¿Keyej política semi taxeloua? | ¿Toni kijtoua Biblia?

Noyampa taltikpak, itech miak altepemej semi xexeliujtokej porin kipaleuiaj tataman partido político. Itech xiuit 2022, akin tekitij itech centro de investigación Pew Research Center, kintajtanij akin nemij itech 19 países keniuj yetokej itech ininaltepeuj. Uan “65% kijtojkej ke semi xexeliujtokej porin kipaleuiaj tataman partido político”.

¿Tikonitani ke no xexeliujtokej kampa tionnemi porin kipaleuiaj tataman partido político? ¿Keyej panoua nejon? ¿Uelis moyektalis? Maj tikitakan tein kijtoua Biblia.

Tein kichiua maj moxexelokan

Biblia kijtojka keniuj tanemiliskiaj miakej itech totonaluan tein moixmati kemej “tonalmej keman tatamitiya”, uan nejon kichiuaskia maj semi xexeliujtokan.

• “Itech tonalmej keman tatamitiya, tein mochiujtos semi ouij yeski uan tamouilil. Porin tel miakej sayoj yejuan motasojtaskej; [...] amo kinekiskej moyektenkauaskej iniuan oksekin” (2 Timoteo 3:1-3).

Maski miakej semi kitemouaj maj kuali taixyekanakan tekiuanij, amo ueli mochiua. Semi tataman tanemiliaj uan moixnamikij, uan nejon kichiua maj kinouijmaka sentekitiskej, oso senkis amo ueli sentekitij, para kimelauaskej kuejmolmej. Yejua ika mochiua tein Biblia kijtojka ne uejkauj.

• “Takat kiixyekanani takat uan sayoj kitajyouiltia” (Eclesiastés 8:9).

Sayoj ke Biblia kinextia ke moajsi se taixyekankej oso tekiuaj akin uelis kitamis nochi kuejmolmej tein axkan techtajyouiltia.

Se taixyekankej akin kiyolmachilia tein techpanotok

Biblia kinextia ke moajsi se taixyekankej akin kemaj uelis kitamis kuejmolmej tein axkan onkak. Nejon taixyekankej yejua Jesucristo. Yejua kipia chikaualis, tanauatil uan kinejneki kichiuas maj yolseujkanemikan uan maj amo xexeliujtokan akin nemij nikan taltikpak.

• “Keman taixyekantos akin yolmelauak kualtsin nemis, nochin semi yolseujkanemiskej” (Salmo 72:7).

• “Akin nemij itech nochi altepemej kitekitiliskej” (Salmo 72:11).

Jesús semi kuali taixyekanas porin kiyolmachilia tein techpanotok uan kineki techpaleuis, uan semi kinpaleuis akin kintajyouiltianij.

• “Yejua kimakixtis pobre akin tsajtsi maj kipaleuikan, no akin tajyouijtok uan akin amo kipia akoni kipaleuis. Kiiknelis akin tajyouijtok uan amo teyi kipia, uan kinmakixtis pobres. Kinmakixtis de akin kintajyouiltia uan kinkojkokoua” (Salmo 72:12-14).

Xionmomachti toni iTaixyekanalis Dios kampa Jesús yejua taixyekankej. Xikonmati keniuj uelis tikonselis tein kiualkuis uan keniuj tionmokauas maj mitsonixyekana.

• Xikonita video ¿Toni iTekiuajyo Dios?

• Xikonlero tamachtilis “ITekiuajyo Dios: se taixyekanalis tein melauak”.