¿Toni moneki tikchiuaskej para tikajsikamatiskej tein kijtoua Biblia?

Tein Biblia kijtoua

Mismo Biblia kijtoua toni moneki tikchiuaskej para tikajsikamatiskej. Tein Dios techiluia itech iTajtol nochin uelis kimatiskej uan ‘amo tel ouij para tikajsikamatiskej’ (Deuteronomio 30:11).

Toni moneki tikchiuaskej

1. Tikpiaskej se kuali tanemilil. Moneki amo tiknemiliskej ke tejuan okachi tikmatij, ta moneki tikajsikamatiskej ke Biblia iTajtol Dios. Yejua kinixtopeua akin moueyimatij (1 Tesalonicenses 2:13; Santiago 4:6). Yejua ika, amo sayoj moneki tikneltokaskej teisa porin aksa techiluia ta Dios kineki maj tiktekitiltikan totanemilil para maj kuali tikajsikamatikan keyej tikneltokaj teisa (Romanos 12:1, 2).

2. Maj tiktajtanikan Dios maj techpaleui. Biblia kijtoua itech Proverbios 3:5: “Amo [xitakuaujtamati] itech tein tejua tikmati”. Semi moneki maj tiksentokakan tiktajtanikan Dios maj techpaleui maj tikajsikamatikan iTajtol (Santiago 1:5).

3. Maj nochipa timomachtikan. Komo nochipa timochikauaj timomachtiskej Biblia okachi techpaleuis ke komo sayoj kemansa tikchiuaj (Josué 1:8).

4. Maj timomachtikan por temas. Se taman tein techpaleuis maj tikajsikamatikan tein Biblia tamachtia yejua timomachtiskej por temas. Kuali yeskia komo tipeuaj timomachtiaj se taman tein amo semi ouij se kiajsikamatis uan satepan timomachtiskej tein techpaleuis maj okachi titakuaujtamatikan (Hebreos 6:1, 2). Keman tiklerouaj seki versículos tein kipia Biblia, tikitaj ke momelaua ika seki taman tein no ompa kijtoua, uan nejon techpaleuia maj tikajsikamatikan hasta tein okachi ouij (2 Pedro 3:16).

5. Moneki maj techpaleuikan. Biblia techiluia maj tiktemokan maj aksa techpaleui maj okachi tikajsikamatikan Biblia (Hechos 8:30, 31). Itaixpantijkauan Jehová kitemakaj nemachtil ika Biblia tein amo moneki se kiixtauas. Ijkon kemej yekinika imomachtijkauan Cristo kichiuayaj, axkan no kinmachtiaj oksekin uan kinmelauiliaj ika Biblia tein kinpaleuis maj kiajsikamatikan tein melauak (Hechos 17:2, 3).

Tein amo moneki

1. Amo moneki tiktelmatiskej miak taman nion kanachi xiujmej timomachtijkej escuela. 12 itatitaniluan Jesús uelik kuali kiajsikamatkej iTajtol Dios uan kinmachtijkej oksekin maski miakej kinemiliayaj “ke amo ueyichiuanimej katkaj uan amo semi taixmatiaj” (Hechos 4:13).

2. Amo moneki tikpiaskej miak tomin. Para timomachtiskej Biblia amo moneki titaxtauaskej. Jesús kiniluij imomachtijkauan: “Amo nantaxtaujkej keman namechmakakej, amo no xitetaxtaualtikan keman nantemakaskej” (Mateo 10:8).