¿Keniuj kuali tikyolmajxitiskej aksa?

1. ¿Akonimej moneki maj tayolmajxitikan, uan keyej?

¿TIKONUELITA tikonyolmajxitis oksekin? Miakej amo kinouijmaka kichiuaskej, sayoj ke sekin kimouiliaj oso amo kuali momachiliaj keman tayolmajxitiaj. Maski ijkon, kemansa ipa moneki titayolmajxitiskej. ¿Keyej? Porin ijkon tiknextiaj ke tikintasojtaj tokniuan, uan Jesús kijtoj ke komo tiknekij tiktojtokaskej moneki titetasojtaskej (Juan 13:35). Uan no, Biblia kijtoua ke okachi kuali iuan timouikaj aksa keman kuali tikyolmajxitiaj (Prov. 27:9).

2. ¿Toni moneki kuali kichiuaskej tayekananij, uan keyej? (No xikonita recuadro “¿Keniuj takamej tayolmajxitiaj itech nechikol itajkotian semana?”).

² Jehová uan Jesús kinixtalijkej tayekananij maj kinyekpiakan tokniuan itech nechikol, yejua ika moneki kimatiskej keniuj kuali tayolmajxitiskej (1 Ped. 5:​2, 3). ¿Keniuj kichiuaj? Keman techyolmajxitiaj ika Biblia itech se tanojnots. No techyolmajxitiaj tisejsemej keman moneki, uan kinpaleuiaj maj oksepa kiueyichiuakan Jehová akin amo kitekitiliajok. ¿Keniuj tayekananij uan tejuan uelis kuali titayolmajxitiskej?

3. 1) ¿Toni techpaleuis maj kuali titayolmajxitikan? (Isaías 9:6; no xikonita recuadro “Maj titayolmajxitikan kemej Jesús”). 2) ¿Toni tikitaskej itech nejin tamachtilis?

³ Semi techpaleuis maj kuali titayolmajxitikan komo timomachtiaj itech Biblia keniuj sekin kuali tayolmajxitijkej. Jesús nochipa kuali tayolmajxitiaya uan itech Biblia moixmati kemej se “Kuali Tayolmajxitijkej” (xikonlero Isaías 9:6). Itech nejin tamachtilis tikitaskej toni uelis tikchiuaskej keman aksa techiluis maj tikyolmajxitikan, uan toni moneki tikchiuaskej keman monekis tikyolmajxitiskej aksa maski amo techtajtanijtos. No tikitaskej keyej semi moneki maj titayolmajxitikan keman moneki uan kemej okachi tapaleuis.

KEMAN AKSA TECHILUIA MAJ TIKYOLMAJXITIKAN

4, 5. Xikonmelaua toni moneki achto tikchiuaskej keman aksa techtajtanis maj tikyolmajxitikan.

⁴ ¿Toni moneki achto tikchiuaskej keman aksa techtajtanis maj tikyolmajxitikan? Xa tiyolpakiskej porin touan takuaujtamati uan tiknekiskej niman tikpaleuiskej. Sayoj ke okachi kuali maj achto timotajtanikan: “¿Kuali nikmati tein kipanotok uan uelis kipaleuis tein nikyolmajxitis?”. Kemansa xa okachi kuali yeski maj tikpaleuikan maj kiajsi aksa akin okachi kuali kiyolmajxitis.

⁵ Maj tiknemilikan ke se akin kuali iuan timouikaj, motelkokoua. Se tonal, uitse uan techiluia ke kitemojya seki taman tapajtilis tein uelis kiselis uan techtajtania katiyejua tikitaj ke okachi kipaleuis. Xa tejuan amo techouijmakaskia tikmatiskej toni tikchiuaskej, sayoj ke kemej amo titapajtianij amo tikmatij toni pajti okachi kinamikis. Yejua ika, xa okachi kuali yeskia maj tikpaleuikan maj kiajsi aksa akin okachi kipaleuis uan kipajtis.

6. ¿Toni moneki tikchiuaskej achto ke titayolmajxitiskej?

⁶ Kemansa xa tiknemiliskej ke uelis tikyolmajxitiskej aksa akin kuali iuan timouikaj. Sayoj ke xa okachi kuali maj amo niman tikyolmajxitikan. ¿Keyej? Porin Proverbios 15:28 kijtoua ke “akin yolkuali kinemilia achto ke tanankilis”. Yejua ika maski tiknemiliskej ke tikmatijya toni tikijtotij, okachi kuali maj achto tiktemokan tamachtilis, maj timotataujtikan, uan maj kuali tiknemilikan toni titayolmajxitiskej. Komo ijkon tikchiuaj, uelis titayolmajxitiskej kemej Jehová kineki. Maj tikitakan tein kipanok tanauatijkej Natán.

