¿Keniuj uelis kuali techyolmajxitiskej?

1. ¿Toni moneki tikchiuaskej para maj kuali kisa tein tikixpejpenaj? (Proverbios 13:10; 15:22).

TINOCHIN tiknekij maj kuali kisa tein tikixpejpenaj. Biblia kijtoua ke para kuali titaixpejpenaskej moneki maj aksa techyolmajxiti (xikonlero Proverbios 13:10; 15:22).

2. ¿Toni techiluia Jehová ke kichiuas?

² Sayoj toTajtsin Jehová okachi kuali techyolmajxitia. Yejua ika moneki tiktataujtiskej para maj techpaleui maj timochiuakan titamatinij. Yejua techiluia nejin: “Nimitsitstos para nimitsyekpias uan nimitsyolmajxitis” (Sal. 32:8). Nejin kijtosneki ke Jehová nochipa techitstok para techyolmajxitis keman moneki uan techpaleuis maj tikchiuakan tein techyolmajxitia.

3. ¿Toni tiknankiliskej itech nejin tamachtilis?

³ Itech nejin tamachtilis tiknankiliskej ika Biblia naui taman tein xa timotajtaniskej: 1) “¿Toni moneki niknextis para maj nechpaleui tein nechyolmajxitiaj?”, 2) “¿Akoni uelis kuali nechyolmajxitis?”, 3) “¿Keniuj uelis niknextis ke yekmelauj nikneki maj nechyolmajxitikan?” uan 4) “¿Keyej amo moneki nikintajtanis oksekin maj nechiluikan toni moneki maj nikchiua?”.

“¿TONI MONEKI NIKNEXTIS?”

4. ¿Toni moneki tikchiuaskej para maj techpaleui tein Biblia techyolmajxitia?

⁴ Moneki maj tiyolyemankej para techpaleuis tein techyolmajxitiskej. Maj tikelnamikikan ke para kuali titaixpejpenaskej moneki maj techyolmajxiti aksa akin kipanokya tein tejuan techpanotok uan no moneki tikelnamikiskej ke amo nochi tikmatij. Komo amo tiyolyemankej Jehová amo uelis techpaleuis, uan keman tikleroskej Biblia amo tikitaskej ke moneki tikchiuaskej tein ompa techyolmajxitia (Miq. 6:8; 1 Ped. 5:5). Sayoj ke komo tiyolyemankej tiknekiskej tikakiskej uan tikchiuaskej nochi tein techyolmajxitia Biblia.

5. ¿Keyej David ueliskia moueyimatis?

⁵ Maj tikitakan keniuj uelis techpaleuis tein kichiuak tekiuaj David. Maski uelia kichiuaya miak taman yejua katka yolyemanik. Miak xiujmej achto ke mochiuaskia tekiuaj, miakej kiixmatiaj ke tel kuali tatsotsonaya uan hasta tatsotsonaya para tekiuaj Saúl (1 Sam. 16:​18, 19). Keman Jehová kiixpejpenak David para maj satepan yejua tekiuajtini, kimakak ichikaualis para kichiuas tein monekiskia (1 Sam. 16:​11-13). Miakej kiueyitaliayaj porin kinmiktijka tel miakej akin taixnamikiaj, uan semej katka ueyi takat Goliat (1 Sam. 17:​37, 50; 18:7). Komo David moueyimatiskia ueliskia kinemilis ke kemej uelia kichiuaya miak taman, amo monekia maj nion akin kiyolmajxiti. Sayoj ke yejua katka yolyemanik.

6. ¿Keniuj tikmatij ke David kikakia keman oksekin kiyolmajxitiayaj? (No xikonita taixkopin ).

