¿Uelis tikonsentokas tionijsatos?

1, 2. 1) ¿Toni kijtoj Jesús ke panoskia itech itamian tonalmej? 2) ¿Toni tikitaskej itech nejin tamachtilis?

JESÚS tokotsyetoya iniuan tatitanilmej Pedro, Andrés, Santiago uan Juan itech tepet Olivos, kampa uelia moitaya templo tein moajsia Jerusalén. Ompa peuak kinmelauilia se taman tein tel kualtsin tein mochiuaskia itamian tonalmej, keman yejua yeskia tekiuaj itech iTekiuajyo Dios. Jesús kiniluij ke itech nejon tonalmej moajsiskia se “takeual ten yolkuali uan ten kuatamatke”, oso takeual takuaujtamach uan tamatkej, akin kimakaskia se tekit nikan taltikpak. Nejin takeual kinmakaskia itatojtokakauan tamachtilis tein kinpaleuiskia maj motokikan iuan Dios itech tonal keman kinpolojtoskia (Mat. 24:45-47).

² Tepitsin satepan, Jesús kintapouij se tanojnots kampa ininka tajtoj majtakti ichpochmej (xikonixtajtolti Mateo 25:1-13). Itech nejin tamachtilis ika titajtoskej nejin. Tikitaskej eyi taman. Yekinika, ¿toni kinekia tamachtis Jesús ika nejin tanojnots? Ojpatika, ¿keniuj taixpejpenalmej akin amo kikauaj Dios kichiuanij tein tamachtia nejin tanojnots, uan toni tatiochiualismej kiseliskej? Expatika, ¿keniuj no uelis techpaleuis tisejsemej?

TONI KINEKIA TAMACHTIS JESÚS

3. 1) ¿Keniuj momelauaya achto itech toamaixuan tanojnots kampa ininka motajtoua majtakti ichpochmej? 2) ¿Toni xa panok keman tiktemouayaj toni kijtosneki sejse taman tein kijtouaya tanojnots tein amo tayekantok?

³ Itech tamachtilis tein achto tikitakej, ika motajtoj ke itech nejin xiujmej takeual takuaujtamach kipatani kemej kimelaua seki tanojnotsmej tein moajsij itech Biblia. Achto okachi kitemouaya kimelauas tein kiixnextia sejse tanojnots. Sayoj ke axkan okachi kimelaua tein techmachtia. Kemej neskayot, maj titanemilikan itech tanojnots kampa ininka motajtoua majtakti ichpochmej. Ne uejkauj, toamaixuan okachi kimelauayaj tein xa kijtosnekia seki taman tein amo semi tayekantok, kemej tauilmej, aceite uan kampa kitaliayaj aceite. Sayoj ke keman tiktemouayaj toni kijtosnekia nochi nejon tein amo semi tayekantok, xa amo moyekitayaok toni techmachtia. Yejua ika, itech nejin tamachtilis tikitaskej toni techmachtia nejin tanojnots.

4. 1) ¿Akoni novio, uan keniuj tikmatij? 2) ¿Akonimej ichpochmej, uan keniuj tikmatij?

⁴ Yekinika moneki tikmatiskej akonimej ininka motajtoua itech tanojnots uan ijkon uelis tikmatiskej toni kinekia tamachtis Jesús. ¿Akoni novio? Yejua Jesús. Tikmatij nejin porin itech okse tonal yejua kijtoj ke katka kemej se novio (Luc. 5:34, 35). ¿Uan akonimej ichpochmej? Yejuan tokniuan taixpejpenalmej. Nejin tikmatij porin itech okse tonal, Jesús kijtoj ke taixpejpenalmej yeskiaj kemej takeualmej akin kipiaj inintauil xotatok uan kichiaj maj ininteko mokepa porin yajka itech se nenamiktilis (Luc. 12:32, 35, 36). Uan nejon techelnamiktia tein monekia kichiuaskej majtakti ichpochmej. Yejuan monekia kipiaskej inintauil xotatok keman ejkoskia novio. Uan no, tatitanilmej Pablo uan Juan no kinixnextijkej taixpejpenalmej kemej ichpochmej (2 Cor. 11:2; Rev. 14:4, TNM). Nochi nejin techpaleuia maj tikitakan ke ika nejin tanojnots kampa ininka tajtoj majtakti ichpochmej, Jesús kinekia kinmachtis taixpejpenalmej.

