¿Toni moneki nikchiuas komo nikneki niyeski itaixpantijkauj Jiova?
Itech Mateo 28:19, 20, Jesús kinextij toni moneki se kichiuas uan ijkon uelis se mochiuas itaixpantijkauj Jiova. Nejin versículos kinextiaj ke, komo tiknekij timochiuaskej imomachtijkauan Jesús, moneki ika titajtoskej Jiova oso tikteixmatiltiskej.
Yekinika: Se momachtis tein kijtoua Biblia. Jesús kintitanik imomachtijkauan maj kinmachtitij oksekin uan maj kinnextilianij tein yejua kinnauatij (Mateo 28:19, 20). Tajtol momachtijkej kijtosneki “aksa akin kimachtijtokej”. Itech Biblia, okachi kampa ika tajtoua itamachtilisuan Jesús tikonajsis tein mitsonpaleuis xionyolpaki itech monemilis uan xikonchia tein kuali satepan (2 Timoteo 3:16, 17). Ika miak pakilis timitsonnextiliskej tein Biblia tamachtia ika se nemachtil tein amo moneki tikonixtauas (Mateo 10:7, 8; 1 Tesalonicenses 2:13).
Ojpatika: Se kichiuas tein se momachtia. Jesús kijtoj ke imomachtijkauan moneki kichiuaskej nochi tein tanauatij uan amo sayoj momachtiskej (Mateo 28:20). Nejin kijtosneki ke nemachtil ika Biblia amo yeski teisa tein ika tiktekitiltiskej totanemilil. Xa tejuatsin monekis tikonpatas keniuj tiontanemilia uan tein tikonchiua (Hechos 10:42; Efesios 4:22-29; Hebreos 10:24, 25). Akin kitakamatij itanauatiluan Jesús kinyololinia maj kichiuakan kemej yejua, yejua ika kiixtaliaj motemaktiskej iuan Jiova (Mateo 16:24).
Expatika: Se moauis (Mateo 28:19). Biblia kinextia neauilis kemej ijkuak aksa kitalpachouaj (no xikonita Romanos 6:2-4). Neauilis kinextia ke tikaujkejya nemilis tein tikpiayaj achto uan tikpeualtijkej se yankuik. Yejua ika, keman tionmoauia tikonnextia senteixtenoj ke tikonchiuakya yekinika ome taman tein Jesús kijtoj uan ke tikontajtania Dios se kuali tanemilil (Hebreos 9:14; 1 Pedro 3:21).
¿Keniuj uelis nikmatis ox uelisya nimoauis?
Xikonilui tayekananij itech nechikol. Yejuan mouan tajtoskej uan ijkon kiitaskej ox yekmelauj tikonajsikamati tein Biblia tamachtia, ox tikonchiujtokya tein tionmomachtia uan ox tionmotemaktijya iuan Dios porin tejuatsin ijkon tikonixtalij (Hechos 20:28; 1 Pedro 5:1-3).
¿No ijkon moneki kichiuaskej ininkoneuan itaixpantijkauan Jiova?
Kemaj. Tejuan tikiniskaltiaj tokoneuan “itech itamachtilis uan itayolmajxitilis Jiova” ijkon kemej kijtoua Biblia (Efesios 6:4). Sayoj ke, ijkuak moskaltiaj, yejuan moneki kiixpejpenaskej komo kinekij momachtiskej, kiseliskej uan kitakamatiskej tein Biblia tamachtia uan ijkon uelis moauiskej (Romanos 12:2). Tein melauj, tisejsemej moneki tikixpejpenaskej ox tikueyichiuaskej Jiova oso amo (Romanos 14:12; Gálatas 6:5).