Jehová techpaleuij maj timomatinij uan maj tiyolpakinij kampa titapaleuiayaj

Tokniuan Mats uan Ann-Catrin kiselijkej Tamachtilis tein motemaka Galaad itech xiuit 1979, uan satepan kintitankej maj tapaleuitij Irán, Mauricio, Myanmar, Tanzania, Uganda uan Zaire. Keman kiselijkej tamachtilis, tokniuj Jack Redford akin no kinmachtij, kinyolmajxitij maj momatinij kampa kintitaniskiaj uan maj yolpakinij. Tein kiniluij kinpaleuij nochipa keman kintitaniaj maj tapaleuitij okseko porin miakkan kintitankej. Maj techtapouikan tein panok.

¿Uelis nantechtapouiskej keniuj peuak namomachtiaj?

Mats: Nopaj nemia Polonia keman mochiujtoya Ojpatika Ueyi Neteuilis, uan kiitaya ke itech tiopan amo kichiuayaj tein tamachtiayaj. Maski ijkon nochipa kijtouaya: “Nikneltoka ke ipa moajsi se taneltokalis tein melauak”. Satepan nikitak ke melauj tein kijtouaya. Nejua nikinkouaya miak amaixmej tein ipa kinkuikajya, uan se tonal nikouak se amaix azul tein monotsa La verdad que lleva a vida eterna. Semi nikuelitak kemej monotsa nejin amaix uan niktamileroj nejon youak. Mostika kualkan nikmatiaya ke nikajsika tein melauak.

Itech metsti abril xiuit 1972 peuak nikleroua miak amaixmej de itaixpantijkauan Jehová uan nikmatik miak taman tein nimotajtaniaya de Biblia. Nimomachiliaya kemej tanamakakej akin Jesús ika tajtoj. Keman kiajsik se tetsin tein semi patiyoj, kinamakak nochi tein kipiaya para kikouas tein kiajsika. Nejua ijkon nikchiuak keman nikixtalij niktekitilis Jehová uan amo niajkiok universidad para nimochiuas tapajtijkej (Mat. 13:​45, 46). Nimoauij 10 de diciembre xiuit 1972.

Itech sayoj se xiuit, notatuan uan nokniuj akin xokoyot no peuak momachtiaj uan moauijkej. Itech metsti julio de 1973 nimochiuak precursor regular. Itech tonechikol yetoya se precursora akin monotsaya Ann-Catrin, yejua kuakualtsin katka uan kuali kitekitilijtoya Jehová. Timoueuelitakej uan timonamiktijkej itech xiuit 1975. Satepan ke timonamiktijkej naui xiuit titapaleuijkej ompa Strömsund, se kualtsin xolal de Suecia kampa miakej kinekiaj momachtiskej Biblia.

Ann-Catrin: Nopaj peuak momachtia Biblia keman yaya kisatia universidad ompa Estocolmo. Keman yekin nikpiaya eyi metsti, nechuikaya nechikolmej uan no keman yaya tanojnotsati. Nomaj amo kiuelitaya, yejua ika kinekia kinextis ke tein tamachtiayaj itaixpantijkauan Jehová amo melauj katka. Sayoj ke amo uelik kichiuak nejon uan satepan no moauij. Nejua nimoauij keman nikpiaya 13 xiujmej uan nimochiuak precursora keman nikpiaya 16 xiujmej. Uan satepan nimochiuak precursora especial keman nitapaleuijtoya ompa Umeå kampa monekiaj tanojnotsanij.

Satepan ke Mats uan nejua timonamiktijkej, miakej tikinpaleuijkej maj kiixmatikan Jehová. Semej katka Maivor, se siuapil akin ueliskia kitanis miak tomin porin kuali mauiltiaya, sayoj ke kikauak nejon para kitekitilis Jehová uan satepan tapaleuij kemej precursora iuan nokniuj siuapil akin xokoyot. Nochin omen kiselijkej Tamachtilis tein motemaka Galaad itech xiuit 1984 uan axkan tapaleuiaj kemej misioneras ompa Ecuador.