5. 1) ¿Kemanian mochiua tanojnots kampa ininka motajtoua majtakti ichpochmej? 2) ¿Keniuj tikmatij?

⁵ ¿Kemanian mochiua tanojnots kampa ininka motajtoua majtakti ichpochmej? Mochiua itech itamian tonalmej. ¿Keniuj tikmatij? Maj tikitakan. Itamiampa tanojnots, Jesús kijtoj ke novio “ejkok” (Mat. 25:10). Itech amaix Tanejmachtijkej 1 metsti julio, 2013 tikitakej ke itech Mateo 24 uan 25 chikueyipa ika motajtoua keman Jesús ejko. Uan tikitakej ke Jesús ejkos itech itamiampa okachi ueyi tajyouilis keman kijtos toni kinnamiki kiseliskej taltikpakneminij uan kinixpolos akin kichiuaj tein amo kuali. Yejua ika tikajsikamatij ke tanojnots kampa ininka motajtoua majtakti ichpochmej mochiua itech itamian tonalmej, sayoj ke Jesús ualas itech okachi ueyi tajyouilis.

6. ¿Toni kinekia tamachtis Jesús ika nejin tanojnots?

⁶ ¿Toni kinekia tamachtis Jesús ika nejin tanojnots? Maj tikitakan tajtolmej tein moajsij achto uan ijkon uelis tikmatiskej. Itech Mateo capítulo 24, Jesús ika tajtoj “takeual ten yolkuali uan ten kuatamatke”, se oloch tokniuan taixpejpenalmej akin kinixyekanaj akin kichiuaj kemej Cristo itech itamian tonalmej. Jesús kinnejmachtij nejin tokniuan maj yeskiaj takuaujtamachmej. Ika tanojnots kampa ininka tajtoj majtakti ichpochmej, Jesús kinekia kinmachtis se taman kemej nejon. Sayoj ke nejin kinekia kinmachtis nochin taixpejpenalmej akin nemiskiaj itech itamian tonalmej. ¿Uan katiyejua nejon tamachtilis? Ke nochin yejuan moneki ijsatoskej komo amo kinekij kipoloskej tatiochiualis yaskej iluikak (Mat. 25:13). ¿Keniuj taixpejpenalmej kichiuanij nejin? Maj tikitakan.

KENIUJ TAIXPEJPENALMEJ KICHIUANIJ TEIN TAMACHTIA TANOJNOTS

7, 8. 1) ¿Keyej moajsiaj kemej moneki ichpochmej akin yektanemiliayaj? 2) ¿Toni kichiuanij tokniuan taixpejpenalmej?

⁷ Itech tanojnots, Jesús kijtoj ke makuil ichpochmej “amo yek tanemiliayaj”. Ijkon kijtoj porin amo moajsiaj kemej monekia keman ejkok novio. Jesús no kijtoj ke okseki makuil ichpochmej “yek tanemiliayaj”. Ijkon kijtoj porin yejuan kemaj moajsiaj kemej monekia. ¿Keyej? Moajsi ome taman keyej moijtoua nejon. Yekinika porin yejuan kipiayaj nochi tein monekia, uan ojpatika porin ijsatoyaj. Nochi yejuan monekia mochixtoskej uan maj nochi youal xotatoni inintauil. Ichpochmej akin yektanemiliayaj kipiayaj nochi tein monekia porin kiuikakej okachi aceite, sayoj ke akin amo yektanemiliayaj amo kiuikakej. Axkan, ¿toni kichiujtokej tokniuan taixpejpenalmej akin amo kikauaj Dios keman kichiaj maj uiki Jesús?

