¿Tikonchiujtok tein Jesús tanejmachtij?

1. ¿Toni kichiuas Jesús amo uejkaua?

AMO uejkaua Jesús kiixtalis tein kinnamikis kiseliskej nochin akin nemij nikan taltikpak. ¿Keniuj tikmatij ke amo uejkaua mochiuas? Porin Jesús kiniluij imomachtijkauan se taman tein ‘kinextiskia’ ke Jesús tekiuajtitokya itech iTaixyekanalis Dios uan ke “tamitiya tein mochiujtok itech taltikpak” (Mat. 24:3). Uelis tikixtajtoltiskej tein Jesús kijtoj ke panoskia itech Mateo capítulos 24 uan 25, Marcos capítulo 13 uan itech Lucas capítulo 21.

2. ¿Toni tikitaskej itech nejin tamachtilis uan keyej?

² Jesús kitetapouij eyi taman tein techpaleuiskia maj tikchixtokan nejon tonalmej. Ika tajtoj ichkamej uan chivos, majtakti ichpochmej uan takeualmej akin kinkauilijkej bolsa tomin. Sejse taman tein ika tamachtij kinextij ke Jesús kiitas tein tikchiuaj tisejsemej keman kiixtalis tein technamiki tikseliskej. Itech nejin tamachtilis tikitstiaskej sejse taman uan tein techmachtia. Yekinika maj tikitakan keman ika tajtoj ichkamej uan chivos.

ICHKAMEJ UAN CHIVOS

3. ¿Kemanian Jesús kiixtalis toni technamiki tikseliskej?

³ Jesús tamachtij ke keman kiixtalis tein sejse kinamiki kiselis kiitas ox kinextij ke kinpaleuiaya tokniuan taijitalmej uan ox kiselij kuali tanauatilmej (Mat. 25:​31-46). ¿Kemanian Jesús kiixtalis akonimej ichkamej uan akonimej chivos? Keman mochiujtos “tetsaujkatajyouilis”, tepitsin achto ke ejkos Armagedón (Mat. 24:21). Ijkon kemej se ichkatajpixkej kinxeloua ichkamej uan chivos, Jesús no kinxelos akin kinpaleuiaj tokniuan taijitalmej uan akin amo kinpaleuiaj.

4. Kemej kijtoua Isaías 11:​3, 4, ¿keyej tikyekneltokaj ke Jesús kuali techmelauas? (No xikonita taixkopimej).

⁴ Jehová kiixtalij Jesús maj tamelaua uan Biblia kijtoua ke yejua kuali kiixtalis tein kichiuas (xikonixtajtolti Isaías 11:​3, 4). Jesús kiita tein aksa kinemilia, tein kijtoua uan tein kichiua, uan no keniuj kinpaleuia tokniuan taijitalmej (Mat. 12:​36, 37; 25:40). Yejua kielnamikis akonimej kinpaleuijkej tokniuan taijitalmej uan keniuj kinpaleuijkej.a Keman titanojnotsaj tiknextiaj ke tikinpaleuiaj iikniuan Cristo. Akin kinpaleuiskej kinitaskej ke “yolmelaujkej” uan uelis nemiskej nochipaya nikan taltikpak (Mat. 25:46; Apoc. 7:​16, 17). ¡Semi kualtsin tein kiseliskej porin amo keman kikaujkej Jehová! Komo amo kikauaj Jehová keman mochiujtos tetsaujkatajyouilis uan no satepan, inintokay ijkuiliujtos “itech amatajkuilol kampa ixnesij akin nemiskej” (Apoc. 20:15).

5. ¿Toni techmachtia keman Jesús ika tajtoj ichkamej uan chivos, uan akonimej moneki kikakiskej?

⁵ Xikonnexti ke amo keman tikonkaua Jehová. Keman Jesús ika tajtoj ichkamej uan chivos kijtoj ke akin kichiaj nemiskej nochipaya nikan taltikpak yejuan akin monekia kikakiskej tein tayolmajxitij. Yejuan amo sayoj kinextiaj ke amo kikauaj Jehová keman youij tanojnotsatij para kinpaleuiskej iikniuan Cristo, ta no keman kitakamatij takeual takuaujtamach uan tamatkej akin Jesús kiixtalij (Mat. 24:45). Sayoj ke akin kichiaj nemiskej ne iluikak no moneki kikakiskej tein Jesús kitetapouij. ¿Keyej? Porin Jesús no kiita tein kichiuaj, tein kinemiliaj uan tein kijtouaj. Yejua ika yejuan no moneki kinextiskej ke amo keman kikauaj Jehová. Jesús no kitetapouij okseki ome taman para kinyolmajxitis tokniuan taijitalmej, uan ueli tikitaj itech Mateo capítulo 25. Axkan tikitaskej toni techmachtia keman Jesús ininka tajtoj majtakti ichpochmej.