⁶ Keman David mochiuak tekiuaj, peuak kuali iniuan mouika akin ueliskia kiyolmajxitiskej (1 Crón. 27:​32-34). Uan no, achto ke mochiuaskia tekiuaj, ipa kikakia akin kuali kiyolmajxitiaya. Yejua amo sayoj kikakia keman kiyolmajxitiayaj takamej, ta no keman kiyolmajxitij se siuat akin monotsaya Abigaíl. Itakauj nejon siuat katka Nabal akin semi moueyimatia, amo motasojkamatia uan amo kinpoujkaitaya oksekin. Sayoj ke David katka yolyemanik uan kikakik tein kiluij Abigaíl, nejon kipaleuij maj amo kichiua tein tel amo kuali (1 Sam. 25:​2, 3, 21-25, 32-34).

7. ¿Toni techmachtia tein kichiuak David? (Eclesiastés 4:13; no xikonita taixkopimej).

⁷ ¿Toni techmachtia tein kichiuak David? Ke maski tiueliskej tikchiuaskej miak taman oso tikpiaskej se tekit tein motelneki, amo moneki tiknemiliskej ke tikmatijya nochi uan ke amo akin moneki techyolmajxitis. No moneki tikakiskej akin yeski akin kuali techyolmajxitis (xikonlero Eclesiastés 4:13). Komo tikchiuaj kemej David amo tikchiuaskej tein amo kuali tein techijtakos tejuan uan oksekin.

“¿AKONI UELIS KUALI NECHYOLMAJXITIS?”

8. ¿Keyej Jonatán ueliskia kuali kiyolmajxitis David?

⁸ Maj tikitakan okse taman tein techmachtia tein David kichiuak. Yejua kiniluiaya maj kiyolmajxitikan akin kuali mouikayaj iuan Jehová uan kuali kiajsikamatiaj toni ouijkayot kipanotoya. Keman David kinekia kimatis ox tekiuaj Saúl kinextiaya ke kinekia oksepa kuali iuan mouikas, kitajtanij Jonatán akin katka iokichpil tekiuaj maj kiyolmajxiti. ¿Keyej Jonatán ueliskia okachi kuali kiyolmajxitis? Porin yejua tel kuali mouikaya iuan Jehová uan kuali kiixmatia Saúl (1 Sam. 20:​9-13). ¿Keniuj uelis tikchiuaskej kemej David?

9. Komo moneki maj techyolmajxitikan, xikonijto kemej akoni uelis techyolmajxitis (Proverbios 13:20).

⁹ Keman monekis maj aksa techyolmajxiti, moneki tikiluiskej 1) akin kuali mouika iuan Jehová uan 2) akin kuali kiajsikamati tein techpanotok (xikonlero Proverbios 13:20).a Maj tiknemilikan ke se tokniuj okichpil kineki monamiktis. ¿Akoni uelis kuali kiyolmajxitis? Xa aksa akin ayamo monamiktia kuali kiyolmajxitis komo kiluia tein kijtoua Biblia. Sayoj ke okichpil okachi kipaleuis komo kiyolmajxitia se tokniuj takat uan isiuatsin akin kuali iniuan mouika uan kitekitilijtokej Jehová miak xiujmejya. Yejuan amo sayoj kiluiskej keniuj kichiuas tein kijtoua Biblia, ta no tein kinpanouani.

10. ¿Toni no timomachtiskej?

¹⁰ Tikitakejya tein moneki tiknextiskej uan akoni uelis okachi kuali techyolmajxitis. Axkan tikitaskej keniuj uelis tiknextiskej ke yekmelauj tiknekij maj techyolmajxitikan, uan ox kuali yetok maj tikiniluikan oksekin maj techiluikan toni tikchiuaskej.

“¿KENIUJ UELIS NIKNEXTIS KE YEKMELAUJ NIKNEKI MAJ NECHYOLMAJXITIKAN?”

11, 12. 1) ¿Toni amo moneki tikchiuaskej? 2) ¿Toni kichiuak tekiuaj Rehoboam keman monekia kiixtalis se taman?

¹¹ Kemansa se tokniuj xa tajtanis maj kiyolmajxitikan sayoj ke komo kiixtalijya toni kichiuas, xa sayoj kineki maj kiluikan ke kuali yetok tein kiixtalij. Komo ijkon kichiua, amo yekmelauj kineki maj kiyolmajxitikan. Tein amo kuali tein kichiuak Rehoboam uelis techmachtis tinochin.

