¿Keyej itaixpantijkauan Jiova kinkalpanouaj akin kipiajya se taneltokalis?

Tikitanij ke miakej akin kipiaj se taneltokalis kiuelitaj tajtoskej ika tein kijtoua Biblia. Sayoj ke, tikmatij ke sejse ueli kiixpejpena tein kineki kineltokas, uan yejua ika amo akin tikchikaujkauiaj maj techkaki.

Keman titajtouaj ika tein kineltokaj, tiktemouaj tikchiuaskej ijkon kemej tanauatia Biblia uan titajtouaj ika “yolyemanalis”, uan tiknextiliaj “mouisyot” akin iuan titajtouaj (1 Pedro 3:15). Tikmatij ke amo nochin techkakiskej (Mateo 10:14). Maski ijkon, titajtouaj iniuan oksekin porin sayoj ijkon tikmatiskej keniuj technankiliskej. Uan no, tein kipanoua sejse taltikpaknenkej uelis mopatas.

Kemej neskayot, se akin se tonal kipiaya miak tekit xa uelis touan tajtos okse tonal keman amo semi kipias tekit. Uan no, yejuan xa uelis kipanoskej miak taman itech ininnemilis tein kichiuas maj kitemokan nepaleuil itech Biblia. Yejua ika miakpa tiktemouaj iniuan titajtoskej.