⁸ Taixpejpenalmej kichiuanij tein moneki uan ijkon kisentokaskej kichiuaskej tein Jiova kinnauatij hasta keman ejkos tamilis. ¿Keniuj kichiuanij? Ika miak taman. Yekinika, kimatij ke komo kinekij kitekitiliskej Jiova moneki kikauaskej miak taman tein kinpaleuiaya maj yekpanokan, sayoj ke kichiuaj ika miak pakilis. Ojpatika, kiixtalijtokej amo keman kikauaskej Dios maski amo niman ejkos tamilis, porin kitasojtaj Jiova uan Jesús. Uan expatika, amo kitayekanaltiaj motomintiskej, nion auilnemij nion kitayekanaltiaj tein yejuan kinejnekij kemej kichiuaj tel miakej taltikpakneminij. Taixpejpenalmej kichiuaj kemej ichpochmej akin yektanemiliayaj, akin nochipa xotatoya inintauil. Nejin tokniuan no kichiujtokej tein moneki uan amo yolijsiuij keman kichiaj novio, maski nesi ke uejkaua (Filip. 2:15).

9. 1) ¿Toni kinnejmachtij Jesús tokniuan taixpejpenalmej? 2) ¿Keniuj tanankilianij taixpejpenalmej keman moijtoua: “Uitsa ya in teyokich”? (No xikonita nota.)

⁹ Ichpochmej akin yektanemiliayaj no moajsiaj kemej moneki porin ijsatoyaj. Komo ijkon, ¿keyej kijtoj Jesús ke majtakti ichpochmej kochkej keman kiitakej ke novio uejkauaya? Ijkon kinnejmachtij taixpejpenalmej itech nejin tonalmej ke komo amo moyekpiaj uelis kochiskej, tein kijtosneki, kichiuaskej okseki taman keman kichiaj maj ejko. Jesús kimatia ke hasta akin kineki kisentokas ijsatos uelis kichiuas okseki taman keman kichia maj ejko. Yejua ika, taixpejpenalmej akin amo kikauaj Dios mochikauaj kisentokaskej ijsatoskej. ¿Keniuj kichiuaj? Maj tikelnamikikan ke itech tanojnots, Jesús kijtoj ke ichpochmej kikakkej ke moijtoj: “Uitsa ya in teyokich [oso novio]”. Majtakti ichpochmej kikakkej, uan sayoj akin yektanemiliayaj ijsatoyaj (Mat. 25:5, 6; 26:41). No ijkon, itech nejin itamian tonalmej tokniuan taixpejpenalmej kikakinij ke moijtoua: “Uitsa ya in teyokich”. ¿Uan keniuj tanankilianij? Kiitanij nochi tein kiyeknextia ke Jesús ejkoti uan kichixtokej.a Axkan maj ika titajtokan tein moajsi itamiampa tanojnots, tein senkis ika tajtoua sayoj seki xiujmej.

AKIN YEKTANEMILIAJ KISELIAJ SE TAXTAUIL UAN AKIN AMO, KINTATSAKUILTIAJ

10. ¿Toni uelis timotajtaniskej ika tein moiluijkej ichpochmej akin yektanemiliayaj uan akin amo yektanemiliayaj?

¹⁰ Tepitsin achto ke ejkos novio, ichpochmej akin amo yektanemiliaj monojnotsaj iniuan ichpochmej akin yektanemiliaj. Akin amo yektanemiliaj kintajtaniaj akin yektanemiliaj maj kinmakakan aceite tein kitaliliskej inintauil. Sayoj ke akin yektanemiliaj amo kinekij kinpaleuiskej (xikonixtajtolti Mateo 25:8, 9). Nejin tein monojnotskej xa kiixnextia teisa tein mochiuas tepitsin achto ke ualas Jesús, itamiampa okachi ueyi tajyouilis. Sayoj ke xa timotajtaniskej: “¿Keniuj tokniuan taixpejpenalmej akin amo kikauaj Dios amo kinekiskej kipaleuiskej aksa?”. Techpaleuis maj tikajsikamatikan nejin komo tikitaj ke ijkuak, tokniuan taixpejpenalmej senkis kinixkuaneskayotiskejya.