7. ¿Toni techmachtia tein kipanok Natán?

⁷ Keman tekiuaj David kiluij Natán ke kinekia kichijchiuilis Jehová se templo, tanauatijkej niman kiluij ke kuali yetoya tein kinemiliaya. Sayoj ke Jehová amo kinekia maj David kichijchiuani nejon templo. Natán monekia achto kitajtanis Jehová toni kinemiliaya para kinankilis (1 Crón. 17:​1-4). Nejin tein panok techmachtia ke komo aksa techtajtania maj tikyolmajxitikan, ‘moneki maj amo niman titajtokan’ (Sant. 1:19).

8. ¿Keyej no moneki tikpiaskej cuidado keman titayolmajxitiskej?

⁸ ¿Keyej no moneki tikpiaskej cuidado keman tikyolmajxitiskej aksa? Porin komo amo kuali tikyolmajxitiaj uan kiixtalia kichiuas teisa tein amo kuali, tein kipanos no yeski totajtakol. Yejua ika moneki achto kuali tiknemiliskej toni titayolmajxitiskej.

KEMAN MONEKI TITAYOLMAJXITISKEJ MASKI AMO TECHILUISKEJ

9. ¿Toni moneki kiitaskej tayekananij achto ke kiyolmajxitiskej se tokniuj? (Gálatas 6:1).

⁹ Kemej kijtoua Gálatas 6:1 (xikonlero), kemansa yejuan tayekananij akin moneki kitemoskej kiyolmajxitiskej se tokniuj akin “chikoyajtok”. Xa kiixtalijtok kichiuas seki taman tein satepan uelis ika moteltajtakolmakas. Tayekananij kitemoskej kipaleuiskej tokniuj para maj kisentoka kitekitili Jehová uan maj nemi nochipaya (Sant. 5:​19, 20). Sayoj ke achto moneki kiitaskej ox yekmelauj kichiujtok tein amo kuali. Yejuan moneki kiajsikamatiskej ke komo tokniuj kiixtalijtok kichiuas teisa tein yejuan amo kichiuaskiaj, amo kijtosneki ke kichiujtok tein Jehová amo kiuelita (Rom. 14:​1-4). Sayoj ke, ¿keniuj tayekananij uelis kuali kiyolmajxitiskej aksa komo kiitaj ke kichiujtok teisa tein uelis ika motajtakolmakas?

10-12. Xikonmelaua toni moneki kichiuaskej tayekananij keman kiyolmajxitiskej aksa akin amo kintajtanij (no xikonita taixkopimej).

¹⁰ Xa ouij yeski para tayekananij kiyolmajxitiskej aksa akin amo kintajtanijtok. ¿Keyej? Porin tatitanil Pablo kijtoj ke tokniuj xa amo momaka cuenta ke kichiujtok tein amo kuali uan ke moneki maj kiyolmajxitikan. Yejua ika achto ke kiyolmajxitiskej, tayekananij moneki kichiuaskej seki taman tein tapaleuis maj kinkaki.

¹¹ Maj tiknemilikan tein moneki kichiuas aksa akin kitokati teisa. Achto moneki tachipauas, satepan kitoka uan kiatekia. No ijkon, tayekankej achto moneki kichiuas seki taman para maj kikaki akin kiyolmajxititi. Tayekankej moneki mochias hasta keman kiitas ke uelisya iuan tajtos, satepan xa uelis kiluis ke kemej motekipachoua por yejua, kineki kiluis teisa. Komo tayekankej kiixmatij ke tetasojta uan yolkuali, okachi kinekiskej kikakiskej akin kinyolmajxitia.

¹² Komo tayekankej kielnamiktia akin kiyolmajxititi ke tinochin timopolouaj uan ke kemansa moneki maj techyolmajxitikan, okachi kinekis kikakis (Rom. 3:23). Tayekankej kuali kinojnotsas uan kipoujkaitas keman kinextilis ika Biblia toni tein amo kuali kichiujtok. Keman tokniuj kiajsikamatis ke mopolojtok, tayekankej kemej yeskia “tatoktosya” keman kiluis toni moneki kichiuas para mopatas. Satepan kemej yeskia “kiatekis” keman kiluis ke kichiujtok seki taman tein kuali uan iuan kitataujtis Jehová (Sant. 5:15).

