¿Keniuj uelis titetapojpoluiskej kemej Jehová kichiua?

1, 2. 1) ¿Kemanian uelis techouijmakas titetapojpoluiskej? 2) ¿Keniuj kinextij Denise ke tetapojpoluij?

¿MITSONOUIJMAKA niman tiontetapojpoluis? Timiakej ijkon techpanoua uan okachiok keman techiluiaj oso techchiuiliaj teisa tein semi techyolkokoua. Sayoj ke uelis tikchiuaskej seki taman tein techpaleuis maj amo tikualantokanok nion maj timoyolkokojtokan uan maj titetapojpoluikan. Maj tikitakan tein kipanok se tokniuj akin monotsa Denise,a yejua kinextij ke yekmelauj tetapojpoluij. Itech xiuit 2017, Denise uan ichankauan yajkaj takalpanotoj itech yankuik kali kampa kinixyekanaj itaixpantijkauan Jehová. Keman mokepayajya itech inincarro, se takat sepasan kintopeujtikis ika icarro. Denise ixtayouak uan keman ixpetanik kiluijkej ke ikoneuan semi mokokojkaj uan ke itakatsin Brian, momikilijka. Denise kijtoua keniuj momachiliaya: “Semi nitayokoxtoya uan amo nikmatia toni nikchiuas”. Satepan kimatik ke takatsin amo kinteloj porin motauantijka oso modrogarojka, nion porin kiitstiaya icelular oso okse taman. Yejua ika Denise kitataujtij Jehová maj kiyolseuiani uan maj kipaleuiani maj amo kitauelitsto nejon takat.

² Takat akin kinteloj kikitskijkej uan kiuikakej kampa kiitaskiaj toni kichiuiliskiaj porin amo kipiak cuidado uan temiktij. Komo juez kiitaya ke kinamikia, kitsakuaskiaj. Se policía akin ompa tekitia kiluij Denise ke ika tein kijtoskia moixtaliskia ox kitsakuaskiaj nejon takat oso amo. Yejua kijtoua: “Keman oksepa nikelnamikik tein techpanoka, nikmachilij kemej yeskia kiixtaposkiaj uan kiixtemiliskiaj miak istak kampa nimotekik”. Seki semanas satepan, Denise yetoya ininixpan tekiuanij para kijtos tein kinpanok, uan ompa no takaktoya takat akin semi kintajyouiltijka yejua uan ichankauan. ¿Toni kijtoj Denise? Kiluij juez maj kiikneliani nejon takat.b Keman Denise tamitajtoj, juez peuak choka uan kiluij: “Nitekitini kemej juez 25 xiujmejya uan amo keman nikakini teisa kemej nejon. Techankauan amo keman tajtanij maj kiiknelikan akin tetajyouiltia. Amo keman nikakini maj aksa kinexti ke semi tetasojta uan tetapojpoluia”.

3. ¿Keyej Denise uelik tetapojpoluij?

³ ¿Keyej Denise uelik tetapojpoluij? Itech tanemilij keniuj Jehová tetapojpoluia (Miq. 7:18). Komo semi tiktasojkamatiliaj Jehová maj techtapojpolui, techpaleuis maj no tiknekikan tikintapojpoluiskej oksekin.

4. ¿Toni kineki Jehová maj tikchiuakan? (Efesios 4:32).

⁴ Jehová kineki maj titetapojpoluikan ijkon kemej yejua techtapojpoluia (xikonlero Efesios 4:32). Jehová kineki maj tikintapojpoluikan akin techyolkokouaj (Sal. 86:5; Luc. 17:4). Itech nejin tamachtilis tikitaskej eyi taman tein techpaleuis maj titetapojpoluikan.

XIKONTEMO MAJ AMO KISENTOKA IJKON XIONMOMACHILI

5. ¿Keniuj xa timomachiliskej keman aksa techyolkokos? (Proverbios 12:18).