11. 1) ¿Toni panos tepitsin achto ke peuas okachi ueyi tajyouilis? 2) Keman ichpochmej akin yektanemiliaj kiniluiaj akin amo yektanemiliaj maj kikouatij aceite, ¿toni kiniluisnekij?

¹¹ Tepitsin achto ke peuas okachi ueyi tajyouilis, nochin tokniuan taixpejpenalmej akin amo kikauaskej Dios uan moajsiskejok itech taltikpak, senkis kinixkuaneskayotiskej (Apoc. 7:1-4). Nejin kijtosneki ke melauak yaskej iluikak. Sayoj ke ¿toni panos iniuan akin ijsatoyaj sayoj ke kikaujkej Dios tepitsin achto ke peuas okachi ueyi tajyouilis? Yejuan amo senkis kinixkuaneskayotiskej. Keman peuas okachi ueyi tajyouilis uan kiitaskej keniuj ixpoliuij nochi taneltokalismej tein amo melaujkej, nejon akin kikaujkej Dios senkis momoujtiskej. Xa ijkuak kiajsikamatiskej ke amo kichiujtokej tein moneki keman ejkos Jesús. ¿Toni panos komo tajtanij nepaleuil nejon tonal? Tanankilil moajsi itech tein monojnotsaj majtakti ichpochmej. Akin yektanemiliaj amo kinekij kinmakaskej aceite akin amo yektanemiliaj uan kiniluiaj maj kikouatij. Sayoj ke kemej tajkoyouan, amo akin moajsi akin uelis kinnamakiltis. Tein melauj, kiniluisnekij ke amo teyi uelis kichiuaskejok.

12. 1) Keman mochiuas okachi ueyi tajyouilis, ¿toni kinpanos taixpejpenalmej akin kikauaskej Dios achto ke senkis kinixkuaneskayotiskiaj? 2) ¿Toni kichiuas Jesús iniuan akin kichiuaskej kemej ichpochmej akin amo yektanemiliayaj?

¹² Itech okachi ueyi tajyouilis, ¿toni kinpanos taixpejpenalmej akin kikauaskej Dios? Ke tokniuan taixpejpenalmej akin amo kikauaj Dios amo uelis kinpaleuiskej. Amo teyi uelis kichiuaskejok. Kinpanos kemej ichpochmej akin kikouatoj aceite: “Ejkok ne teyokich. Uan in makuil ichpochme ten yek tanemiliayaj uan ten moyejyektalijke ya, yejuan kalakke iuan ne teyokich kampa nenamiktilis. Uan niman kitsakuakke in puerta”. Keman Jesús ejkos itamiampa okachi ueyi tajyouilis, kinsentilis ne iluikak taixpejpenalmej akin amo kikaujkej Dios (Mat. 24:31; 25:10; Juan 14:1-3; 1 Tes. 4:17). Sayoj ke kinixtopeuas akin kichiuaskej kemej ichpochmej akin amo yektanemiliayaj. Yejuan xa kiluiskej Jesús: “Totekotsin, Totekotsin, xitechontatapouili”. Sayoj ke yejua kinnankilis ijkon kemej oksekin akin kikauaj Dios: “Yek melau ten namechilia ke amo namechixmati” (Mat. 7:21-23; 25:11, 12).

13. 1) ¿Keniuj tikmatij ke Jesús amo kijtosnekia ke miakej taixpejpenalmej kikauaskiaj Jiova? 2) ¿Keyej ueli tikijtouaj ke nejin tanojnots kinextia ke Jesús iniuan takuaujtamati taixpejpenalmej? (Xikonita taixkopin ipeujyan tamachtilis.)