MAJTAKTI ICHPOCHMEJ

6. ¿Keniuj kinextijkej makuil ichpochmej ke yektanemiliayaj? (Mateo 25:​6-10).

⁶ Keman Jesús kitetapouij nejin ininka tajtoj majtakti ichpochmej akin kinamikitoj novio (Mat. 25:​1-4). Nochin yejuan kinekiaj kalakiskej iuan novio kampa yejua monamiktiskia. Jesús kijtoj ke makuil “yektanemiliayaj” uan makuil “amo yektanemiliaya”. Akin yektanemiliayaj kuali ijsatoyaj uan kichixtoyaj. Yejuan kichiaskiaj novio maski motayoualtiskia uan amo niman ajsiskia. Yejua ika kiuikakej inincandil para ika motauiliskej, uan kiuikakej okachi aceite komo novio semi uejkauaskia uan ijkon inincandil amo seuiskia (xikonixtajtolti Mateo 25:​6-10). Keman ejkok novio, makuil ichpochmej akin yektanemiliayaj iuan kalakkej kampa yejua monamiktiskia. Xa no ijkon panos iniuan tokniuan taijitalmej. Akin kinextiskej ke amo keman kikauaj Jehová uan ijsatoskej hasta keman ejkos Jesús, akin novio, uelis iuan kalakiskej itech itaixyekanalis ne iluikak (Apoc. 7:​1-3).b ¿Uan toni kinpanos makuil ichpochmej akin amo yektanemiliayaj?

7. ¿Toni kinpanok makuil ichpochmej akin amo yektanemiliayaj uan keyej?

⁷ Makuil ichpochmej akin amo yektanemiliayaj amo kipiayaj tein monekia keman ejkok novio. Jesús kijtoj ke keman kikakkej ke novio yaya ejkotia, kiitakej ke inincandil yaya seuitia uan kemej amo kipiayaj aceite para oksepa kitaliliskej, monekik yaskej kikouatiuij. Keman ejkok novio, yejuan ayamo mokepayaj. “Ichpochmej akin kixotaltijkaj inincandil iuan kalakkej novio kampa monamiktiskia, uan tatsakuik” (Mat. 25:10). Satepan, ichpochmej akin amo yektanemiliayaj mokepkej uan kinekiaj kalakiskej, sayoj ke novio kiniluij: “Namechyekiluia ke amo namechixmati” (Mat. 25:​11, 12). Amo kichiujkej tein monekia para kichiaskej novio maski semi uejkauaskia. ¿Toni kinmachtia tokniuan taijitalmej tein Jesús kitetapouij?

8, 9. ¿Toni kinmachtia taijitalmej keman Jesús ininka tajtoj majtakti ichpochmej? (No xikonita taixkopimej).

⁸ Xikonchiujto tein monekis uan tein mitsonpaleuis. Jesús amo kinekia kijtos ke sekin tokniuan taijitalmej kichiujtoskiaj tein moneki hasta keman yejua ualas itech tetsaujkatajyouilis uan oksekin amo. Ta kiniluij tokniuan taijitalmej ke komo amo taxikouayaj hasta keman nochi tatamis, amo kiseliskiaj tein Jehová motenkaujka kinmakas (Juan 14:​3, 4). ¡Tein kijtoj semi moneki! Akin tikchiaj tinemiskej nikan taltikpak oso ne iluikak moneki tikitaskej tein Jesús tanejmachtij keman ininka tajtoj majtakti ichpochmej. Tinochin moneki titachixtoskej uan tikchiuaskej tein techpaleuis maj titaxikokan hasta keman tatamisya (Mat. 24:13).

⁹ Kemej tikitakej, keman Jesús ininka tajtoj majtakti ichpochmej kinextij ke semi moneki maj titachixtokan uan maj tikchiuakan tein techpaleuis maj titaxikokan. Satepan, ininka tajtoj takeualmej akin kinkauilijkej bolsa tomin, tein ika kinextij ke semi moneki maj titekitikan.

TAKEUALMEJ AKIN KINKAUILIJKEJ BOLSA TOMIN

10. ¿Keniuj kinextijkej ome takeualmej ke kitakamatiaj ininteko? (Mateo 25:​19-23).