⁵ Xa aksa kijtos oso kichiuas teisa tein semi techyolkokos, uan okachiok techyolkokos komo techchiuilia se totasojikniuj oso se tochankauj (Sal. 55:​12-14). Kemansa semi tikualaniskej oso timoyolkokoskej uan tikmachiliskej kemej yeskia techtsoponiskiaj ika se tepos (xikonlero Proverbios 12:18). Uan xa tiknekiskej ijkon tikauaskej oso amo tikijtoskej tein tikmachiliaj. Sayoj ke komo ijkon tikchiuaskiaj kemej yeskia tikauaskiaj maj totech tokto se cuchillo uan amo tikixtiskiaj. Komo amo teyi tikchiuaj para tiyolseuiskej tiksentokaskej fiero timomachiliskej.

6. ¿Toni kemansa niman tikchiuaj keman techyolkokouaj?

⁶ Keman aksa techyolkokoua xa niman tikualantikisaj. Biblia kijtoua ke kemansa ipa ijkon techpanos. Sayoj ke no technejmachtia ke amo moneki uejkauak tikualantoskej (Sal. 4:4; Efes. 4:26). ¿Keyej? Porin kemansa tein tikmachiliaj yejua tein tikchiuaj, uan keman tikualanij ueliskia tikchiuaskej tein amo kuali (Sant. 1:20). Xikonelnamiki ke keman aksa techchiuilia teisa xa ipa tikualanij, sayoj ke tejuan tikmatij ox tiksentokaskej tikualantoskej oso amo.

7. ¿Keniuj no timomachiliaj keman techchiuiliaj tein amo kuali?

⁷ Keman techchiuiliaj tein amo kuali, no peua tel amo kuali timomachiliaj. Se tokniuj akin monotsa Ann, kijtoua: “Keman katka nipiliok, nopaj kikauak nomaj uan monamiktij iuan siuat akin achto kitaxtauiayaj para maj nechyekpia. Nikmachilij ke nechsenkaujkaj. Uan keman yejuan kinpiakej ininkoneuan, nikmachiliaya ke nechixpatakej. Nochipa niknemiliaya ke amo akin nechtasojtaya”. Se tokniuj siuat akin monotsa Georgette kijtoua keniuj momachiliaya keman kimatik ke itakatsin kikajkayaujka iuan okse siuat. Kijtoua: “Kualtsin timouikayaj desde ke katka tipilimejok. No tisentapaleuiayaj kemej precursores. Yejua ika semi nechyolkokoj”. Se tokniuj siuat akin monotsa Naomi, kijtoua: “Amo keman niknemilij ke notakatsin nechyolkokoskia. Keman nechiluij ke ichtaka kiitstoya pornografía, nikmachilij ke nechkajkayaujtoya”.

8. 1) ¿Keyej moneki titetapojpoluiskej? 2) ¿Keniuj techpaleuia komo titetapojpoluiaj? (Xikonita recuadro “¿Uan komo tein nechchiuilijkej nechmojkakalakij?”).

⁸ Tejuan amo ueli tiktsakuiliaj tein kijtouaj oso tein kichiuaj oksekin, sayoj ke tejuan tikmatij toni tikchiuaskej keman panos nejon. Uan miakpa, xa monekis maj titetapojpoluikan. ¿Keyej? Porin tiktasojtaj Jehová uan yejua kineki maj ijkon tikchiuakan. Uan no, komo tiksentokaj tikualantokej uan amo titetapojpoluiaj, uelis tikchiuaskej teisa tein amo kuali uan hasta tejuan timokokolispeualtiskej (Prov. 14:​17, 29, 30). Maj tikitakan tein kijtoua se tokniuj siuat akin monotsa Christine. Yejua kijtoua: “Keman nimoyolkokojtok amo semi niuetska, nikua tein amo nechpaleuia uan amo niyekkochi. Uan kemej nikualani kichiua maj amo kuali nimouikaok iuan notakauj uan iniuan oksekin”.

9. ¿Keyej amo moneki tiksentokaskej tikualantoskej?

⁹ Uan komo akin techyolkokoj amo keman techtajtania maj tiktapojpoluikan, uelis tikchiuaskej teisa tein techpaleuis maj amo tiksentokakan timoyolkokojtokan. Georgette, akin ika titajtojkej itech párrafo 7, kijtoua: “Uejkauak nikualantoya uan niktauelitstoya akin katka notakauj, sayoj ke ipa uelik niktapojpoluij. Keman ijkon nikchiuak, kuali nimomachilij uan niyolseuik”. Keman amo tiksentokaj tikualantokej, kuali timouikaj iniuan oksekin. No semi techpaleuia keman titetapojpoluiaj porin tikelkauaj uan oksepa tiyolpakij (Prov. 11:17). ¿Toni uelis tikonchiuas komo tikonmachilia ke ayamo ueli tiontetapojpoluia? Maj tikitakan ojpatika taman.

