¿Tiktasojkamatij tein Dios toka kichiuak?

“Ma tikueyitasojkamachilijtiyakan Totajtsin Dios ika por ne ueyi tetayokolil [...]. Uan amo tikpiaj tajtolme tenika uelis titajtoaj de keniu Yejuatsin techueyiyoliknelij.” (2 COR. 9:15)

NEKUIKATILMEJ 53 UAN 18

1, 2. 1) ¿Toni poui itech netetayokolil tein Dios techmakak? 2) ¿Toni netajtanilmej tiknankiliskej itech nejin tamachtilis?

KEMEJ Jiova techteltasojta, kiualtitanik nikan taltikpak iKonetsin Jesucristo akin kiteltasojta maj toka momikiliki (Juan 3:16; 1 Juan 4:9, 10). Nejin yejua okachi ueyi netetayokolil tein tikselijkej tinochin. Yejua ika tatitanil Pablo kijtoj ke “amo tikpiaj tajtolme” tein ika tikijtoskej kanachi ipatiuj kipia nejin netetayokolil (2 Cor. 9:15). ¿Toni kijtosnekia Pablo ika nejin tajtolmej?

² Pablo kimatia ke imikilis Jesús techpaleuia maj tikyekmatikan ke yekmelauj mochiuas nochi tein Dios motenkaujtok (xikonixtajtolti 2 Corintios 1:20). Nejin kijtosneki ke itech netetayokolil tein Dios techmakak moajsi inemilis Jesús tein kitemakak uan no ompa poui netasojtalis uan nochi tein kuali tein Dios techmaka. Nejin se tel ueyi netetayokolil, yejua ika amo ueli tikmelauaj ika totajtoluan. ¿Keniuj moneki timomachiliskej ika nejin netetayokolil tein kitelpia ipatiuj? ¿Uan toni moneki tikchiuaskej axkan ke ajsiti tonal keman tikelnamikiskej imikilis Cristo? Itech nejin xiuit yeski itech tonal miércoles 23 metsti marzo.

SE INETETAYOKOLIL DIOS TEIN KITELPIA IPATIUJ

3, 4. 1) ¿Keniuj timomachiliaj keman aksa techtayokolia teisa? 2) ¿Keniuj se netetayokolil uelis kipatas tonemilis?

³ Nochipa keman techtayokoliaj teisa semi tiyolpakij. Sayoj ke seki netetayokolilmej uelis senkis kipataskej tonemilis porin kitelpiaj ipatiuj. Maj tiktalikan se neskayot. Xikonnemili ke tejuatsin tikonchiua teisa tein amo kuali uan tekiuanij kiixtaliaj ke mitsonnamiki tionmikis. Sayoj ke nesi se aksa akin amo tikonixmati uan motemaka moka momikilis. ¿Keniuj tionmomachiliskia?

⁴ Xa tikonpataskia seki taman itech monemilis. Uan xa okachi tikontasojtaskia oksekin uan okachi tionkualtakat yeskia uan tikontapojpoluiskia akin mitsonchiuilijkej tein amo kuali. Xa itech nochi monemilis tikonnextiskia ke tikontasojkamati tein nejon taltikpaknenkej akin amo tikonixmatia moka kichiuak.

5. ¿Keyej ueli tikijtouaj ke Dios techmakak okachi ueyi netetayokolil?

⁵ Netetayokolil tein Dios techmakak okachi kipia ipatiuj ke tein tikitakej itech neskayot (1 Ped. 3:18). Tejuan, kemej tinochin titajtakouanij, technamiki timomikiliskej (Rom. 5:12). Sayoj ke kemej Dios semi techtasojta, kiualtitanik iKonetsin maj toka momikiliki (Heb. 2:9). Sayoj ke imikilis Cristo kichiuas okachi miak taman tein kuali. Senkis kiixpolos mikilis (Is. 25:7, 8; 1 Cor. 15:22, 26). Nochin akin takuaujtamatiskej iuan Jesús yolpakiskej uan yolseujtoskej nochipaya, sekin ne iluikak iuan Cristo uan sekin nikan taltikpak (Rom. 6:23; Apoc. 5:9, 10). Sayoj ke netetayokolil tein Dios techmakak kipia okseki taman tein kuali.

6. 1) ¿Toni tikonchia tikonselis itech Xochital? 2) ¿Keniuj uelis tiknextiskej ke tiktasojkamatij inetasojtalis Dios?

