Se kaxontsin tein techpaleuia maj okachi titakuaujtamatikan

Tiitaixpantijkauan Jehová, axkan okachi tikpiaj miak amaixmej uan videos itech Internet. Sayoj ke, itech miak altepemej, tokniuan amo ueli kiixtauaj Internet. Oksekin nemij kampa Internet kokotoni, amo yektekiti oso amo onkak.

Sayoj ke axkan, miakej tokniuan uelis kintemoltiskejya toamaixuan maski amo kipiaskej Internet. ¿Keniuj?

JW Box se kaxontsin tein kintitaniliaj tokniuan itech nechikolmej kampa amo semi onkak Internet. Nejin kaxontsin se taman tein kiluiaj rúter tein kikouiliaj se ueyi kaltanamakaloyan. Tokniuan akin tekitij itech Departamento de Computación ompa Betel, kichijchiujkej se programa itech computadora uan ompa kintalijkej videos uan amaixmej tein yetokej itech jw.org. Se kaxontsin kikouaj ika 75 dólares.

Itech Kali kampa tiMosentiliaj, tokniuan kikuij wifi ika inincelular para kalakiskej itech JW Box uan ijkon uelis kintemoltiskej amaixmej uan videos. Hasta tokniuan akin kipiaj celulares tein okachi uejkaujkayomej oso tein amo patiyojkej uelij kalakij itech JW Box tein kemej yeskia Internet. Sayoj ke, komo tokniuan itech se nechikol amo kipiaj Internet, ¿keniuj JW Box ueli kipia amaixmej uan videos tein okachi yankuikej? Tokniuan akin tekitij Betel kintitanilijtokej tokniuan itech nechikolmej memorias USB, tein ipatiuj kemej 4 dólares uan kipia tein okachi yankuik tein kisa itech jw.org. Nejin memorias USB kintenpilouaj itech JW Box para maj tokniuan uelikan kitemoltikan tein okachi yankuik.

¿Keniuj kinpaleuiani tokniuan JW Box? Nathan Adruandra, akin nemi ompa República Democrática del Congo, kijtoua: “Miakpa niknekia nikintemoltis tamouisolmej “Jiova, mouan nitakuaujtamati” uan Xikelnamikikan isiuauj Lot, sayoj ke amo keman niuelik. Nejon nechtayokoltiaya. Axkan uelia nikintemoltia videos itech nocelular, uan nejin techpaleuia maj tikinmachtikan tokoneuan”.

Se tokniuj akin kinpaleuia tokniuan itech nechikolmej maj kitalikan JW Box ompa Nigeria, kijtoua: “Tokniuan kiitaj ke Jehová kintayokoliani JW Box. Semi yolpakij porin axkan amo kinouijmaka kitemoltiskej amaixmej uan videos tein ika titamachtiaj”.

Kintitanilijkejya tokniuan itech nechikolmej ompa África, Oceanía uan Sudamérica panoua 1,700 JW Box, uan moixtalijtok kintitaniliskej okseki tokniuan itech nechikolmej. ¿Keniuj moixtaua nochi nejin? Ika tomin tein motemaka para maj mosentoka motanojnotsa. Miakej kitemakaj itech donate.jw.org. Tasojkamatik porin nantapaleuiaj.