AMO XIONKUALANTOOK NION XIONMOYOLKOKOJTOOK

10. ¿Keyej moneki tikauaskej maj pano tiempo para oksepa kuali timomachiliskej? (No xikonita taixkopimej).

¹⁰ ¿Toni mitsonpaleuis amo xionkualantook nion xionmoyolkokojtook? Yekinika, xikonkaua maj pano tepitsin tiempo. Keman aksa kipanoua teisa uan motelkokoua, satepan ke kipajtiaj moneki panos tiempo para yekpajtis. No ijkon tejuan, moneki tikauaskej maj pano tiempo para kuali timomachiliskej uan uelis titetapojpoluiskej ika nochi toyolo (Ecl. 3:3; 1 Ped. 1:22).

11. ¿Keniuj komo tiktataujtiaj Jehová techpaleuis maj titetapojpoluikan?

¹¹ Ojpatika, xikontataujti Jehová maj mitsonpaleui xiontetapojpolui.c Ann, akin ika titajtojkej itech párrafo 7, kijtoua keniuj kipaleuij keman motataujtiaya. Yejua kijtoua: “Niktataujtiaya Jehová maj techtapojpolui nejua uan nochankauan komo teisa amo tikyekchiujkej. Satepan, niktajkuilouilij nopaj uan isiuatsin uan nikiniluij ke nikintapojpoluijkaya”. Maski Ann kiouijmakak kichiuas nejin, kijtoua: “Kemej nimochikauak nitetapojpoluis kemej Jehová kichiua, nikchia maj nopaj uan isiuatsin kinekikan momachtiskej Biblia”.

12. ¿Keyej moneki titakuaujtamatiskej iuan Jehová uan amo itech tein tejuan tiknemiliaj ke okachi kuali? (Proverbios 3:​5, 6).

¹² Expatika, xiontakuaujtamati ke tein Jehová kijtoua yejua tein okachi kuali uan amo tein tejuatsin tikonmachilia (xikonlero Proverbios 3:​5, 6). Jehová nochipa kimati toni okachi techpaleuis (Is. 55:​8, 9). Yejua amo keman techiluis maj tikchiuakan teisa tein techijtakos. Yejua ika, keman techiluia maj titetapojpoluikan uelis tikneltokaskej ke nejon techpaleuis (Sal. 40:4; Is. 48:​17, 18). Sayoj ke komo tiknemiliaj ke tejuan tikmatij toni okachi kuali, xa amo keman titetapojpoluiskej (Prov. 14:12; Jer. 17:9). Naomi, akin ika titajtojkej itech párrafo 7, kijtoua: “Niknemiliaya ke amo kinamikia maj niktapojpolui notakatsin porin kiitaka pornografía. Nikmouiliaya maj oksepa nechyolkoko oso maj kielkauani ke semi nechtajyouiltijka. Uan nochipa nimotenpaleuiaya ke Jehová nechajsikamatia. Sayoj ke satepan nikajsikamatik ke maski Jehová kimatia keniuj nimomachilia, amo kijtosnekia ke kiyolpaktiaya tein nikchiujtoya. Yejua kimati keniuj nimomachilia uan ke moneki maj pano tiempo para oksepa niyolpakis, sayoj ke kineki maj nitetapojpolui”.d

XIKONCHIUA TEIN MITSONPALEUIS KUALI XIONMOMACHILI

13. Kemej kijtoua Romanos 12:​18-21, ¿toni moneki tikchiuaskej?

¹³ Keman tiktapojpoluiaj aksa akin semi techyolkokoj amo tikchiuaj porin amo tiknekij ika titajtoskejok tein panok, ta tikchiuaj porin tiknekij tiksentokaskej kuali iuan timouikaskej. Okachiok komo techyolkokoj se tokniuj (Mat. 5:​23, 24). Amo tiknekij tiksentokaskej tikualantoskej, ta tiknekij titeikneliskej uan titetapojpoluiskej (xikonlero Romanos 12:​18-21; 1 Ped. 3:9). ¿Toni techpaleuis maj ijkon tikchiuakan?