13. ¿Toni uelis kichiuaskej tayekananij para kimatiskej ox tokniuj kiajsikamatik tein kiyolmajxitijkej?

¹³ Xa kemansa tayekankej kiluis se taman tokniuj akin kiyolmajxitia uan yejua kiajsikamatis okse taman. ¿Toni uelis kichiuaskej tayekananij para kiitaskej ke tokniuj kiajsikamattok tein kiluijtokej? Yejuan uelis kitajtaniskej seki taman para kiitaskej ox kiajsikamatik tein kiluijkej uan ox kimati keniuj kichiuas (Ecl. 12:11).

MAJ TITAYOLMAJXITIKAN KEMAN MONEKI UAN KEMEJ TAPALEUIS

14. ¿Keyej amo moneki titayolmajxitiskej keman tikualantoskej?

¹⁴ Kemej tinochin titajtakolejkej kemansa ipa tikijtoskej oso tikchiuaskej teisa tein amo kiuelitaskej oksekin (Col. 3:13). Biblia kijtoua ke xa kemansa timokualantiskej iniuan oksekin (Efes. 4:26). Sayoj ke amo moneki titayolmajxitiskej keman tikualantoskej maski tiknekiskej tikchiuaskej. ¿Keyej? “Porin komo se tel kualani amo se kichiua tein Dios kiita ke kuali yetok” (Sant. 1:20). Komo titayolmajxitiaj keman tikualantokej okachi timokualantiskej. Nejin amo kijtosneki ke amo uelis tikiluiskej akin techyolkokoj keniuj timomachiliaj. Sayoj ke para tikchiuaskej moneki timochiaskej hasta keman tiyolseujtoskejya. Maj tikitakan toni techmachtia tein kichiuak Elihú keman kiyolmajxitij Job.

15. ¿Toni techmachtia tein kichiuak Elihú? (No xikonita taixkopin).

¹⁵ Elihú miak tonalmej kikaktoya keniuj Job motenpaleuiaya keman itasojikniuan kijtouilijkej miak taman. Maski kiikneliaya Job, no kikualantij porin keman motenpaleuijtoya kijtouilij Jehová seki taman. Maski ijkon, mochiak hasta keman ueliskia kinojnotsasya Job, uan keman kiyolmajxitij yolseujtoya uan kuali kinojnotsak (Job 32:2; 33:​1-7). Tein kichiuak techmachtia ke moneki tiyolseujtoskej keman tikyolmajxitiskej aksa, moneki tikpoujkaitaskej uan tiknextiliskej ke tiktasojtaj keman tiknojnotsaskej (Ecl. 3:​1, 7).

MAJ TIKSENTOKAKAN TITAYOLMAJXITIKAN UAN MAJ TIKAKIKAN TEIN TECHYOLMAJXITISKEJ

16. ¿Toni mitsonmachtia tein kijtoua Salmo 32:8?

¹⁶ Jehová kijtoua: “Nimitsitstos para nimitsyekpias uan nimitsyolmajxitis” (xikonlero Salmo 32:8). Nejin kijtosneki ke Jehová kisentoka techita keman techyolmajxitia para techpaleuis maj tikchiuakan tein techiluia. Tejuan no uelis tikchiuaskej kemej Jehová. Keman monekis tikyolmajxitiskej aksa, maj tiksentokakan tikyolchikauakan uan maj tikpaleuikan maj kichiua tein kuali.

17. ¿Keniuj timomachiliaj keman tayekananij techyolmajxitiaj ika Biblia? (Isaías 32:​1, 2).

¹⁷ Axkan okachiok moneki maj kuali titayolmajxitikan uan maj techyolmajxitikan (2 Tim. 3:1). Ijkon kemej “at tein motaloua kampa tauaktok” ueli kiamikseuia aksa, no ijkon timomachiliaj keman tayekananij techyolmajxitiaj porin techyolchikauaj uan techpaleuiaj maj tiksentokakan tiktekitilikan Jehová (xikonlero Isaías 32:​1, 2). Semi timotasojkamatij maj tokniuan akin kuali iniuan timouikaj techyolmajxitikan keman moneki. Tein kijtouaj kitelpia ipatiuj ‘kemej manzanas tein chijchiujtokej ika oro itech tapalkat tein chijchiujtok ika plata’ (Prov. 25:11). Maj tiksentokakan timomachtikan keniuj kuali titayolmajxitiskej uan maj tikakikan tein techyolmajxitiskej.