¿Keniuj takamej uelis kintasojtaskej uan kintakachiuaskej ininsiuatsin?

1. ¿Keyej Jehová kiixtalij maj se takat uan se siuat monamiktikan?

JEHOVÁ yejua “Dios akin yolpaki” uan kineki maj no tiyolpakikan (1 Tim. 1:11). Techtayokoliani miak taman tein techyolpaktia (Sant. 1:17). Uan no yejua kiixtalij maj se takat uan se siuat monamiktikan. Keman se takat uan se siuat monamiktiaj motenkauaj motasojtaskej, motakachiuaskej uan moyekpiaskej. Uan semi yolpakij keman nochin omen tel kuali mouikaj (Prov. 5:18).

2. ¿Toni miakej takamej kinchiuiliaj ininsiuatsin?

² Axkan miakej takamej uan siuamej amo kisentokaj motasojtaj nion motakachiuaj ijkon kemej motenkaujkej keman monamiktijkej, uan yejua ika amo yolpakij. Organización Mundial de la Salud kitematiltij ke miakej takamej kinteuiaj ininsiuatsin, kiniluiaj tein kinyolkokoua oso kinchiuiliaj okseki taman tein ika kintajyouiltiaj. Xa teixtenoj kinextiaj ke kintasojtaj, sayoj ke keman amo akin kinitstok amo ijkon kichiuajok. Uan miakej takamej kiitaj pornografía uan nejon kichiua maj ininsiuatsin semi moyolkoko.

3. ¿Keyej seki takamej kintajyouiltiaj ininsiuatsin?

³ ¿Keyej seki takamej kintajyouiltiaj ininsiuatsin? Xa inintat semi tateuiaya, uan yejua ika kinemiliaj ke nejon kuali yetok. Uan okseki takamej kintajyouiltiaj ininsiuatsin porin kampa nemij, takamej ipa ijkon kichiuaj. Yejuan xa kinemiliaj ke moneki kinajuaskej ininsiuatsin para maj kimatikan ke yejuan kimatij kalijtik. Oso oksekin amo kinmachtijkej ke amo moneki niman kualaniskej. Uan kemej seki takamej kiitaj pornografía kinemiliaj ke siuamej sayoj para iniuan motekaskej. Uan no, miakej motelmachtianij kiitanij ke keman momoyaujtoya ueyi kokolis COVID-19, okachi miakej takamej peuak kintajyouiltiaj ininsiuatsin. Maski ijkon, se takat amo keman monekiskia kichiuilis tein amo kuali isiuatsin.

4. ¿De toni moneki kipiaskej cuidado tokniuan takamej, uan keyej?

⁴ Tokniuan takamej moneki kipiaskej cuidado uan amo kinitaskej siuamej kemej kichiuaj akin amo kitekitiliaj Jehová.a ¿Keyej? Porin miakpa tein aksa kinemilia yejua tein kichiua. Maj tiknemilikan tein Pablo monekik kinnejmachtis tokniuan taijitalmej akin mosentiliayaj Roma. Tepitsin satepan ke mochiuak nejon nechikol, yejua kiniluij: “Amo xiksentokakan xikchiujtokan kemej kichiuaj akin axkan nemij” (Rom. 12:​1, 2). Nejin kinextia ke sekin kisentokayaj tanemiliayaj uan kichiuayaj kemej momattoyaj akin amo kitekitiliayaj Dios. Yejua ika, Pablo kiniluij ke monekia kipataskej kemej tanemiliayaj uan tein kichiuayaj. Axkan, nejon tajtolmej no moneki kitakamatiskej tokniuan takamej. Sayoj ke seki tokniuan takamej no peua tanemiliaj kemej akin amo kitekitiliaj Dios, uan hasta no kintajyouiltianij ininsiuatsin.b ¿Keniuj kineki Jehová maj mouikakan iniuan ininsiuatsin? Kineki maj kichiuakan tein kijtoua texto kampa mokixtia nejin tamachtilis.