¹⁰ Jesús ininka tajtoj ome takeualmej akin kitakamatkej ininteko uan se akin amo (Mat. 25:​14-18). Achto ke yaskia okse ueyi altepet, ininteko kinkauilijteuak miak tomin. Yekinika ome takeualmej kinextijkej ke kitakamatiaj ininteko porin tekitikej uan kitankej okachi tomin. Keman ininteko mokepak kitankaj okse achiok ke tein kinkauilijka. Yejua ika kijtoj ke kuali tekitikej uan sejsemej kiniluij: “Xiuiki uan xiyolpaki nouan” (xikonixtajtolti Mateo 25:​19-23). ¿Uan toni kichiuilij tomin tein kimakakaj expatika takeual?

11. ¿Toni kipanok takeual akin tatsiuia, uan keyej?

¹¹ Expatika takeual kimakakej se bolsa tomin, sayoj ke katka ‘tatsiuj’. Iteko kichiaya maj tekiti uan maj kitanini okachi tomin. Sayoj ke takeual tachkuak uan kitaltokak. Keman iteko mokepak, yejua sayoj kikepilij tein kimakaka. Kinextij ke amo kuali tanemiliaya porin amo kiluij iteko maj kitapojpolui, ta kijtoj ke ‘amo teikneliaya’. Yejua ika, iteko kitatsakuiltij, kikuilij tomin uan amo kikauakok maj mokaua ichan (Mat. 25:​24, 26-30).

12. ¿Akonimej kinixnextia takeualmej akin tatakamatkej?

¹² Ome takeualmej akin tatakamatkej kinixnextiaj tokniuan taijitalmej akin amo keman kikauaj Jehová. Ininteko Jesús, kiniluia sejsemej: “Xiuiki uan xiyolpaki nouan”. Nejin kijtosneki ke yaskej nemitiuij ompa iluikak (Mat. 25:​21, 23; Apoc. 20:5a). Uan no, tein kichiuak takeual akin tatsiuia kinnejmachtij se taman taijitalmej. Maj tikitakan keyej.

13, 14. ¿Toni kinmachtia tokniuan taijitalmej keman Jesús ininka tajtoj takeualmej akin kinkauilijkej bolsa tomin? (No xikonita taixkopimej).

¹³ Xikonnexti ke kuali tiontekiti. Keman Jesús ininka tajtoj takeualmej akin kinkauilijkej bolsa tomin, amo kinekia kijtos ke taijitalmej mochiuaskiaj tatsiuinij. Ta kinnejmachtijtoya, ijkon kemej kichiujka keman ininka tajtoj majtakti ichpochmej. Yejua kinmelauilijtoya toni panoskia komo amo yolpakiajok kitekitiliskej Dios: yejuatsin amo ‘kinnotsaskiaok nion kinijitaskiaok’ uan amo ueliskiaj kalakiskej itech iTaixyekanalis Dios ompa iluikak (2 Ped. 1:10).

¹⁴ Keman Jesús ininka tajtoj majtakti ichpochmej uan takeualmej akin kinkauilijkej bolsa tomin, kinextij ke tokniuan taijitalmej moneki kichiujtoskej tein kinpaleuis maj taxikokan, maj tachixtokan uan maj kuali tekitikan. Sayoj ke Jesús no kinnejmachtij taijitalmej okseki taman. Uan se taman tikajsij itech Mateo 24:​40, 41. Maj tikitakan nejin versículos.

¿AKONI “KIUIKASKEJ”?

15, 16. Kemej kijtoua Mateo 24:​40, 41, ¿keyej taijitalmej moneki tachixtoskej?

¹⁵ Achto ke Jesús kitetapouiskia nejin eyi taman ininka tajtoj ome takamej akin yetokej kampa tatokaj uan ome siuamej akin tistokej ika metat. Takamej sekosan tekititoyaj uan siuamej no. Sayoj ke Jesús kijtoj: “Se kiuikaskej uan okse kikaujteuaskej” (xikonixtajtolti Mateo 24:​40, 41). Itech versículo tein kisentoka, Jesús kiniluij imomachtijkauan: “Nochipa xitachixtokan, porin amo nankimatij toni tonal ualas namoTekotsin” (Mat. 24:42). Jesús no ijkon kijtoj satepan ke ininka tajtoj majtakti ichpochmej (Mat. 25:13). Nesi ke nejon ome taman tein kijtoj sayoj kijtosneki se taman. Yejua kinmelauilijtoya ke sayoj akin yekmelauj taijital uan amo keman kikaua Jehová ‘kiuikaskej’, nejin kijtosneki ke Jesús kiselis itech iTaixyekanalis Dios ompa iluikak (Juan 14:3).

