Dios motenkaua ke kualtsin tinemiskej

¿Tikonnemilia ke satepan uelis kualtsin tinemiskej? Maski axkan tikpanouaj miak ouijkayomej, miakej kinemiliaj ke satepan motayektalis. Sayoj ke, ¿yekmelauj uelis kualtsin tinemiskej? Kemaj. Biblia techiluia ke ijkon mochiuas.

¿Toni kijtoua Biblia ke mochiuas?

Biblia ika tajtoua nochi ouijkayomej tein axkan tikpanouaj, sayoj ke no kijtoua ke nochi nejon tamis. Maj tikitakan seki taman.

Kuejmol: amo nochin kipiaj ininchan

Tein kijtoua Biblia: “Kinchijchiuaskej kalmej uan ompa nemiskej” (Isaías 65:21).

Tein Dios kichiuati: Nochin kipiaskej ininchan.
Kuejmol: amo nochin kipiaj tekit uan amo kinajsi tomin

Tein kijtoua Biblia: “Akin nikinixpejpenak semi kinyolpaktis tekit tein kichiuaskej” (Isaías 65:22).

Tein Dios kichiuati: Nochin kipiaskej se tekit tein kiuelitaskej uan kinyolpaktis.
Kuejmol: tein amo kuali tein techchiuiliaj

Tein kijtoua Biblia: “Tayekananij tekiuajtiskej kemej kinpaleuiskej nochin” (Isaías 32:1).

Tein Dios kichiuati: Nochin kinpaleuiskej, amo akin yeski pobre uan amo kinchikoitaskej porin taman kemej ixtamati, porin kipia tomin oso amo.
Kuejmol: miakej amo yektakuaj uan oksekin amo kipiaj tein kikuaskej

Tein kijtoua Biblia: “Itech taltikpak mochiuas miak xinach, ininkuapan tepemej semi motachiuas” (Salmo 72:16).

Tein Dios kichiuati: Nochin kipiaskej tein kikuaskej. Amo akin mayantias keman kochitiuj uan nochin takuaskej hasta ixuiskej.
Kuejmol: miakej kintachtekiaj kinmiktiaj uan kinteuiaj

Tein kijtoua Biblia: “Sejse motalis tatampa de iuvajmekat uan tatampa de ihigokouit uan amo akinok kinmojmoujtis” (Miqueas 4:4).

Tein Dios kichiuati: Amo akin mouisok porin amo yetoskejok akin kichiuaj tein amo kuali, uan “akin yolmelaujkej ininaxka yeski taltikpak” (Salmo 37:10, 29).
Kuejmol: akin nemij itech se altepet moteuiaj iniuan akin nemij itech okse altepet

Tein kijtoua Biblia: “Amo momiktiskejok se ueyi altepet iuan okse, nion kimatiskejok keniuj tateuiskej” (Isaías 2:4).

Tein Dios kichiuati: Itech taltikpak amo akin moteuisok uan nochin yolseujkanemiskej (Salmo 72:7). Amo akin tajyouisok nion cholojtinemis porin moteuiaj. Uan amo no chokas porin momikiliaj ichankauan.
Kuejmol: kokolismej

Tein kijtoua Biblia: “Uan nion akin kijtos: ‘Nimokokoua’” (Isaías 33:24).

Tein Dios kichiuati: Amo akin kokolispeuasok uan akin amo uelij tajtouaj, tajtoskej, akin amo tachiaj, tachiaskej, uan akin amo uelij nejnemij, nejnemiskej (Isaías 35:5, 6). Biblia kiyekijtoua ke “amo akin momikilisok” (Apocalipsis 21:4).
Kuejmol: kiuejuelojtokej taltikpak

Tein kijtoua Biblia: “Yolpakiskej akin nemij taluakyan uan kampa tauaktok. Yolpakiskej akin nemij taluakyan uan kemej yeskia taxochiouas kemej azafrán” (Isaías 35:1).

Tein Dios kichiuati: Taltikpak mochiuas se kualtsin xochital kampa miakej kualtsin nemiskej ijkon kemej Dios kinekia ne uejkauj (Génesis 2:15; Isaías 45:18).