5. Kemej kijtoua 1 Pedro 3:​7, ¿keniuj takamej moneki mouikaskej iniuan ininsiuatsin?

⁵ (Xikonlero 1 Pedro 3:7). Jehová kinnauatia takamej maj kinpatiuitakan ininsiuatsin. Keman tikpatiuitaj aksa tiknextiaj ke tiktakachiuaj uan yejua ika kuali iuan timouikaj. Uan se takat kinextia ke kipatiuita isiuatsin keman kualtakat iuan uan kitasojta. Itech nejin tamachtilis tikitaskej seki taman tein uelis kichiuas takat para kinextis ke kitakachiua isiuatsin. Sayoj ke achto tikitaskej toni ueliskia kiyolkokos isiuatsin.

AMO XIKONCHIUA TEIN SEMI KIYOLKOKOS MOSIUATSIN

6. ¿Keniuj momachilia Jehová keman se takat kiteuia isiuatsin? (Colosenses 3:19).

⁶ Takat amo moneki kiteuis isiuatsin. Jehová kintauelita akin tateuiaj (Sal. 11:5). Uan okachi amo kiyolpaktia maj se takat kiteui isiuatsin (Mal. 2:16; xikonlero Colosenses 3:19). Kemej kijtoua 1 Pedro 3:​7, texto kampa mokixtia nejin tamachtilis, komo se takat kiteuia isiuatsin amo kuali mouikasok iuan Jehová. Uan xa Dios nion kikakis keman kitataujtis.

7. Kemej kijtoua Efesios 4:​31, 32, ¿toni moneki amo kichiuaskej takamej iniuan ininsiuatsin? (No xikonita “Tein okachi momelaua”).

⁷ Takat amo moneki kitsatsajtsilis isiuatsin. Seki takamej semi kinajuaj ininsiuatsin uan kiniluiaj tein semi kinyolkokoua. Jehová nion tepitsin kiyolpaktia maj aksa tel kualantinemi, maj tauelmiktinemi, maj tetsatsajtsili oso maj kijto tajtolmej tein teyolkokos,c ijkon kemej kijtoua Efesios 4:​31, 32 (xikonlero). Jehová kikaki nochi uan kiita keniuj se takat kinojnotsa isiuatsin hasta keman amo akin kinitstok. Se takat akin kichikaujkanojnotsa isiuatsin amo kuali mouikaok iuan, uan nion no iuan Dios (Sant. 1:26).

8. ¿Keniuj momachilia Jehová keman aksa kiita pornografía, uan keyej?

⁸ Takat amo moneki kiitas pornografía. Jehová nion tepitsin kiyolpaktia maj aksa kiita pornografía. Komo se takat kiita nejon tein pitsotik, kichiua maj amo kuali mouikaok iuan Dios uan amo kitakachiua isiuatsin.d Jehová kichia maj takat amo kikajkayaua isiuatsin iuan okse siuat, amo sayoj ika tein kichiua ta no ika tein kinemilia. Jesús kijtoj ke komo se takat kiita okse siuat porin kineki iuan motekas, “iyolijtik auilnemikya iuan” (Mat. 5:​28, 29).e

9. ¿Keyej Jehová kitauelita maj se tokniuj kichikaujkaui isiuatsin maj kichiua tein amo kineki keman mosentekaj?

⁹ Takat amo moneki kichikaujkauis isiuatsin maj kichiua tein amo kineki keman mosentekaj. Seki takamej kinchikaujkauiaj ininsiuatsin maj kichiuakan tein amo kinekij keman mosentekaj, tein kichiua maj amo kuali momachilikan ininsiuatsin oso ke amo semi kintasojtaj. Jehová amo kiyolpaktia maj se takat kichiua nejon, porin kinextia ke sayoj itech tanemilia uan amo kitakachiua isiuatsin. Yejua kichia maj takamej kintasojtakan ininsiuatsin, maj kualtakamej iniuan uan maj amo kinchiualtikan tein kinkuejmolos inintanemilil (Efes. 5:​28, 29). ¿Toni uelis kichiuas se tokniuj takat komo kichiuani teisa tein ika titajtojkej itech nejin subtítulo? ¿Toni uelis kichiuas para kipatas tein kinemilia uan tein kichiua?

¿TONI KIPALEUIS TAKAT MAJ AMO KICHIUILIOK TEIN AMO KUALI ISIUATSIN?