¹⁶ Xikonnexti ke tiontachixtok. Komo se taijital amo kichiua tein kipaleuis maj kisentoka kuali mouika iuan Jehová, amo kisentiliskej iniuan “taijitalmej” (Mat. 24:31). Uan nochin akin kichiaj nemiskej nikan taltikpak no moneki kikakiskej tein Jesús tanejmachtij, moneki kitakamatiskej Jehová uan tachixtoskej.

17. ¿Keyej amo techtekipachoua maj Jehová kinijita seki itekitikauan itech nejin xiujmej?

¹⁷ Kemej kuali tikixmatij Jehová, titakuaujtamatij ke kuali yetok tein kiixtalia kichiuas. Yejua ika, amo techtekipachoua maj Jehová kinijita seki tokniuan itech nejin xiujmej.c Tikelnamikij tein Jesús kijtoj keman ika tajtoj takat akin kintakeuato akin kitekiskiaj uvas italpan keman tiotakia katka (Mat. 20:​1-16). Akin peuak tekitij tiotak kintaxtauijkej kemej akin peuak tekitij desde kualkan. No ijkon, nochin taijitalmej akin amo keman kikauaskej Jehová yaskej iluikak maski yekin oso ne kemanya kinijitakej.

XIKONKAKI TEIN TECHNEJMACHTIA

18, 19. ¿Toni techmachtia tein tikitakej itech nejin tamachtilis?

¹⁸ ¿Toni tikitakej itech nejin tamachtilis? Keman Jesús ika tajtoj ichkamej uan chivos kinextia ke akin kichiaj nemiskej nikan taltikpak, semi moneki maj amo keman kikauakan Jehová, nion axkan nion keman mochiujtos tetsaujkatajyouilis. Keman mochiuas nejon, Jesús kiixtalis akonimej amo keman kikaujkej Dios uan uelis “nemiskej nochipaya” (Mat. 25:46).

¹⁹ No tikitakej ome taman tein Jesús ika tajtoj para kinnejmachtis taijitalmej. Keman ininka tajtoj majtakti ichpochmej, kijtoj ke makuil kinextijkej ke kuali ijsatoyaj uan kichixtoyaj novio. Kinextijkej ke yektanemiliayaj uan kichiujkej tein monekia para kichiaskej maski semi uejkauaskia. Akin amo yektanemiliayaj amo kipiayaj tein monekia uan novio amo kinkauak maj kalakikan kampa monamiktiskia. ¿Toni techmachtia? Moneki tiksentokaskej tiktekitilijtoskej Jehová hasta keman kiixpolos nochi tein amo kuali. Keman ininka tajtoj takeualmej akin kinkauilijkej bolsa tomin, tikitakej ke omen kuali tekitikej. Kemej kitakamatkej ininteko uan mochikaujkej kitaniskej okachi tomin semi kiyolpaktijkej. Sayoj ke takeual akin tatsiuia kikalantamotkej. ¿Toni techmachtia? Moneki tiksentokaskej tiktekitiliskej Jehová hasta keman tatamis. No tikitakej ke Jesús tamachtij ke taijitalmej moneki tachixtoskej para uelis kalakiskej itech iTaixyekanalis Dios ompa iluikak. Yejuan kinekij maj ejkoya tonal keman ‘mosentiliskej’ iuan Jesús ne iluikak. Keman tamis Armagedón, yejuan yeskij novia “keman Ichkatsin monamiktis” (2 Tes. 2:1; Apoc. 19:9).

20. ¿Toni kichiuas Jehová komo tikakij tein technejmachtia?

²⁰ Amo uejkaua Jesús kiixtalis toni technamiki tikseliskej, sayoj ke amo moneki timomoujtiskej. Komo amo keman tikauaj Jehová techmakas “chikaualis tein toselti amo ueli tikpiaj” uan ijkon uelis ‘tiijkatoskej iixpan akin yolik kemej takat’ (2 Cor. 4:7; Luc. 21:36). Yejua ika maski tikchiaskej tinemiskej nikan taltikpak oso ne iluikak, moneki tiksentokaskej tikchiuaskej tein Jesús tanejmachtij. Komo ijkon tikchiuaj, tikyolpaktiskej toTajtsin, uan kemej yejua yolkuali, totokay “ijkuiliujtos itech amatajkuilol” kampa ixnesij akin nemiskej (Dan. 12:1; Apoc. 3:5).