¹³ ¿Kijtosnekia Jesús ke miakej taixpejpenalmej kikauaskiaj Dios uan monekiskia kintemoskej oksekin? Amo. Tikajsikamatiskej keyej komo titanemiliaj itech Mateo capítulo 24. Keman Jesús kinejmachtij takeual takuaujtamach maj amo mochiuani amo yolkuali, amo kijtojtoya ke panoskia nejon. Sayoj kinejmachtijtoya. Ika tanojnots kampa ininka motajtoua majtakti ichpochmej, Jesús no kinnejmachtijtok tokniuan taixpejpenalmej. Ijkon kemej makuil ichpochmej kiixpejpenkej mochiuaskej yektanemilianij uan makuil amo yektanemilianij, sejse tokniuj taixpejpenal kiixtalis ox kisentokas ijsatos oso kikauas Jiova. Pablo no ijkon kinnejmachtij iikniuan taixpejpenalmej (xikonixtajtolti Hebreos 6:4-9; no xikonita Deuteronomio 30:19). Pablo kinyekiluij tein monekia, sayoj ke no kiniluij ke takuaujtamatia ke amo keman kikauaskiaj Dios. Tein Jesús tanejmachtij ika tanojnots kampa ininka tajtoj majtakti ichpochmej kinextia ke yejua no iniuan takuaujtamati taixpejpenalmej. Kimati ke sejse uelis taxikos uan kiselis itaxtauil.

KENIUJ UELIS KISELISKEJ NEPALEUIL ‘OKSEKI ICHKAMEJ’

14. ¿Keyej ‘okseki ichkamej’ no uelis kiseliskej nepaleuil ika tanojnots tein kitemakak Jesús?

¹⁴ Tanojnots tein Jesús kitetapouij techmachtia se taman tein amo ouij: moneki tiksentokaskej tiijsatoskej. Uan maski ika nejin tanojnots kinmachtijtoya taixpejpenalmej, ‘okseki ichkamej’ no uelis kinpaleuis (Juan 10:16). ¿Keyej? Porin Jesús kijtoj: “Ten namechilia namejuan, no nikinilia nochi ten nouan yektakuautamatij: Xiixpetantokan” (tejuan tiktalilijkej cursivas; Mar. 13:37). Jesús kichia maj nochin itatojtokakauan kichiujtokan tein moneki uan maj ijsatokan. Uan nochin yejuan uelis kichiuaskej kemej taixpejpenalmej uan kitayekanaltiskej tanojnotsalis itech ininnemilis. Uan no, maj tikelnamikikan ke ichpochmej akin amo yektanemiliayaj kintajtanijkej aceite akin yektanemiliayaj. Maj amo keman tikchiuakan kemej akin amo yektanemiliayaj. Maj tikelnamikikan ke tisejsemej moneki timochikauaskej amo tikauaskej Dios, tikchiujtoskej tein moneki uan tiijsatoskej. Amo uelis tikchiaskej maj kichiuakan oksekin tein tejuan moneki tikchiuaskej. Jesús amo uejkaua ualas uan kiitas tein sejse kinamiki kiselis, uan sejse monekis tanankilis ika tein kichiuak. Yejua ika, moneki tiknextijtoskej ke tiijsatokej.

15. ¿Keyej techtelyolpaktia inenamiktilis Jesús nochin tiitatojtokakauan?

¹⁵ Nochin akin tikchiuaj kemej Cristo techtelyolpaktia nenamiktilis tein ika tajtoj Jesús itech tanojnots. Keman tamis Armagedón, taixpejpenalmej mochiuaskej inovia Cristo ne iluikak (Apoc. 19:7-9). Uan akin nemiskej nikan taltikpak no kinualkuilis tatiochiualismej. ¿Keyej? Porin nejon nenamiktilis kinyekmatiltia ke moajsis se tekiuajyot tein tel kuali taixyekanas. Yejua ika, komo titaixpejpenalmej oso komo amo, maj timochikauakan tikchiujtoskej tein moneki uan maj tiksentokakan tiijsatokan. Ijkon uelis tikitaskej ke mochiua nochi tein kualtsin tein Jiova motenkaua ke kiualkuis amo uejkaua.