10. ¿Toni uelis kinmachtis takamej tein Jesús kichiuaya?

¹⁰ ¿Toni uelis kipaleuis se tokniuj maj amo kiyolkokook isiuatsin uan maj kitakachiua? Moneki mochikauas kichiuas kemej Jesús. Maski yejua amo keman monamiktij, tel kuali mouikak iniuan imomachtijkauan uan nejon kinnextilia takamej keniuj no uelis ijkon kichiuaskej (Efes. 5:25). Maj tikitakan keniuj Jesús mouikaya iniuan itatitaniluan, keniuj kinnojnotsaya uan keniuj takamej akin monamiktijkejya no uelis ijkon kichiuaskej.

11. ¿Keniuj Jesús mouikak iniuan itatitaniluan?

¹¹ Jesús nochipa kuali kinnojnotsaya itatitaniluan uan kintakachiuaya. Amo keman kinchiuilij tein amo kuali. Maski katka ininTekotsin, amo keman kikuik ichikaualis para kinmojmoujtis, ta katka yolyemanik uan hasta kinpaleuiaya ika seki taman (Juan 13:​12-17). Kiniluij imomachtijkauan: “Ximokauakan maj namechmachti, porin niyolnejmach uan niyolyemanik uan ijkon nanyolseuiskej” (Mat. 11:​28-30). Akin yolnejmach xa moitas ke amo chikauak, sayoj ke tein melauj ueli motsakuilia uan kipaleuia maj yolseujto keman ueliskia kualanis.

12. ¿Keniuj Jesús kinnojnotsaya oksekin?

¹² Keman Jesús kinnojnotsaya oksekin kinyolchikauaya uan kiniluiaya tein kichiuaskia maj kuali momachilikan. Amo keman kintauelnojnotsak imomachtijkauan (Luc. 8:​47, 48). Uan maski oksekin kijijtojkej uan kitemojkej kikualantiskej, “yejua amo kinuijuikaltij” (1 Ped. 2:​21-23). Uan kemansa kiixtaliaya amo teyi kinnankilis (Mat. 27:​12-14). ¡Tel kuali tein Jesús kinnextilij tokniuan takamej!

13. ¿Keniuj se takat kinextia ke ‘nemi iuan isiuatsin’? (Mateo 19:​4-6 uan nota; no xikonita taixkopin).

¹³ Jesús kiniluij takamej maj amo kikajkayauakan ininsiuatsin iuan okse siuat. Kijtoj nejin tein iTajtsin kijtojka: “Takat […] nemis [oso mosentilis] iuan isiuatsin” (xikonlero Mateo 19:​4-6 uan nota). Tajtol griego tein motajtolkepa kemej “mosentilis” kijtosneki “pepechiujtos”. Nejin kijtosneki ke se takat iuan isiuatsin moneki kemej yeskia tel pepechiujtoskej porin semi motasojtaj. Komo semej kichiua tein kiyolkokoua okse, nochin omen tajyouiaj. Se takat akin kiteltasojta isiuatsin senkis kiixtopeua pornografía. Nimantsin moixijkuania para amo kiitas “tein amo kualtia” (Sal. 119:37). Ijkon kemej Job, senkis kiixtalia amo kiitas se siuat uan kinemilis iuan auilnemis (Job 31:1).

14. ¿Toni moneki kichiuas takat para uelis oksepa kuali mouikas iuan Jehová uan isiuatsin?

