Itech nejin ueyi kokolis kinpaleuiaj noyampa taltikpak

Itech marzo de 2020, keman Organización Mundial de la Salud kitematiltij ke COVID-19 katka se ueyi kokolis, miakej amo kinemiliayaj ke taijtakoskia panoua se xiuit. Uan no, noyampa taltikpak itaixpantijkauan Jiova uan akin amo itaixpantijkauan Jiova, kinualkuiliani tajyouilis, netekipacholis uan tatasojtilis. ¿Keniuj itaixpantijkauan Jiova kitemouanij kinpaleuiskej ininikniuan itech nejin ueyi ouijkayot?

Kinpaleuiaj akin kinpoloua

Ika inintaixyekanalis Oloch Taojtokaltianij itechkopa Oloch Tokniuan akin Taixyekanaj, moixtalianij noyampa taltikpak panoua 950 Oloch Tokniuan akin kiitaj maj motemaka nepaleuil itech nejin ueyi kokolis COVID-19. Kemansa, nejin tokniuan kitemouanij kisentiliskej nepaleuil, uan kemansa, itaixpantijkauan Jiova kiselianij nepaleuil tein kitemakaj tekiuanij. Uan no, nejin Oloch Tokniuan kiitanij maj motemaka nepaleuil noyampa taltikpak.

Se neskayot yejua tein kichiujkej ompa Paraguay. Itech se periódico motematiltij ke nejin ueyi kokolis kichiuak maj miakej akin kayomej Paraguay amo kinajsi tein kimajseuaskej. Sayoj ke Oloch Tokniuan akin kiita maj motemaka nepaleuil ompa Paraguay, peujkajya kitemajmakaj nepaleuil tein kinajsiskia ome semana. Nejin nepaleuil, tein ipatiuj kemej 30 dólares, kipiaya takual, xapoj uan okseki taman tein kinajsiskia nauin akin moajsiskiaj kalijtik.

¿Keniuj moyekpiaj tokniuan akin tapaleuiaj uan oksekin, maj amo momauakan ika COVID-19? Yejuan nochipa tenpiktokej uan amo oloch yetokej. Uan sayoj kikouaj takual kampa senkis moyekpiaj ika nejin ueyi kokolis. No kiyekitaj maj nochin akin kisakaj takual maj kipiakan tein ika moyekpiaskej ika nejin kokolis, maj kichipauakan inincarro uan maj kitalilikan tein kimiktis virus, uan maj kisentilikan takual kampa tachipaualaj. Uan akin kixejxelouaj takual amo kinnetechouaj tokniuan akin kinmaktiliaj nepaleuil.

Kuali moita keniuj mokuis nepaleuil ika tomin

Itech enero de 2021, tokniuan Oloch Taixyekananij kiixtalijka maj mokui panoua 25 million de dólares tein ika kinpaleuiskej akin semi kinijtakouani COVID-19. Sucursales uan Oloch Tokniuan akin kiitaj maj motemaka nepaleuil, kuali kitekitiltiaj nejin nepaleuil ika tomin uan kitemouaj kiajsiskej maj amo semi patiyoj tein moneki kikouaskej. Kemej neskayot, ompa Chile, tokniuan akin kinixtalijkej maj kitemakakan nepaleuil, kinekiaj kikouaskej 750 kilos de lentejas. Sayoj ke nejon metsti pankisak ipatiuj okse achiok ke tein ipa katka ipatiuj. Ome hora satepan ke tokniuan kiluijkaj tanamakakej ke kinekiaj maj kinnamakilti lentejas maski semi patiyoj, tanamakakej kiniluij ke okse takoujkej amo kinekiaok lentejas tein tajtanka. Yejua ika, tanamakakej kiniluij ke kinnamakiltis lentejas amo ika ipatiuj tein yekinika kiniluijka, ta kemej katka ipatiuj se metsti achto.

Sayoj ke keman tokniuan kikuitoj lentejas, tanamakakej kitemoj motajtolkepas porin kintajtakoltij ke yejuan techichikomakaj nepaleuil kemej kichiuanij okseki taltikpaknechikolmej. Semej tokniuan kichiujtiuetsik se netataujtil itech iyolo uan kiluij tanamakakej ke itech sejse nechikol kuali moitakaya akonimej yekmelauj kinpoloua nepaleuil. Yejuan no kimelauilijkej ke kemej tokniuan seseko kayomej, tataman tein kinmakaskiaj kalyetouanij porin kinmakaskiaj tein yekmelauj kinpaleuiskia. Uan no, kiluijkej tanamakakej ke nochi tomin tein kikuij itaixpantijkauan itech nejin tekit, motemakani kemej se nepaleuil. Semi kimoujkakakik nejon. Yejua ika kinnamakiltij lentejas ika ipatiuj tein kiniluijka achto, uan iuanok, keman ika ojpa kikouatoj lentejas, kintayokolij 400 kilos.

“Yekmelauj motasojtaj”

Lusu, se toknitsin viuda akin xiuejya, nemi iniuan makuil ichankauan ompa Liberia. Se tonal keman almasalojtoyaj uan kiitstoyaj texto tein moita mojmostaj, iixuiuj Lusu akin kipia chikome xiuit, kiitak ke amo onkayaok takual kalijtik. Yejua ika tajtanik: “¿Uan axkan toni tikuatij?”. Lusu kiluij ke kitataujtijkaya Jiova maj kinpaleuiani uan ke takuaujtamatia ke kinmakaskia tein monekia. Nejon tiotak, tayekananij itech nechikol kinotskej Lusu maj kikuiti seki takual. Yejua kijtoua: “Noixuiuj kijtoua ke axkan senkis kineltoka ke Jiova kikaki uan kinnankilia netataujtilmej porin Jiova kinankilij nonetataujtil”.

Ompa República Democrática del Congo, se siuat chanchiua taixpan kampa ika nemij seki kalyetouanij akin itaixpantijkauan Jiova. Keman yejua kiitaya ke nejon tokniuan kiseliayaj takual tein kixelouayaj okseki tokniuan, kijtoj: “Keman tamis nejin ueyi kokolis, timochiuaskej itaixpantijkauan Jiova porin yejuan kitemouaj mopaleuiskej itech nejin ueyi ouijkayot”. Itakauj kitajtanij siuat: “¿Timochiuati itaixpantijkauj Jiova sayoj porin tikselia se bolsa ika arroz?”. Siuat tanankilij: “Amo yejua ika, sayoj ke nejon bolsa ika arroz kinextia ke yekmelauj motasojtaj”.

Itaixpantijkauan Jiova ueli niman kinpaleuiaj tokniuan akin kinpoloua takual itech nejin ueyi ouijkayot porin nankitemakaj nepaleuil ika tomin. Tiktasojkamatij nejon nepaleuil tein nankitemakanij itech donate.jw.org.