¿Tikonnemilia ke amo yekmelauj mochiuas nochi tein kijtoua Biblia?

Xa uelis tikonnemilis ke amo nochi tein kijtoua Biblia mochiuas. Sayoj ke, ¿keyej amo okachi timomachtia tein kijtoua Biblia tein panos satepan? Tein kijtoua Biblia ke panos amo yejua tein miakej kinemiliaj ke mochiuas nikan taltikpak. Tein kijtoua Biblia yejua tein Dios kijtoua. ¿Keyej uelis tikneltokaskej tein Dios kijtoua? Maj tikitakan ome taman tein uelis techpaleuis:

Uelis titakuaujtamatiskej iuan Dios. Biblia kijtoua ke Dios “amo ueli takajkayaua” (Tito 1:2). Uan no sayoj Dios ueli kijtoua tein panos satepan (Isaías 46:10). Itech Biblia miakpa nesi ke tein Dios kijtoua ijkon mochiua. Komo tikonneki tikonmatis okachi, xikonita video ¿Keyej uelis tikneltokaskej ke melauak tein kijtoua Biblia?
Dios uelis kiyektalis nochi kuejmolmej tein tikpiaj. Biblia kijtoua ke Dios uelis kichiuas nochi tein yejua kineki (Salmo 135:5, 6). Nejin kijtosneki ke amo teyi uelis kitsakuilis Dios para maj kichiua tein achto kijtojka. Yejua kineki techpaleuis porin techtasojta (Juan 3:16).

Sayoj ke xa timotajtania: “Komo Dios ueli kiajchiua kuejmolmej, uan kineki techpaleuis, ¿keyej tikpiajok kuejmolmej?”. Komo tikonneki tikonmatis keyej tiksentokaj tikpanouaj kuejmolmej uan titajyouiaj, xikonita video ¿Keyej Dios kikaua maj onka tajyouilis?

¿Keniuj mochiuas tein Dios kijtoua itech Biblia?

Dios kikuis iTaixyekanalis tein yetok ne iluikak para kichiuas tein kijtoua. Kiixtalij Jesús para maj yejua taixyekana, uan kikauak maj kiixyekana taltikpak uan akin ompa nemij. Keman Jesús yetoya nikan taltikpak kinpajtij akin mokokouayaj, kintamakak miakej, kitsakuilij kiouaejekat uan hasta kichiuak maj oksepa nemikan sekin akin momikilijkaya (Marcos 4:39; 6:41-44; Lucas 4:40; Juan 11:43, 44). Ika nejon kinextij toni kichiuas keman tekiuajtis itech iTaixyekanalis Dios.

Komo tikonneki tikonmatis keniuj mitsonpaleuis iTaixyekanalis Dios, xikonita video ¿Toni iTekiuajyo Dios?

¿Kemanian mochiuas tein Dios motenkaua itech Biblia?

Amo uejkaua. ¿Keyej ijkon tikijtouaj? Porin Biblia kijtoj seki taman tein panoskia uan ijkon kinextiskia ke iTaixyekanalis Dios amo uejkaua peuaskia taixyekanas nikan taltikpak (Lucas 21:10, 11). Axkan tikitaj ke mochiujtok nochi tein Biblia kijtojka.

Komo tikonneki tikonmatis okachi, xikonlero tamachtilis “¿Kemanian taixyekanas iTekiuajyo Dios nikan taltikpak?”.

¿Keniuj uelis mitsonpaleuis tein Dios motenkaua kichiuas tein moajsi itech Biblia?

Semej akin kijkuiloj Biblia kijtoj ke tein Dios motenkaua “techpaleuia itech tonemilis kemej se tepos tein ika motsikoua barco” (Hebreos 6:19). Ijkon kemej se tepos kipaleuia se barco para maj amo moixkepa keman chikauak kiouaejeka, tikmatiskej ke kualtsin tinemiskej satepan no techpaleuia maj titaxikokan keman tikpanoskej ouijkayomej. Uan nejon tein Dios motenkaua itech Biblia ke kichiuas techpaleuia maj amo timoteltekipachokan, maj tiyolpaktokan uan maj kuali tietokan (1 Tesalonicenses 5:8).