Maj nochipa titanojnotsakan
1. ¿Keniuj tikmatij ke yekinika itatojtokakauan Cristo nochipa kitemouayaj tanojnotsaskej?
1 Yekinika itatojtokakauan Cristo tein kitelnekiaj tanojnotsaskej, “amo keman mokauke” kintapouiskej kuali tanauatilmej kampa yeski moajsiskiaj taltikpakneminij (Hech. 5:42). Senkis uelis tiknemiliskej ke ijkuak tanojnotsayaj kajkalpan, no kinnojnotsayaj akin kinnamikiaj ojtipan. Uan komo ijkuak matamiaj tanojnotsalis takoujtikisayaj tanamakaloyan, xa no ompa tanojnotsayaj. Ijkon kemej kichiuaya Jesús, yejuan nochipa kitemouayaj kitetapouiskej iTajtol Dios (Mar. 6:31-34).
2. ¿Toni moneki tikchiuaskej kemej tiitaixpantijkauan Jiova?
2 Maj nochipa tikmatikan toni tikijtoskej. Tokayit tein tikuikaj amo sayoj kinextia tein tikchiuaj, ta no tiakonimej (Isa. 43:10-12). Yejua ika, tiitaixpantijkauan Jiova nochipa moneki tikyekmattoskej keniuj titanankiliskej keman techtajtaniskej keyej tikpiaj nejon takuaujtamatilis maski amo tiyetoskej kajkalpan (1 Ped. 3:15). ¿Tikonixtaliani tiontanojnotsas kampa yeski uan achto tikonnemiliani keniuj tikonchiuas uan toni tikonijtos? ¿Nochipa tikonuika amaixmej tein uelis tikonkauilis akin kineki kimatis okachi? (Pro. 21:5.) ¿Sayoj tiontanojnotsa kajkalpan oso no tiontanojnotsa kampa yeski nochipa keman tionueli?
3. ¿Keyej no motelneki maj titanojnotsakan itech ojti, kampa kinketsaj teposmej, kampa miakej moixpetaniaj, kampa tekitij uan miakkan kampa uelis se tanojnotsas?
3 Tanojnotsalis “senteixteno”. Tejuan titanojnotsaj itech ojti, kampa kinketsaj teposmej, kampa miakej moixpetaniaj, kampa tekitij uan miakkan kampa uelis se tanojnotsas. ¿Uelis se kiajsikamatis ke amo ijkon se tanojnotsa, ke uelis kichiuas sayoj akin kinekis? Tatitanil Pablo kijtoua ke amo sayoj tanojnotsaya kajkalpan ta no “senteixteno” (Hech. 20:20). Tanojnotsalis kajkalpan yejua tein okachi tayekantok uan tein okachi tapaleuia maj tiuelikan titetapouikan tamachtilis ika iTekiuajyo Dios. Sayoj ke yekinika tanojnotsanij kintemouayaj taltikpakneminij uan amo kalmej. Yejua ika, nochipa keman ueliaj, tanojnotsayaj senteixtenoj, kampa yeski uan kajkalpan. Tejuan no ijkon moneki tikchiuaskej, ta nejon techpaleuis maj tikyekchiuakan tekit (2 Tim. 4:5).