Xikonixtaliya axkan okachi tiontanojnotsas
1. ¿Toni motelneki mochiuas itech tonalmej keman moelnamiki imikilis Jesús, uan keniuj uelis titapaleuiskej?
1 Xijxiujtika, itech tonalmej keman moelnamiki imikilis Jesús ueli tikueyichiuaj Jiova (Sal. 109:30). Uan itech metsti marzo uelis okachi titanojnotsaskej, ta ijkon tiknextiskej ke timotasojkamatij iuan Dios, akin kitemakak taxtauil. Yejua ika, moneki tikixtaliskej axkanya keniuj tikchiuaskej (Pro. 21:5).
2. ¿Keniuj momachilijkej sekin keman kimatkej ke itech metsti abril tein tiualpanokej ueliskiaj tekitiskej kemej precursor auxiliar ika amo miak hora? ¿Keniuj tionmomachilij tejuatsin?
2 Precursor auxiliar. Xiuit tein tiualpanokej techmakak miak pakilis tikmatiskej ke itech metsti abril ueliskia se tekitis kemej precursor auxiliar ika amo miak hora. Se tokniuj tajkuiloj: “Ayamo niprecursor regular porin nimomachtijtokok. Sayoj ke itech metsti abril nimochiuati niprecursor auxiliar ika 30 horas uan nimochikauas nikajxitis 50”. Se tokniuj siuat akin tekiti nochi tonalmej tajkuiloj: “¿Treinta horas? ¡Nejon kemaj uelis nikchiuas!”. Okse tokniuj siuat akin achto tekitik kemej precursor uan axkan kipia panoua 80 xiujmej keman kikakik nejin tanauatil kijtoj: “¡Nikchixtoya tonal keman niueliskia oksepa nitekitis kemej precursor! Jiova kimati ke nejon tonalmej yejua tein okachi kuali tein nikchiuak itech nonemilis”. Oksekin tanojnotsanij akin amo uelkej tekitikej kemej precursor auxiliar kiixtalijkej okachi tekitiskej itech tanojnotsalis.
3. ¿Toni techpaleuis maj tikixtalikan titekitiskej kemej precursor auxiliar itech metsti marzo, abril uan mayo?
3 Marzo yeski se metsti keman okachi uelis se tekitis kemej precursor auxiliar, porin oksepa uelis titajtaniskej titemakaskej 30 oso 50 horas. Uan no, itech sábado 17 metsti marzo peuas titapaleuiskej itech se tekit tein ika tikinyoleuaskej taltikpakneminij maj touan kielnamikikan imikilis Cristo, tein yeski itech tonal 5 metsti abril. Tikchiaj maj miakej akin tekitiskej kemej precursor auxiliar itech metsti marzo, kiteluelitakan uan maj kinekikan tekitiskej ika 50 horas itech metsti abril uan mayo.
4. ¿Keniuj uelis okachi titekitiskej itech tanojnotsalis, uan toni uelis tikseliskej?
4 Itech okse Youak keman tiTaueyichiuaj kemej Kalyetouanij, uelis nankiitaskej keniuj nansejsemej uelis okachi nantekitiskej itech tanojnotsalis itech tonalmej keman moelnamiki imikilis Jesús (Pro. 15:22). Xikontajtani Jiova maj mitsontatiochiui ika chikaujkayot tein tikonchiua (1 Juan 3:22). Ijkon kemej okachi tiontekitis itech tanojnotsalis amo sayoj okachi tikonueyichiuas Jiova ta no okachi tionyolpakis (2 Cor. 9:6).