¿Toni nechpaleuis maj nikchia nikselis tein kuali?
Tein Biblia kijtoua
Biblia kijtoua ke Dios kineki maj tikchiakana “tein kuali satepan” (Jeremías 29:11). Tein melauj, se taman tein kichiuak maj Dios techmakani Biblia yejua porin kinekia maj iTajtol techyolseui para maj ‘tikchiakan tein kuali’ (Romanos 15:4). Kemej tikitaskej, tein techyolmajxitia Biblia techpaleuia maj tiyolpakikan mojmostaj uan tein kijtoua ke mochiuas techpaleuia maj tikchiakan tein kuali satepan.
Itech nejin tamachtilis tikitaskej nejin:
¿Keniuj techpaleuia Biblia maj tiyolpakikan?
Biblia techpaleuia maj tiyolpakikan porin techiluia tein uelis tikchiuaskej para okachi kuali tinemiskej. Maj tikitakan seki tayolmajxitilis.
Xikontemo maj Biblia mitsonixyekana. Salmo 119:105 kijtoua: “Motajtol se tauil tein nechmetstauilia uan se tanex itech ojti kampa ninejnemi”. Se tanex uelis kichiuas ome taman. Uelis kitauilis tein tikpiaj toixpan, sayoj ke no uelis kitauilis tein moajsi okachi taixpan. No ijkon, tein Biblia tayolmajxitia techpaleuia maj tikyektalikan kuejmolmej tein tikpiaj axkan. Nejon techpaleuia maj tiyolpakikan mojmostaj. Tein Biblia tamachtia temaka chikaualis uan kichiua maj se yolpaki (Salmo 19:7, 8). Uan no, Biblia kijtoua keniuj kineki Dios maj nemikan taltikpakneminij uan toni kineki maj mochiua nikan taltikpak. Tikmatiskej nejon techpaleuia maj tiyolpakikan axkan uan nochipaya.
Xikonkaua maj oksekin mitsonpaleuikan. Keman tikpiaj miak kuejmolmej, kemansa amo timosentiliajok iniuan tochankauan uan akin kuali iniuan timouikaj. Sayoj ke nejon amo techpaleuia porin Biblia kijtoua ke uelis kichiuas maj amo kuali titaixpejpenakan uan maj tikchiuakan teisa tein techijtakos (Proverbios 18:1). Tochankauan uan totasojikniuan uelis techpaleuiskej maj kuejmolmej amo techtapololtikan uan uelis techyolmajxitiskej keniuj uelis tikyektaliskej se ouijkayot (Proverbios 11:14). Oso xa sayoj uelis techyolseuiskej uan kichiuaskej maj tiyolpakikan, uan nejon techmakas chikaualis tein techpaleuis maj amo timosenkauakan hasta maj moyektali tein tikpanotokej (Proverbios 12:25).
Xikontataujti Dios. Biblia kijtoua: “Xikauili Jehová tein mitstekipachoua, uan yejua mitspaleuis. Amo keman kikauas maj uetsi akin yolmelauak”b (Salmo 55:22). Yejua ika moijtoua ke Jehová “techpaleuia maj tikchiakan tein kuali” (Romanos 15:13). Keman tikontataujtis, xikonilui nochi tein mitsontekipachoua uan xikonneltoka ke yejuatsin kiyolmachilia tein tikonpanotok (1 Pedro 5:7). Tein melauj, Biblia kijtoua: “Yejua kichiuas amo ximotsinkixtikan, namechchikauas, namechpaleuis amo xiuetsikan” (1 Pedro 5:10).
Xikonkaua maj ouijkayomej kichiuakan okachi xikonneltoka ke tikonselis tein kuali satepan. Itech Biblia Dios motenkaua: “Akin nechkaki yolseujkanemis, amo kimouilijtos maj kipano tein amo kuali” (Proverbios 1:33). Margaret, se siuat kayot Australia, kipoloj miak taman tein kipiaya keman se chikauak kiouaejekat kiuejuelouilij ichan. Sayoj ke amo moteltekipachoj, ta kiajsikamatik se taman tein motelneki, ke tein tikpiaj uelis niman tikpoloskej. Satepan ke kipanok nejon ouijkayot, yejua okachi kitayekanaltij tein yekmelauj kipia ipatiuj: ichankauan, itasojikniuan, kuali mouikas iuan Dios uan tein Biblia kijtoua ke tikseliskej satepan (Salmo 37:34; Santiago 4:8).
¿Toni kijtoua Biblia ke uelis tikseliskej tinochin?
Biblia kijtoua ke satepan okachi kuali tinemiskej uan ke taltikpak okachi kuali yeski, uan nejon amo uejkaua mochiuas. Ouijkayomej tein taltikpakneminij kipiaj axkan kinextia ke tinentokej “itech tonalmej keman tatamitiya” (2 Timoteo 3:1-5). Amo uejkaua, Dios peuasya tayektalis uan kiixpolos teikamauiltilis uan tajyouilis. Kichiuas nejin ika se tekiuajyot tein taixyekanas itech nochi taltikpak, tein moixmati kemej iTaixyekanalis Dios (Daniel 2:44; Apocalipsis 11:15). Jesús itech tanemilijtoya nejin taixyekanalis tein moajsi iluikak keman kichiuak netataujtil padrenuestro tein motelixmati. Ompa kijtoj: “Maj techixyekanaki moTaixyekanalis. Maj mochiua tein tikneki nikan taltikpak” (Mateo 6:9, 10).
Biblia senkis techiluia keniuj kineki Dios maj nemikan taltikpakneminij. Maj tikitakan seki taman tein iTaixyekanalis Dios kiixpolos:
Amo onkasok mayan. “Taltikpak kitemakas itakilo” (Salmo 67:6).
Amo onkasok kokolis oso kokoxkayot. “Nion se taltikpaknenkej kijtos: ‘Nimokokoua’” (Isaías 33:24).
Amo akinok momikilis. Dios motenkaua iniuan taltikpakneminij ke “kinuachilis nochi ininixayo, uan amo akin momikilisok, nion tayokoyas nion chokas nion tajyouis. Tamikya nochi tein achto techtajyouiltiaya” (Apocalipsis 21:3, 4).
a Keman tikchiaj teisa, tikchiaj porin tiknejnekij uan tikneltokaj ke uelis tikpiaskej. No uelis tikchiaskej teisa tein tiktelnekij maj pano, oso tein itech titakuaujtamatij ke techmakas tein tiknekij.
b Biblia kijtoua ke Dios monotsa Jehová (Salmo 83:18).