Amo takuaujtamatijok iniuan políticos | ¿Toni kijtoua Biblia?

Itech xiuit 2024, noyampa taltikpak okachi tekiuajixtaliskej kemej amo keman moitstoya itech sayoj se xiuit. Sayoj ke miakej amo takuaujtamatijok iniuan políticos.

• Ompa Estados Unidos kintajtanijkej keniuj kiitayaj nejin taman, uan miakej kijtojkej “ke miakej políticos kitemouaj sayoj yejuan mopaleuiskej”, uan amo kitemouaj tapaleuiskej (centro de investigación Pew Research Center, 19 de septiembre de 2023).a

Miakej telpochmej uan ichpochmej no ijkon amo takuaujtamatij iniuan políticos.

• “Moitani ke miakej telpochmej uan ichpochmej kinejnekij maj momelaua uejueyi kuejmolmej, sayoj ke keman kintajtaniaj ox aksa uelis kichiuas nejon, amo kichiaj maj políticos kimelauakan nejon” (The New York Times, 29 de enero de 2024).

• “Keman kintajtanijkej seki taman, telpochmej uan ichpochmej kijtojkej ke takuaujtamatij itech videos tein kitaliaj itech youtube tein miakej kiuelitaj, uan amo takuaujtamatij iniuan políticos” (The Korea Times, 22 de enero de 2024).

Komo ijkon, ¿uelis titakuaujtamatiskej ke políticos tapaleuiskej maj okachi kuali tietokan? ¿Akoni iuan uelis titakuaujtamatiskej?

Xikita akoni iuan titakuaujtamati

Moneki kuali tikitaskej akoni iuan titakuaujtamatiskej. Biblia kijtoua ke “akin amo tamatkej kineltoka nochi tein kiluiaj, sayoj ke akin tamatkej kuali kiita kani taksas” (Proverbios 14:15).

• ¿Keniuj uelis tikmatis akoni kijtoua tein melauak uan akoni sayoj takajkayaua? Nejin tamachtilis mitspaleuis xikmati: “Cómo protegerse de la información falsa”.

Uan no, maski moajsiskej políticos akin amo takajkayauaskej uan kinekiskej tapaleuiskej, amo kipiaj chikaualis para kipataskej teisa. Yejua ika, Biblia techiluia nejin:

• “Amo xitakuaujtamatikan iniuan ueyichiuanimej, nion iuan okse takat, porin amo uelij temakixtiaj” (Salmo 146:3).

Se taixyekankej akin uelis iuan titakuaujtamatis

Biblia kimelaua ke Dios kiixtalij se taixyekankej akin okachi takuaujtamach uan akin kemaj uelis tayektalis, uan nejin yejua Jesucristo (Lucas 1:32, 33). Jesús yejua Tekiuaj itech itaixyekanalis Dios, se taixyekanalis tein moajsi iluikak (Mateo 6:10).

• Xikita keyej uelis titakuaujtamatis iuan Jesús uan toni kichiuas para kimelauas kuejmolmej tein axkan tikpiaj. Xiklero nejin ome tamachtilis “¿Akoni taixyekana itech iTekiuajyo Dios?” uan “¿Toni kichiuas iTekiuajyo Dios?”.