Canal JW ajsi hasta kampa internet amo ajsi

Mejmetstika ika miak pakilis tikchiaj tikitaskej programas uan videos tein kintejkoltiaj itech JW Broadcasting tein techyolchikauaj. Sayoj ke, miakej tokniuan akin nemij África amo ueli kiitaj nejin itech internet. ¿Keyej?

Miakkan ompa África amo semi onkak internet. Uan kampa kemaj onkak, amo ijsiujka tekiti uan tel patiyoj. Se tokniuj takalpanojkej itech circuito ompa Madagascar, kitemouij programa de JW Broadcasting itech se ciber uan monekik kiixtauas 16 dólares.a Nejin okachi miak tomin ke tein kitanij itech se semana.

Maski amo kipiaj internet, millones ompa África ueli kiitaj JW Broadcasting. ¿Keniuj kichiuaj?

Itech xiuit 2017, akin nemij ompa África subsahariana peujkej kiitaj JW Broadcasting itech se canal de televisión tein kikui satélite. Nejin canal mopanoltia nochi tonal uan nochi semana itech 16 tataman tajtolmej.

Yejua ika, itaixpantijkauan Jehová kikoujkej se programa de televisión tein tekiti ika satélite para kipanoltiskej videos. Nejin señal tein tekiti ika satélite, ajsi kemej itech 35 altepemej ompa África subsahariana, uan kiixtauaj panoua 12,000 dólares mejmetstika. Kemansa kiixtauaj okachi para kipanoltiskej itech okse canal tamachtilis tein motemakatos nejon tonal. Nejin tapaleuia para maj miakej kiitakan uejueyi nechikolmej tein uejkaua eyi tonal uan no ueli kiitaj tanojnotsmej tein kitemaka se tokniuj akin tekiti itech ueyi kali kampa techixyekanaj keman kititanij maj takalpanoti itech se kali Betel.

Miakej akin itaixpantijkauan Jehová uan akin amo, kiitaj nejin canal itech inintelevisión. Sayoj ke, miakej tokniuan amo kinajsi tomin para kikouaskej tein moneki para uelis kiitaskej. Yejua ika, kitalianij teposmej tein kitilana señal ika satélite itech 3,670 Kalmej kampa tiMosentiliaj. Ijkon tokniuan ueli kiitaj JW Broadcasting. Para kikouaskej uan para kititaniskej taxtauaj kemej 70 dólares komo Kali kampa tiMosentiliaj kipiaya televisión oso toni ika kiitaskej. Uan komo amo teyi kipiaj moneki taxtauaskej hasta 530 dólares.

Tokniuan semi motasojkamatij porin kipiaj nejin canal. Se tayekankej akin kayot Camerún kijtoua: “Nochankauan uan nejua tikitaj nejin kemej maná kampa tauaktok”. Odebode, se tokniuj akin nemi Nigeria, kijtoua: “Nimosentilia iniuan nochankauan expa semana para tikitaskej nejin canal. Nokoneuan nochipa kichixtokej maj ajsi nejon tonal. Uan no, okseki tonalmej tajtanij maj tikintalilikan nejon canal”. Rose, akin no nemi Nigeria, techtapouia: “¡Semi niyolpaki! Achto, semi nikitaya canal kampa kipanoltiaj tanauatilmej, sayoj ke axkan okachi nikneki nikitas canal JW. Keman nikitaya canal kampa kipanoltiaj tanauatilmej, ijsiujka nikualania uan kichiuaya maj amo kuali nimomachili. Sayoj ke canal JW semi kualtsin uan nechpaleuia maj niyolseujto, yejua canal tein semi nikuelita uan nikita kemej se itatiochiualis Jehová”.

Se tokniuj akin takalpanoua itech circuito ompa Mozambique, kijtoua ke itech Kalmej kampa tiMosentiliaj kitalijkej teposmej tein tekitij ika satélite para uelis kiitaskej canal JW. Tokniuan kiixtalijkej ajsiskej se hora achto ke peuas ininnechikol para ijkon uelis kiitaskej JW Broadcasting.

Itech uejueyi nechikolmej kampa mosentiliaj akin kayomej itech okseki altepemej, tein mochiuak itech xiuit 2019 ompa Johannesburgo (Sudáfrica), kikuikej nejin canal para kipanoltiskej itech okseki chiknaui xolalmej seki tanojnotsmej kemej tein kitemakak semej tokniuan akin poui iniuan Oloch Taojtokaltianij. Sphumelele, akin tekiti itech Departamento Local de Broadcasting itech kali Betel ompa Sudáfrica, kijtoua: “Achto tikuiaj internet para tikpanoltiskej tanojnotsmej. Yejua ika monekia tikpiaskej internet tein kuali tekiti oso tikouaskej datos. Keman peuak tikpanoltiaj tamachtilismej itech canal tein tekiti ika satélite, okachi amo patiyoj katka uan amo kokotonia”.

Semi timotasojkamatij porin nankitemakaj tomin ika nochi namoyolo, uan ijkon tokniuan ompa África ueli kiitaj JW Broadcasting, itech canal tein tekiti ika satélite. Miak tasojkamatik porin nantapaleuiaj ika namotomin para maj mosentoka motanojnotsa uan nankitemakaj itech donate.jw.org.