¿Toni namechpaleuij ximomatikan uan xiyolpakikan kampa nantapaleuiayaj?

Mats: Miakkan techtitaniaj maj titapaleuitij. Sayoj ke semi techpaleuij maj timomatikan keman timochikauayaj tikchiuaskej kemej Jesús uan tiyeskij tiyolyemankej kemej yejua (Col. 2:​6, 7). Uan ijkon tikchiuayaj keman timochikauayaj tikajsikamatiskej keyej tokniuan akin ompa nemiaj taman kemej kichiuayaj teisa. Tiknekiaj tikajsikamatiskej keniuj tanemiliayaj uan tein momattoyaj kichiuaskej. Keman tikchiuayaj kemej Jesús, okachi niman timomatiaj uan okachi tiyolpakiaj kampa titapaleuiayaj (Sal. 1:​2, 3).

Ann-Catrin: Keman titapaleuitij okseko titamatij kemej se kouit tein yekin kitokkej, para uelis moskaltis moneki maj tonaltsin kitauili. Uan Jehová nochipa katka kemej nejon “tonaltsin” tein techtauiliaya (Sal. 84:11). Yejua ika kualtsin timomachiliayaj porin techtatiochiuiaya keman tokniuan techtasojtayaj. Ompa Teherán (Irán) itech tonechikol kampa amo miakej katkaj, tokniuan semi kuali techseliayaj ijkon kemej kichiuayaj sekin akin ininka tajtoua Biblia. Tiknekiaj timokauaskej ompa Irán, sayoj ke itech metsti julio xiuit 1980 tekiuaj amo techkauakok maj titanojnotsakan uan technauatijkej maj tikisanij achto ke panoskia 48 horas. Techtitankej itech se altepet de África tein ijkuak moixmatia kemej Zaire uan axkan motanotsa República Democrática del Congo.

Peuak nichoka keman nikmatik ke techtitaniskiaj África. Nimouia porin nikakia ke onkayaj miakej kouamej uan miak taman kokolismej. Sayoj ke se tokniuj uan isiuatsin akin katkaj totasojikniuan uan miak xiujmej ompa tapaleuijkaj, techiluijkej: “Amo keman nanyanij África yejua ika amo ximouikan, nankiitaskej ke nankiuelitaskej”. Uan melauj ijkon techpanok. Tokniuan de África tel yolkualmej uan tetasojtaj. Chikuasen xiuit satepan keman tekiuaj amo techkauakok maj titanojnotsakan uan monekik tikisaskej de Zaire, sayoj niuetskak porin amo nitanemiliayaok kemej achto uan axkan niktajtanijtoya Jehová maj timokauanijok África.

¿Keniuj Jehová namechtatiochiuiani porin nankitekitilianij?

Mats: Kemej katkaj timisioneros, uelik tikinixmatkej okseki misioneros de okseki altepemej akin mochiujkej totasojikniuan. Uan kampa titapaleuianij kemansa tisejsemej tikinmachtianij hasta veintejmej. No semi nikelnamiki keniuj tokniuan de África semi tetasojtaj uan kuali teseliaj. Keman tikinkalpanojtoyaj nechikolmej ompa Tanzania, tikochiaj itech tocarro tein tikauayaj tanakastan de kampa nemiaj tokniuan, uan yejuan ‘techmakayaj nochi tein ueliaj, hasta okachiok’ (2 Cor. 8:3). Semi tikuelitayaj keman ajsia hora para timotapouiskej tein techpanoka. Mojmostaj achto ke tikochiskej, Ann-Catrin uan nejua timotapouiayaj tein techpanoka nejon tonal uan tiktasojkamatiliayaj Jehová porin techpaleuiaya.

Ann-Catrin: Semi niyolpaki nikinixmatis tokniuan akin okseko kayomej. Timomachtianij titajtoskej francés, luganda, persa uan suajili, uan tikitanij keniuj itech sejse xolal tataman tein momattokej kichiuaskej. Titapaleuianij maj kinmachtikan okseki tokniuan para maj okachi kitekitilikan Jehová, tikinixmatinij miakej akin kuali iniuan timouikaj uan semi tiyolpakinij “tiksentekitiliskej” Jehová (Sof. 3:9).