⁶ ¿Toni okseki taman tein kuali poui itech netetayokolil tein Dios techmakak? Taltikpak yeski se xochital, akin mokokouaj pajtiskej uan mikemej oksepa nemiskej (Is. 33:24; 35:5, 6; Juan 5:28, 29). Semi tiktasojtaj Jiova uan Jesús porin techmakakej nejin tel kualtsin netetayokolil. ¿Keniuj uelis tiknextiskej ke timotasojkamatij? Yekinika, keman tiktojtokaj ineskayo Cristo. Ojpatika, keman tikintasojtaj tokniuan. Uan expatika, keman tikintapojpoluiaj oksekin ika nochi toyolo.

MAJ TIKTOJTOKAKAN INESKAYO CRISTO

7, 8. 1) ¿Toni tiknekiskej tikchiuaskej komo tiktasojkamatij inetasojtalis Jesús? 2) ¿Toni moneki tikchiuaskej komo tiktasojkamatij inetasojtalis Jesús?

⁷ Yekinika, netasojtalis tein Dios techpialia moneki techolinis maj nochipa tiktojtokakan ineskayo Jesús. Tatitanil Pablo kijtoj: “Tejuan techmachililtia ne tetasojtalis de Cristo ke moneki ma titekititinemikan” (xikonixtajtolti 2 Corintios 5:14, 15). Pablo kimatia ke komo tiktasojkamatij inetasojtalis Jesús, tiknekiskej tiktasojtaskej uan tinemiskej kemej yejua monejnemiltij. Keman kuali tikajsikamatij tein Jiova toka kichiuak, timochikauaj tinemiskej kemej Jesús kineki maj tinemikan. ¿Keniuj tikchiuaj nejin?

⁸ Moneki tiktojtokaskej ineskayo Cristo “ika miak nejmachkayot” (1 Ped. 2:21, TNM; 1 Juan 2:6). Keman tiktakamatij Dios uan Cristo, tiknextiaj ke tikintasojtaj. Jesús kijtoj: “Nochi nekes ten kixmatoske uan kitakamatijtinemij notanauatiluan, yejuan nojonkes melau nechyektasojtaj. Uan ijkon Notajtsin Dios no kintasojta nochi nekes ten nechtasojtaj. Uan nikintasojtatiyas nekes ten nechtasojtaske uan nimoajsikatenextilijtiyas ke Nejuatsin ni Cristo iuan nochi nekes ten nechtasojtaj” (Juan 14:21; 1 Juan 5:3).

9. ¿Toni ika timoixnamikij tinochin?

⁹ Axkan ke timoajsij itech tonalmej keman tikelnamikiskej imikilis Jesús, moneki tiknemiliskej keniuj tikuitokej tonemilis (xikonita kampa kijtoua “Tein okachi momelaua”). Maj timotajtanikan: “¿Itech toni nikchiujtokya kemej Jesús? ¿Onkak teisa tein uelis okachi nikyekchiuas?”. Motelneki maj timotajtanikan nejin, porin nochi tein onkak nikan taltikpak techtanejnektia maj tikchiuakan tein nochin kichiuaj (Rom. 12:2). Komo amo timoyekpiaj, uelis peuas tikchiuaskej tein kichiuaj tamatinij, akin noyampa kinixmatij uan mauiltianij (Col. 2:8; 1 Juan 2:15-17). ¿Toni uelis techpaleuis maj amo tikchiuakan kemej yejuan?

10. 1) ¿Toni moneki timotajtaniskej itech nejin tonalmej keman tikelnamikiskej imikilis Jesús? 2) ¿Toni tein tikchiuaj xa monekis tikpataskej? (Xikonita taixkopin ipeujyan tamachtilis.)

¹⁰ Itech nejin tonalmej keman tikelnamikiskej imikilis Jesús semi kuali yeskia maj tikitakan keniuj timotilmajtiaj, tatsotson tein tikakij, películas tein tikitaj, tein tikpiaj itech celular, computadora oso tableta. Maj timotajtanikan: “¿Nimopinaujmatiskia komo Jesús nechita keniuj nitakentok? ¿Kinextia kemej nimotakentia ke niktojtoka ineskayo Cristo?” (xikonixtajtolti 1 Timoteo 2:9, 10). “¿Kiuelitaskia Jesús películas tein nikita uan tatsotson tein nikaki? ¿Niktaneujtiskia nocelular oso tableta? ¿Ueliskia niknextilis Jesús tein ika nimauiltia uan nikmelauilis keyej nikuelita?”. Komo tiktasojtaj Jiova, moneki tiktamotaskej tein yeski taman tein uelis kijtakos tokuali uikalis iuan Jiova, maski patiyoj oso semi ouij techkisas (Hech. 19:19, 20). Keman timotemaktijkej iuan Jiova, timotenkaujkej ke nochipa tiktojtokaskiaj ineskayo Jesús. Yejua ika moneki amo tikpiaskej nion teyi tein kichiuas maj okachi ouij tikchiuakan nejon (Mat. 5:29, 30; Filip. 4:8).

