtaj. ¡Maj nochipa tiktasojkamatilikan Jehová!