No tikitanij miak taman tein kualtsin tein Jehová kichijchiuak. Nochipa keman tiayaj okseko, kemej yeskia Jehová techuikaya para tikmatiskej kanika tiaskej. Yejua techmachtiani miak taman tein toselti amo keman tikmatiskiaj.

¿Toni ouijkayomej nankipianij uan keniuj nantaxikouanij?

Mats: Miakpa techkuini tataman kokolismej kemej malaria (oso paludismo). Uan Ann-Catrin miakpa monekini ijsiujka kitekiskej. No semi timotekipachouayaj porin totatuan ueuentsintiayaj, yejua ika semi tikintasojkamatiliaj tochankauan porin kinyekpiakej keman tejuan titapaleuijtoyaj okseko (1 Tim. 5:4). Maski ijkon, ipa timotayokoltiayaj porin uejka tietoyaj uan amo uelia tikinpaleuiayaj kemej tiknekiskiaj.

Ann-Catrin: Itech xiuit 1983, keman tietoyaj Zaire, semi nikokolispeuak. Tapajtijkej kiluij Mats: “¡Niman xikuika itech okse altepet para maj kipajtikan!”. Yejua ika, mostika tiajkej Suecia itech se avión tein sayoj kikuiaj para kiuikaskej tein etik porin amo onkaya okse.

Mats: Maski tapajtijkej kijtojka ke Ann-Catrin amo pajtiskiaok, kemaj pajtik. Maski ijkon, semi timochoktijkej porin tiknemilijkej ke amo ueliskiaok tiyeskij misioneros. Sayoj ke se xiuit satepan oksepa timokepkej Zaire, uan peuak titapaleuiaj ompa Lubumbashi itech se nechikol kampa amo miakej mosentiliayaj uan tajtouayaj suajili.

Ann-Catrin: Keman tietoyaj Lubumbashi, nikmatik ke yaya nikpiati se konetsin, sayoj ke momikilij achto ke yoliskia. Maski amo tiknekiaj tikinpiaskej konemej, semi nimotayokoltij keman momikilij. Sayoj ke keman semi titayokoxtoyaj, Jehová techtatiochiuij ika okse taman. Peuak okachi miakej tikinmachtiaj ika Biblia. Itech nechikol sayoj moajsiaj 35 tanojnotsanij uan achto ke panoskia se xiuit ajsik hasta 70, uan achto timosentiliayaj 40 sayoj ke peuak timosentiliaj hasta 220. Nochipa titanojnotsayaj, uan keman nikitak ke Jehová semi techtatiochiuiaya nechpaleuij maj amo semi nimotayokoltiok. Maski ijkon, ipa tikelnamikij uan ika titajtouaj tokonetsin. Tiknekijya tikmatiskej keniuj Jehová senkis techyolseuis.

Mats: Satepan Ann-Catrin peuak kimachilia ke semi kuetauia. Uan nejua nechajxilijkej cáncer uan monekia maj niman nechtekikan porin nechtelkuikaya. Axkan kuali nietokya, uan Ann-Catrin mochikaujtok taxikos.

Tikmatij ke amo sayoj tejuan tikpiaj ouijkayomej. Itech xiuit 1994 satepan ke kinmiktijkej miakej ompa Ruanda, tikinkalpanojkej tokniuan akin yetoyaj kampa motepalotiayaj. Keman tikitakej ke semi takuaujtamatiaj, taxikouayaj uan kinmakayaj oksekin tein kipiayaj maski semi tajyouijtoyaj, tikajsikamatkej ke Jehová ueli kinpaleuia itekitikauan maj taxikokan keman kipiaj ouijkayomej (Sal. 55:22).