14. ¿Toni moneki timochikauaskej tikchiuaskej, uan keyej?

¹⁴ Jehová sayoj kiita tein kuali tein aksa kichiua. Uan tejuan moneki timochikauaskej no ijkon tikchiuaskej uan tikitaskej sayoj tein kuali tein kichiua akin techyolkokoj (2 Crón. 16:9; Sal. 130:3). Komo tiktemouaj tikajsiskej tein amo kuali tein aksa kichiua, ipa tikajsiskej. Sayoj ke komo no tiktemouaj tein kuali tein kichiua, no tikajsiskej. Tejuan tikmatij toni tiknekij tikitaskej. Komo tikitaj tein kuali tein kichiua, okachi niman tiktapojpoluiskej. Maj tikitakan tein kichiua se tokniuj akin monotsa Jarrod. Yejua kijtoua: “Okachi ijsiujka niktapojpoluia se tokniuj keman niknemilia nochi tein kuali tein kichiua uan amo sayoj itech nitanemilia tein amo kuali tein kichiua”.

15. ¿Keyej semi kuali komo tikoniluia akin mitsonyolkokoj ke tikontapojpoluijya?

¹⁵ No uelis tikiluiskej akin techyolkokoj ke tiktapojpoluijkejya. ¿Keyej moneki ijkon tikchiuaskej? Maj tikitakan tein kijtoua Naomi: “Notakatsin nechtajtanij ‘¿Tinechtapojpoluijya?’. Keman nimotentapoj para nikiluis ‘Nimitstapojpoluia’, amo uelik nikiluij. Nikitak ke ayamo niktapojpoluiaya. Monekik panosok tiempo para nikiluis ke yekmelauj niktapojpoluijkaya. Keman niktapojpoluij, notakatsin hasta chokak uan nejua semi niyolseuik uan kuali nimomachilij. Satepan oksepa peuak iuan nitakuaujtamati, uan axkan oksepa tel kualtsin timouikaj”.

16. Ijkon kemej timomachtijkejya, ¿toni techpaleuis maj titetapojpoluikan?

¹⁶ Jehová kineki maj titetapojpoluikan (Col. 3:13). Maski ijkon, kemansa techouijmakas tikchiuaskej. Uelis titetapojpoluiskej komo tikchiuaj tein tikitakejya: maj tiktemokan maj amo kisentoka ijkon timomachilikan, maj amo tikualantokanok nion maj timoyolkokojtokanok, uan maj tikchiuakan tein techpaleuis maj kuali timomachilikan (xikonita recuadro “Eyi taman tein mitsonpaleuis xiontetapojpolui”).

XIKONNEMILI KENIUJ MITSONPALEUIA KOMO TIONTETAPOJPOLUIA

17. ¿Keniuj techpaleuia komo titetapojpoluiaj?

¹⁷ Onkak miak taman tein kinextia ke semi moneki maj titetapojpoluikan. Maj tikitakan seki. Yekinika, tikyolpaktiaj toTajtsin Jehová uan tikchiuaj kemej yejua, akin semi teiknelia (Luc. 6:36). Ojpatika, tiknextiaj ke tiktasojkamatiliaj Jehová porin nochipa techtapojpoluia (Mat. 6:12). Uan expatika, okachi tipaktokej uan semi kuali timouikaj iniuan oksekin.

18, 19. ¿Toni uelis panos komo titetapojpoluiaj?

¹⁸ Uelis panos miak taman tein kuali komo titetapojpoluiaj. Maj tikitakan tein kipanok Denise, akin ika titajtojkej ipeujyan tamachtilis. Yejua amo kimatia ke takat akin kitopeujka inincarro kinemiliaya momiktis satepan ke juez kimelauaskia. Nejon takat semi motasojkamatik maj Denise kitapojpoluiani, yejua ika kinekik momachtis Biblia.

¹⁹ Tejuan xa semi techouijmakas tiktapojpoluiskej aksa, sayoj ke amo nenkaj yeski komo ijkon tikchiuaj (Mat. 5:7). Yejua ika maj timochikauakan tikchiuaskej kemej Jehová uan maj yekmelauj titetapojpoluikan.