11. 1) ¿Toni no tikchiuaskej komo tiktasojtaj Jiova uan Jesús? 2) ¿Keniuj uelis tikinpaleuiskej oksekin itech nechikol?

¹¹ Okse taman tein uelis tikchiuaskej komo tiktasojtaj Jiova uan Jesús yejua titanojnotsaskej uan tikinmachtiskej oksekin ika yolpakilis (Mat. 28:19, 20; Luc. 4:43). Itech nejin tonalmej keman tikelnamikiskej imikilis Jesús, ¿uelis tikchiuaskej tekit kemej precursor auxiliar uan titanojnotsaskej 30 oso 50 horas? Xiontanemili itech tein kichiuak se tokniuj takat akin kipia 84 xiujmej uan amo nemiok inamik. Yejua kinemilij ke amo ueliskia kichiuas tekit kemej precursor auxiliar porin xiuejya uan mokokoua. Sayoj ke precursores akin nemij ompakauin kipaleuijkej uan kiualkuiaj uan kiuikayaj keman yaya tanojnotsati uan kiixtalijkej kani okachi kuali ueliskia tanojnotsas. Ika nochi nejin uelik tanojnotsak 30 horas itech se metsti. ¿Uelis tikpaleuiskej aksa itech tonechikol maj mochiua precursor itech metsti marzo oso abril? Semi melauak ke amo tinochin ueli tikchiuaj tekit kemej precursor. Sayoj ke kemaj uelis tikuiskej seki totonaluan uan tochikaualis uan okachi tiktekitiliskej Jiova. Komo ijkon tikchiuaj, tiknextiskej ke tiktasojkamatij inetasojtalis Cristo, ijkon kemej kichiuak tatitanil Pablo. ¿Toni no uelis tikchiuaskej komo tiktasojkamatij inetasojtalis Dios?

MAJ TIKINTASOJTAKAN TOKNIUAN

12. ¿Toni moneki tikchiuaskej komo tiknekij maj Dios techtasojta?

¹² Ojpatika, netasojtalis tein Dios techpialia moneki techolinis maj tikintasojtakan tokniuan. Tatitanil Juan kijkuiloj: “Komo Dios ijkon techtasojtak, ijkuakon moneki tejuan no ma timosepantasojtakan se uan okse” (1 Juan 4:7-11). Komo tiknekij maj Dios techtasojta, moneki tikintasojtaskej tokniuan (1 Juan 3:16). ¿Keniuj uelis tikinnextiliskej ke tikintasojtaj?

13. ¿Toni kuali neskayot techkauilij Jesús?

¹³ Ika ineskayo, Jesús technextilij keniuj uelis tikintasojtaskej oksekin. Keman nemia nikan taltikpak, okachi kinpaleuij akin katkaj yolyemankej. Kinpajtij akin mokokouayaj, akin koxojmej, akin amo tachiayaj, akin amo ueliaj takakiaj uan akin amo ueliaj tajtouayaj (Mat. 11:4, 5). Jesús nion tepitsin katka kemej tayekananij itech taneltokalis, porin yejua semi kiuelitaya kinmachtis akin kinekiaj kiixmatiskej Dios (Juan 7:49). Kintasojtaya akin katkaj yolyemankej uan kitemouaya keniuj kinpaleuis (Mat. 20:28).

Seki tokniuan kinpaleuiaj seki namikuanij akin xiuejkejya keman tanojnotsaj ika teléfono uan carta — ¿Uelis tikpaleuiskej se tokniuj akin xiuejya itech tanojnotsalis? (Xikonita párrafo 14)

14. ¿Keniuj uelis tikinnextiliskej tokniuan ke tikintasojtaj?

¹⁴ Itech tonalmej keman tikelnamikiskej imikilis Jesús uelis tiknemiliskej keniuj uelis tikinpaleuiskej tokniuan itech nechikol, okachiok akin xiuejkejya. ¿Uelis tikinkalpanoskej, tikinuikiliskej teisa tein kikuaskej, tikinpaleuiskej ika teisa kalijtik, tikinuikaskej nechikolmej oso tikinyoleuaskej maj touan tanojnotsatij? (Xikonixtajtolti Lucas 14:12-14.) Netasojtalis tein Dios techpialia moneki techolinis maj tikinnextilikan tokniuan ke tikintasojtaj.

MAJ TITETAPOJPOLUIKAN IKA NOCHI TOYOLO

15. ¿Toni moneki tikajsikamatiskej tinochin?