¹² Rehoboam mochiuak tekiuaj satepan ke momikilij Salomón, akin katka itat. Keman Rehoboam mochiuak tekiuaj, miakej kipiayaj tein kuali, sayoj ke kimachiliayaj ke Salomón kinteltekitiltijka. Yejua ika kiluijkej tekiuaj Rehoboam maj amo semi kintekitiltianiok. Tekiuaj kiniluij ke yaya kinemiliti, uan yekinika kintajtanij tayekananij akin kipaleuiayaj Salomón maj kiyolmajxitikan, nejon tel kuali katka (1 Rey. 12:​2-7). Sayoj ke Rehoboam amo kichiuak tein yejuan kiluijkaj. ¿Keyej? Xa kiixtalijkaya toni yaya kichiuati uan sayoj kinekia maj tayekananij kiluianij ke kuali yetoya tein kinemilijtoya. Yejua ika, keman kintajtanij telpochmej akin iniuan mouikaya maj kiyolmajxitikan uan yejuan kiluijkej ke kuali yetoya tein yaya kichiuati, okachi kiuelkakik (1 Rey. 12:​8-14). Rehoboam kichiuak tein kiluijkej akin iniuan mouikaya uan yejua ika miakej kiixnamikkej uan kiixpejpenkej okse tekiuaj. Desde ijkuak Rehoboam peuak kipia kuejmolmej (1 Rey. 12:​16-19).

13. ¿Keniuj uelis tiknextiskej ke yekmelauj tiknekij maj techyolmajxitikan?

¹³ ¿Toni techmachtia tein kichiuak Rehoboam? Ke keman titajtaniskej maj techyolmajxitikan amo moneki tikixtalijtoskejya desde achto toni tikchiuaskej, ta achto moneki tikakiskej tein techyolmajxitiskej. Yejua ika maj timotajtanikan: “¿Nitajtani maj nechyolmajxitikan uan amo nikchiua komo amo nikuelkaki?”.

14. Xikonmelaua toni uelis kipanos se tokniuj uan toni amo moneki tikelkauaskej (no xikonita taixkopin).

¹⁴ Maj tiknemilikan ke se tokniuj kiluiaj maj kiseli se tekit kampa kuali kitaxtauiskej, sayoj ke moneki kisas miak semanas uan amo yetos iniuan ichankauan. Achto ke kiselis nejon tekit, kiluia se tayekankej maj kiyolmajxiti. Tayekankej kielnamiktia ke Biblia kijtoua ke achto moneki kiitas maj ichankauan kuali mouikakan iuan Jehová (Efes. 6:4; 1 Tim. 5:8). Tokniuj amo kiuelkaki tein kiluia tayekankej, uan yejua ika kisentoka kintajtania okseki tokniuan itech nechikol hasta ke se tokniuj kiluia maj kiseli nejon tekit. ¿Yekmelauj kinekia maj kiyolmajxitikan oso sayoj kinekia maj aksa kiluiani ke kuali yetoya tein kiixtalijkaya kichiuas? Maj amo tikelkauakan ke toyolo ijsiujka techchiualtia teisa (Jer. 17:9). Kemansa, tein techyolmajxitiaj maski amo tikuelkakij yejua tein okachi uelis techpaleuis.

“¿MONEKI NIKINTAJTANIS OKSEKIN MAJ NECHILUIKAN TONI MONEKI NIKCHIUAS?”

15. ¿Toni amo moneki tikchiuaskej, uan keyej?

¹⁵ Jehová kineki maj tisejsemej tikixpejpenakan toni tikchiuaskej (Gál. 6:​4, 5). Timomachtijkejya ke achto ke tikixtaliskej tikchiuaskej teisa, moneki maj tikitakan toni kijtoua Biblia uan maj techyolmajxitikan tokniuan akin miak xiujmejya kitekitilijtokej Jehová. Sayoj ke amo moneki tikintajtaniskej maj techiluikan toni moneki tikchiuaskej. Yejua ika, amo tiktajtaniskiaj aksa akin kuali iuan timouikaj: “¿Toni tikchiuaskia komo mitspanotoskia tein nejua nechpanotok?”. Oksekin kiixtaliaj no kichiuaskej tein miakej kichiuaj, maski amo achto kuali kinemiliaj.