¹⁴ Uan no, se takat akin kiteuia isiuatsin oso kiyolkokoua ika tein kiluia, moneki kichiuas seki taman para uelis oksepa kuali iuan mouikas uan no iuan Jehová. ¿Toni moneki kichiuas? Se, moneki kiajsikamatis ke amo kuali tein kichiua. Jehová kikaki nochi tein kijtoua uan kiita tein kichiua (Sal. 44:21; Ecl. 12:14; Heb. 4:13). Ome, amo moneki kisentokas kitajyouiltis isiuatsin uan kipatas tein kichiua (Prov. 28:13). Eyi, moneki kiluis isiuatsin uan no Jehová ke tel amo kuali tein kichiuak uan kintajtanis maj kitapojpoluikan (Hech. 3:19). Moneki kitataujtis Jehová maj kipaleui para kipatas tein kinemilia, tein kijtoua uan tein kichiua, uan maj kineki mopatas (Sal. 51:​10-12; 2 Cor. 10:5; Filip. 2:13). Naui, moneki kichiuas ijkon kemej motataujtia uan kiixtopeuas tein yeski tateuilis uan amo kijtosok tein teyolkokoj (Sal. 97:10). Makuil, moneki niman kitemos maj kipaleuikan tayekananij itech nechikol (Sant. 5:​14-16). Uan chikuasen, kiixtalis toni kichiuas para maj amo oksepa kiyolkoko isiuatsin. Tetakauj akin kiita pornografía no moneki kichiuas nejin chikuasen taman. Jehová kipaleuis maj mopata (Sal. 37:5). Se tokniuj takat amo sayoj moneki maj amo kiyolkoko isiuatsin, ta no moneki kipatiuitas. Maj tikitakan keniuj uelis ijkon kichiuas.

¿KENIUJ TAKAT UELIS KIPATIUITAS ISIUATSIN?

15. ¿Keniuj se takat uelis kinextilis isiuatsin ke kitasojta?

¹⁵ Maj kinextili ke kitasojta. Seki takamej akin semi yolpakij iniuan ininsiuatsin, nochipa kitemouaj kinnextiliskej ke semi kintasojtaj (1 Juan 3:18). Se tokniuj takat uelis kinextilis isiuatsin ke kitasojta ika seki taman tein amo ouij, kemej kimakitskis oso kinauas. Xa no uelis kitajkuilouilis uan kiluis “Nimitstemoua” oso “¿Keniuj tietok?”. Kemansa uelis kijkuilouilis se amatsin kampa kiluis ke semi kitasojta. Keman se takat kichiua nejin, kinextia ke kipatiuita isiuatsin uan okachi kuali mouikaj.

16. ¿Keyej takat moneki kiluis isiuatsin ke kitasojkamatilia?

¹⁶ Maj kinextili ke kipatiuita uan kitasojkamatilia. Se takat kipatiuita isiuatsin keman kiluia keyej kitasojkamatilia uan keman kichiua maj kuali momachili. Xa keman nochipa kitasojkamatilia isiuatsin porin semi kipaleuia (Col. 3:15). Keman se takat kiluia isiuatsin keyej kitasojta, yejua kuali momachilia, kimati ke kitasojtaj uan kipatiuitaj (Prov. 31:28).

17. ¿Keniuj takat uelis kinextilis isiuatsin ke kitakachiua?

¹⁷ Maj kualtakat iuan uan maj kitakachiua. Se takat akin kitasojta isiuatsin kiita kemej teisa tein kualtsin uan semi patiyoj tein Jehová kitayokolij (Prov. 18:22; 31:10). Yejua ika kualtakat iuan, kiyekpia uan kitakachiua hasta keman mosentekaj. Amo kichikaujkauia maj kichiua tein amo kineki keman mosentekaj oso tein kichiuas maj amo kuali momachili uan maj kikuejmolo itanemilil.f Uan takat amo no kichiuas nion teyi tein uelis kikuejmolos itanemilil keman mosentekaskej (Hech. 24:16).

18. ¿Toni moneki kiixtaliskej kichiuaskej takamej? (No xikonita recuadro “Naui taman kemej uelis tikontakachiuas mosiuatsin”).

¹⁸ Tokniuan takamej, xikyekmatikan ke Jehová kiita uan kipatiuita nochi tein nankichiuaj para nankinextiliskej namosiuatsin ke nankitakachiuaj. Xikixtalikan amo nankichiuaskej nion teyi tein kiyolkokos namosiuatsin, xikualtakamej iuan, xiktakachiuakan uan xiknextilikan ke nankitasojtaj. Ijkon nankinextiskej ke nankipatiuitaj uan nankitasojtaj. Komo nankitakachiuaj namosiuatsin, kisentokas kuali namouikaskej iuan Jehová, uan yejua nejon tein okachi moneki (Sal. 25:14).