¹⁵ Expatika, netasojtalis tein Dios techpialia moneki techolinis maj tikintapojpoluikan tokniuan. Tinochin titajtakouaj uan timomikiliaj porin tiikoneuan Adán, yejua ika amo akin ueli kijtoua ke imikilis Jesús amo kipaleuia. Hasta se itekitikauj Dios akin okachi kitakamati moneki kiselis nepaleuil tein kitemaka imikilis Jesús. Tinochin moneki tikajsikamatiskej ke Dios techtapojpoluijya tein timotauikaltijkej iuan. ¿Keyej motelneki tikajsikamatiskej? Tikitaskej tanankilil itech se neskayot tein Jesús ika tajtoj.

16, 17. ¿Toni kinekik techmachtis Jesús keman ika tajtoj se tekiuaj akin kitapojpoluij se takeual akin kiteltauikiliaya?

¹⁶ Jesús ika tajtoj se takeual akin kitauikiliaya se tekiuaj 60 millones platajtomin. Sayoj ke tekiuaj kitapojpoluij nejon tein kiteltauikiliaya. Satepan, nejon takeual amo kitapojpoluij okse takeual akin kitauikiliaya sayoj 100 platajtomin. Komo takeual motasojkamatiskia porin tekiuaj kitapojpoluij, kitapojpoluiskia itakeualikniuj. Keman tekiuaj kimatik tein kichiujka takeual akin amo yolkuali, tel kualanik. Yejua ika tekiuaj kinotsak uan kiluij: “Nejua nimitstapojpoluij de motauikalis porin tejua tinechontajtanilij de ke ma nimitstapojpolui. Uan tejua no ijkon monekia xikchiuani de ke xikyolikneliani ne motakeualikniu ijkon keme nejuatsin nimitsyoliknelij” (Mat. 18:23-35). ¿Toni kinekik tamachtis Jesús ika nejin neskayot? Ke keman Jiova techtapojpoluia totajtakoluan, techtapojpoluia se ueyi tauikalis. ¿Toni moneki tikchiuaskej komo timotasojkamatij?

¹⁷ Ijkon kemej okachi motokis tonal keman tikelnamikiskej imikilis Jesús, maj timotajtanikan: “¿Nechchiuilij teisa tein amo kuali se tokniuj? ¿Ouij nechkisa niktapojpoluis?”. Komo ijkon, maj tikchiuakan kemej Jiova, akin ‘niman tetapojpoluia’ (Sal. 86:5; Neh. 9:17). Komo tiktasojkamatiliaj Dios maj techtapojpolui, tikintapojpoluiskej oksekin ika nochi toyolo. Komo tiknekij maj Jiova techtasojta uan maj techtapojpolui, moneki tikintasojtaskej uan tikintapojpoluiskej tokniuan (Mat. 6:14, 15). Melauak ke keman titetapojpoluiaj amo kipata tein mochiuak, sayoj ke techpaleuis maj okachi tiyolpakikan satepan.

18. ¿Toni kipaleuij Lily maj kixiko inepololuan Carol?

¹⁸ Kemansa ouij techkisa tikxikoskej ininnepololuan tokniuan (xikonixtajtolti Efesios 4:2, 32). Maj tikitakan tein kichiuak se tokniuj siuat akin motokaytia Lily.^[1] Yejua kipaleuiaya Carol, se tokniuj siuat akin amo nemiaok inamik. Lily kiuikaya Carol kampa kiluiaya, yaya kitakouiti uan kipaleuiaya ika okseki taman. Maski Lily kitelpaleuiaya, Carol nochipa amo teyi kiuelitaya. Kemansa ouij kikisaya kuali iuan mouikas. Sayoj ke Lily mochikauaya tanemilis itech nochi ikualneskayouan Carol. Nejon kichiuak maj Lily kipaleuiani miak xiujmej, hasta keman Carol kokolispeuak uan momikilij. Lily kijtoua ke kitelneki maj Carol moajokui uan ijkon kiixmatis keman amo kipiasok tajtakol. Komo tiktasojkamatij inetasojtalis Dios, tejuan no uelis tikxikoskej ininnepololuan tokniuan. Uan no, nejin netasojtalis techpaleuia maj tikchiakan tonal keman amo tikpiaskejok tajtakol nion nepololmej.

19. ¿Toni tikchiuaskej komo tiktasojkamatij tein Dios toka kichiuak?

¹⁹ Yekmelauj Jiova techmakak se tel kualtsin netetayokolil. Itech tonalmej keman tikelnamikiskej imikilis Jesús maj titanemilikan itech nochi tein Jiova uan Jesús toka kichiujkej. Maj mojmostaj tiknextikan ke timotasojkamatij. Maj tikchiuakan kemej Cristo, maj tikintasojtakan tokniuan uan maj titetapojpoluikan ika nochi toyolo.

^ [1] (párrafo 18): Mopatakej seki tokaymej.