16. ¿Toni monekia kiixtaliskej tokniuan de Corinto? (1 Corintios 8:7; 10:​25, 26).

¹⁶ Maj tikitakan tein panok yekinika siglo itech nechikol de Corinto. Nejon tokniuan monekia kiixpejpenaskej ox kikuaskiaj nakat tein kinmaktilijkajya tatadiosmej. Pablo kinijkuilouilij nejin: “Tikmatij ke se tatadios senkis amo tapaleuia, uan ke onkak sayoj se Dios” (1 Cor. 8:4). Yejua ika, seki tokniuan itech nechikol kiixpejpenkej kikuaskej nakat tein kikouayaj maski xa kinmaktilijkajya tatadiosmej. Oksekin kiixtalijkej amo kikuaskej nejon nakat porin kiitayaj ke amo kuali yetoya (xikonlero 1 Corintios 8:7; 10:​25, 26). Sejse monekia kiixtalis toni kichiuas. Pablo amo keman kiniluij tokniuan de Corinto maj yejuan kiixtalikan tein kichiuaskej oksekin nion maj kichiuakan tein oksekin kichiuayaj. Ta itech Romanos 14:​10-12 kijkuiloj: “Tisejsemej titanankiliskej iixpan Dios por nochi tein tikijtojkej uan tikchiujkej”.

17. Xikonmelaua toni uelis techpanos komo sayoj tikchiuaj tein oksekin kichiuaj (no xikonita taixkopimej).

¹⁷ ¿Toni no ueliskia techpanos tejuan? Maj itech titanemilikan fracciones tein kipia esti tein tisejsemej moneki tikixpejpenaskej ox timotaliliskej oso amo.b Xa techouijmakas tikajsikamatiskej nejon, sayoj ke tejuan moneki tikixpejpenaskej toni tikchiuaskej (Rom. 14:4). Komo sayoj tikchiuaj tein oksekin kichiuaj, amo keman timochiuaskej titamatinij, ta sayoj komo toselti titaixpejpenaj uan tikchiuaj tein Biblia kijtoua (Heb. 5:14). Komo ijkon, ¿kemanian uelis tiktajtaniskej se tokniuj akin kuali kitekitilijtok Jehová maj techyolmajxiti? Uelis tiktajtaniskej maj techyolmajxiti komo satepan ke timomachtijkejya, tikmachiliaj ke monekiok maj techpaleuikan maj tikyekajsikamatikan tein tayolmajxitia Biblia ika tein techpanotok.

MAJ TIKSENTOKAKAN TITAJTANIKAN MAJ TECHYOLMAJXITIKAN

18. ¿Toni kichiuani Jehová para techpaleuis?

¹⁸ Jehová kinextia ke touan takuaujtamati porin techkaua maj toselti tikixpejpenakan toni tikchiuaskej. Yejua techmaka Biblia uan techpaleuia maj tikinpiakan akin kuali iniuan timouikaskej akin uelis techyolmajxitiskej keniuj tikchiuaskej tein kijtoua iTajtol Dios. Ijkon Jehová techyekpia kemej se tepopaj (Prov. 3:​21-23). ¿Keniuj uelis tiknextiskej ke tiktasojkamatij maj techpaleui?

19. ¿Keniuj uelis tikyolpaktiskej Jehová?

¹⁹ Tetatmej semi yolpakij keman kiitaj ke ininkoneuan moskaltiaj uan kuali kitekitiliaj Jehová uan kinpaleuiaj oksekin. No ijkon, toTajtsin Jehová semi yolpaki keman kiita ke okachi kuali tiktekitiliaj, tikiniluiaj oksekin maj techyolmajxitikan uan tikixpejpenaj teisa tein kinextia ke tiktasojtaj.