Ann-Catrin: Itech xiuit 2007 techpanok okse taman keman tiajkaj Uganda porin kidedicarojkej Betel. Keman tamik nechikol timokeptoyajya Nairobi (Kenia) iniuan 25 misioneros uan betelitas, sayoj ke tepitsin achto ke tiajsiskej Kenia, se carro tein ualaya taixpan kiixkuateloj tocarro. Akin kiuikaya carro uan makuil tokniuan niman momikilijkej, uan satepan se tokniuj siuat momikilij keman yetoya hospital. ¡Tiktelnekijya oksepa tikinitaskej totasojikniuan! (Job 14:​13-15).

Yolik nipajtik kampa nimokokojka. Sayoj ke Mats uan nejua, uan oksekinok tiksentokayaj tikelnamikiaj tein techpanoka uan timomoujtiayajok. Nejua semi nimokochmoujtiaya uan keman niijsaya uan nimeuaya nikmachiliaya ke niyoltamia. Semi techpaleuiaya keman tiktataujtiayaj Jehová uan tiklerouayaj textos tein semi tikuelitaj uan itech titanemiliayaj. Tapajtianij no semi techpaleuijkej maj amo tiksentokanij timomoujtianij uan timotekipachouanij. Axkan amo semi timomoujtiajok uan tiktajtaniaj Jehová maj techpaleui maj ueli tikinyolseuikan akin no kipiaj nejin ouijkayot.

Keman nantechiluijkej keniuj nantaxikojkej, nankijtojkej ke Jehová namechuikatinemia kemej “piotemej”, ¿toni nankijtosnekiaj?

Mats: Akin tajtouaj suajili kijtouaj nejin “Techuikakej kemej piotemej”. Keman aksa kinuika piotemej semi kinyekpia para maj amo pitsinikan, Jehová ijkon techyekpiani kampa titapaleuianij. Nochipa tikpianij tein moneki uan kemansa hasta okachiok. Tikitanij keniuj Jehová techtasojta uan techpaleuia keman kichiua maj tokniuan Oloch Taojtokaltianij techajsikamatikan uan maj techyolchikauakan.

Ann-Catrin: Nikneki namechtapouis keniuj techpaleuiani Jehová. Se tonal technotskej para techiluiskej ke nopaj yetoya hospital uan motelkokouaya. Mats ayamo yekpajtia porin kikuika malaria uan amo tikpiayaj tomin para tiaskej Suecia. Yejua ika tikixtalijkej tiknamakaskej tocarro. Satepan ome tokniuan technotskej. Yekinika technotsak se tokniuj uan isiuatsin akin kimatkej tein techpanotoya uan kinekiaj kiixtauaskej se boleto de avión. Uan satepan technotsak se tokniuj siuat akin xiuejya akin kisentilijka tepitsin tomin itech se cajita tein kijkuilouilijka “Para nikpaleuis aksa”. Tikitakej ke Jehová niman techpaleuij maj ueli tikouakan toboletos (Heb. 13:6).

¿Toni namomachtianij itech 50 xiujmejya tein nankitekitilianij Jehová?

Ann-Catrin: Kemej kijtoua Isaías 30:15 nikitani ke ueli titaxikouaj keman tiyolseujtokej uan titakuaujtamatij iuan Jehová. Keman iuan titakuaujtamatij, yejua techpaleuia maj titaxikokan (2 Crón. 20:​15, 17). Kemej semi timochikauanij tiktekitiliskej Jehová kampa titapaleuianij, yejua semi techtatiochiuiani uan techmakani okachi miak taman ke tein tikpiaskiaj komo tikchiujtoskiaj okse taman.

Mats: Nimomachtiani ke semi moneki nitakuaujtamatis iuan Jehová para nikitas keniuj nechpaleuia keman nikpia se ouijkayot (Sal. 37:5). Yejua nochipa techpaleuiani ijkon kemej motenkauak. Uan axkan ke tietokej Betel de Myanmar tikitaj ke kisentoka ijkon kichiua.

Ijkon kemej tejuan, tiknekij maj nochin okichpipil uan siuapipil akin kinekij okachi kitekitiliskej Dios no kiitakan keniuj Jehová semi tetasojta. Uan uelis kiitaskej nejin komo mokauaj maj Jehová kinpaleui maj momatikan uan maj yolpakikan kampa kintitaniskej maj tapaleuitij.