¿Yekmelauj tetsaujkakiouik itech itonaluan Noé?

Tein Biblia kijtoua

Kemaj yekmelauj tetsaujkakiouik ne uejkauj. Dios kichiuak maj kioui para kinixpolos akin amo yolkualmej. Uan kiluij Noé maj kichijchiuani se barco para maj momakixtianij akin yolmelaujkej uan tapialmej (Génesis 6:11-20). Uelis tikneltokaskej ke yekmelauj tetsaujkakiouik porin Biblia ijkon kijtoua uan Biblia “ualeua imako Dios” (2 Timoteo 3:16).

• ¿Yekmelauj panok oso sayoj motetapouia?

• ¿Keyej Dios kichiuak maj tetsaujkakioui?

• ¿Akin nemiaj itech nejon tonalmej kimattoyaj ke tetsaujkakiouiskia?

• ¿Keniuj katka barco tein kichijchiuak Noé?

• ¿Itech kanachi xiujmej Noé kichijchiuak barco?

• Miak taman tein motetapouia de tetsaujkakiouit

¿Yekmelauj panok oso sayoj motetapouia?

Biblia kijtoua ke Noé yekmelauj nemik uan ke yekmelauj tetsaujkakiouik. Yejua ika amo sayoj se taman tein motetapouia.

• Akin kijkuilojkej Biblia kineltokayaj ke Noé yekmelauj nemik. Kemej Esdras uan Lucas, akin kuali momachtiayaj, no kijkuilojkej itokay Noé iniuan akin poujtoyaj kemej kalyetonij de xolal Israel (1 Crónicas 1:4; Lucas 3:36). Keman Mateo uan Lucas tajkuilojkej, no kijkuilojkej tein Jesús kijtoj de tetsaujkakiouit itech itonaluan Noé (Mateo 24:37-39; Lucas 17:26, 27).

  Uan no, Ezequiel uan tatitanil Pablo keman ika tajtojkej Noé, kijtojkej ke semi takuaujtamatia uan kichiuaya tein kuali (Ezequiel 14:14, 20; Hebreos 11:7). ¿Tajtoskiaj Ezequiel uan Pablo de aksa akin amo keman nemik? Noé uan okseki takamej uan siuamej technextilijkej keniuj moneki titakuaujtamatiskej porin yekmelauj nenkej (Hebreos 12:1; Santiago 5:17).

• Biblia techiluia seki taman tein panok keman tetsaujkakiouik. Biblia kijtoua itech toni xiuit, metsti uan tonal tetsaujkakiouik (Génesis 7:11; 8:4, 13, 14). No kijtoua kanachi metros kipiaya in barco uan keniuj chijchiujtoya (Génesis 6:15). Nochi nejin kinextia ke Biblia ika tajtoua tetsaujkakiouit kemej se taman tein yekmelauj panok.

¿Keyej Dios kichiuak maj tetsaujkakioui?

Biblia kijtoua ke achto ke mochiuaskia tetsaujkakiouit, “akin nemiaj nikan taltikpak okachi kichiuayaj tein amo kuali” (Génesis 6:5). Uan “toTajtsin Dios kiitak ke itech taltikpak fiero tachiujtoya” porin auilnemiaj uan kampa yeski moteuiayaj (Génesis 6:11; Judas 6, 7).

Biblia kijtoua ke nejin panok porin seki ángeles akin amo yolkualmej ualtemokej de iluikak uan auilnenkej iniuan siuamej. Nejin ángeles kinpiakej konemej iniuan nejon siuamej uan kinixmatiaj kemej nefilim, uan yejuan semi kintajyouiltijkej oksekin (Génesis 6:1, 2, 4). Dios kiixtalij kinixpolos akin amo yolmelaujkej katkaj para maj akin yolmelaujkej kuali nemikan uan maj momiakilikan (Génesis 6:6, 7, 17).

¿Akin nemiaj itech nejon tonalmej kimattoyaj ke tetsaujkakiouiskia?

Kemaj. Dios kiluij Noé tein yaya kichiuati uan kinauatij maj kichijchiua se barco para ompa kalakiskia iuan ichankauan uan tapialmej, ijkon momakixtiskiaj (Génesis 6:13, 14; 7:1-4). Noé kinmatiltij oksekin ke tetsaujkakiouiskia sayoj ke amo akin kineltokilij (2 Pedro 2:5). Biblia kijtoua: “Amo takakkej hasta ke tetsaujkakiouik uan kintamiuikak at” (Mateo 24:37-39).

¿Keniuj katka barco tein kichijchiuak Noé?

In barco katka se ueyi cajón, tein ueyak katka 134 metros, patauak 22 metros uan uejkapan 13 metros.a Chijchiujtoya ika kouit tein chokiloj. Taijtikkopa uan kalankopaka kipiaya chapopote. Kipiaya eyi piso uan kipiaya miak cuartos. Tanakastankopa kipiaya se puerta, uan hasta ajko kipiaya se ventana. Tein ika kuatsaktoya xa amo katka tamanis para amo mosentiliskia at (Génesis 6:14-16).

¿Itech kanachi xiujmej Noé kichijchiuak barco?

Biblia amo kijtoua kanachi xiujmej pero kemaj kiuikilij miak tiempo. Noé kipiaya panoua 500 xiujmej keman yolik yekinika ikoneuj uan kipiaya 600 xiujmej keman tetsaujkakiouik (Génesis 5:32; 7:6).b

Xa Dios kinauatij Noé maj kichijchiuani barco kemej 50 oso 60 xiujmej satepan ke nenkej ikoneuan, keman moskaltijkajyaj uan monamiktijkayaj (Génesis 6:14, 18). Komo ijkon panok, tiknemiliaj ke uejkauak kemej 40 o 50 xiujmej para kitamichijchiuak barco.