Tanojnots 55

Se konet kitekitilij Dios

¿MELAUJ ika kuakualtsin nejin konet? Motokaytia Samuel. Uan takat tein kikuamatokatok, motokaytia Elí, imin tayekankatiopixkauj israelitas. Tein kiuikaj konet iuan Elí, yejuan tetatmej Elqaná uan Ana.

Samuel yekin kipia naui oso makuil xiuit. Sayoj ika nemiti itech itabernáculo Jiova iuan Elí uan okseki tiopixkamej. ¿Keyej Elqaná uan Ana kiuikakej Samuel tel konetok maj kitekitiliti Jiova itech itabernáculo? Tikitatij.

Seki xiujmej achto, Ana amo uelia kipiaya se konet uan yej kitelnekia kipias se, uan ika nejon tel tayokoxtoya. Yejika, se tonal keman yajka itabernáculo Jiova, kichiuak se netataujtil: ‘¡Jiova, amo xinechelkaua! Komo tej tinechmaka se konet, nej nimotenkaua ika nimitsmakas maj mitstekitili nochi inemilis’.

Jiova kinankilij inetataujtil Ana, uan se ome eyi metsti satepan kipiak konet Samuel. Ana kiteltasojtaya ikonetsin, uan peuak kinextilia tein Jiova kijtoua keman katka tel konetok. Kiiluij inamik: ‘Sayoj maj nenken moskalti Samuel uan amo monekisok maj niktamaka, nikuikas itech tabernáculo uan maj ompa kitekitili Jiova’.

Yejua nejon tikitaj kichiujtokej Ana uan Elqaná itech nejin taixkopin. Uan kemej itatuan kuali kimachtijkej Samuel, yej tel yolpakia uelis kitekitilis Jiova itech itabernáculo. Uan xijxiujtika itatuan yayaj taueyichiuatij ompa, uan no kionkalpanouayaj imin konetsin. Uan xijxiujtika Ana kiuikiliaya Samuel se yankuik taken makojkotoltik tein kichijchiuiliaya.

Ijkon kemej panouayaj xiujmej, Samuel kisentokaya tekitia itech itabernáculo Jiova, uan nejon kiyolpaktiaya Jiova uan israelitas. Sayoj ika, Hofní uan Finehás, ikoneuan tayekankej tiopixkat Elí, amo katkaj yolkualmej. Yejuan kichiuayaj miak taman tein amo kuali, uan no kichiujkej maj oksekin amo kitakamatikan Dios. Elí monekia kinkuilis tekit kemej tiopixkamej, sayoj ika amo kichiuaya.

Nochin tachiualismej tein amo kuali mochiuaya itech tabernáculo, telpoch Samuel amo kikauak maj kikaualtiani kitekitilis Jiova. Miak xiujmej Jiova amo kinojnotsaya niose takat, porin amo miakej taltikpakneminij yekmelauj kitasojtayaj. Keman Samuel okachi moskaltij, yejua nejin tein mochiuak:

Samuel kochtoya itech tabernáculo keman aksa tanotsak uan kijxitij. Yej tanankilij: ‘Nikan niyetok’. Ompa meuak uan kiajsito Elí, uan kiiluij: ‘Tinechnotsak, nikan niyetok’.

Sayoj ika Elí kinankilij: ‘Nej amo nimitsnotsak; xikochiti’. Uan Samuel oksepa kochito.

Satepan tanotskej ika ojpa: ‘¡Samuel!’ Uan Samuel meuak uan kiajsito Elí. Kiiluij: ‘Tinechnotsak, nikan niyetok’. Sayoj ika Elí kinankilij: ‘Amo nimitsnotsak nokonetsin. Oksepa ximotekati’. Uan Samuel oksepa motekato.

Ika expa oksepa tanotskej: ‘¡Samuel!’ Ompa, Samuel kiajsito Elí uan kiiluij: ‘Nikan niyetok; yekintsin kemaj tinechnotsak’. Ijkuak, Elí kimatik ika Jiova katka akin tanotsaya. Yejika kiiluij Samuel: ‘Oksepa ximotekati, uan komo yej tanotsa, xikilui: “Nimitskaki Jiova, xinechilui”’.

Yejua nejon kiiluij Samuel keman Jiova oksepa tanotsak. Ijkuak, Jiova kiiluij Samuel ika yaya kintatsakuiltiti Elí uan ikoneuan. Satepan, Hofní uan Finehás mikkej keman moteuitoj imiuan filisteos, uan keman Elí kikakik tein mochiuak, uetsik, mokechpostek uan mikik. Ijkon mochiuak kemej Jiova kijtojka.

Samuel moskaltij, uan mochiuak imin tamelaujkauj israelitas, uan satepan amo moajsik okseok. Keman ueuentsintiak, israelitas kiiluijkej: ‘Xikijita se tekiuaj maj techixyekana’. Samuel amo kinekia, ta tein melauj, Jiova katka imin tekiuaj. Sayoj ika Jiova kiiluij maj kinkakini israelitas.

1 Samuel 1:1-28; 2:11-36; 3:1-18; 4:16-18; 8:4-9.