Maj tipeuakan titajtokan ika inepaleuil amaix ¿Toni techmachtia iTajtol Dios?
1. ¿Katiyejua yankuik amaix tikpiaj tein techpaleuis itech tanojnotsalis?
1 Yankuixtok tikselijkej amaix ¿Toni techmachtia iTajtol Dios? Xa tikitakejya ke kiualkui miak textos itech sejse tamachtilis, ijkon kemej itech Razonamiento, uan yejua ika uelis semi techpaleuis maj ika tipeuakan titajtokan. ¿Keniuj uelis tikuiskej keman timomachtiskej kemej tipeuaskej titajtoskej itech tanojnotsalis?
2. Amaix ¿Toni techmachtia iTajtol Dios? ¿Keniuj uelis tikuiskej itech tanojnotsalis?
2 Kemej neskayot, uelis tikonkuis netajtanil 8 uan tikonijtos: “Titajtouanij iniuan akin nemij nikauin uan tikitanij ke miakej motajtaniaj ox Dios itajtakol maj titajyouikan. [Itech seki xolalmej kampa titanojnotsaj okachi tapaleuia keman se kinextia netajtanil itech amaix kampa ixnesi.] ¿Tejuatsin toni tikonnemilia? [Xikonkaua maj tanankili.] Biblia kuali kinankilia nejon netajtanil”. Satepan uelis tikonixtajtoltis uan ika tiontajtos se oso miakej versículos tein ixnesij itech amaix. Komo taltikpaknenkej kineki kimatis okachi, xikonnextili 20 netajtanilmej tein moajsij itech yekinika página tein kipia amaix uan xikonilui ke uelis ika nantajtoskej okse tonal. No uelis tikonmakas semej amaixmej tein tikuij keman tiktemakaj nemachtilmej ika Biblia uan xikonilui ke okachi ika tajtoua tamachtilis tein nankiitakej.
3. ¿Keniuj uelis tikuiskej yankuik amaix uan ijkon tipeuaskej titajtoskej iniuan akin pouij itech se taneltokalis kampa amo kichiuaj kemej Cristo?
3 Netajtanilmej 4 uan 13 hasta 17 uelis semi techpaleuiskej keman tikinnojnotsaskej akin pouij itech taneltokalismej kampa amo kichiuaj kemej Cristo. Kemej neskayot, uelis tikonkuis netajtanil 17 uan tikonijtos: “Titakalpanojtokej porin tiknekij tikinpaleuiskej kalyetouanij. Tikitanij ke ijkon kemej panouaj tonalmej okachi kiixnamikij kuejmolmej. ¿Toni tikonnemilia tejuatsin? [Xikonkaua maj tanankili.] Miakej namikuanij mochikauaj kitakamatiskej nejin tajtolmej tein semi tapaleuiaj: ‘Cada se tesiuau moneki ma momouiskauika iuan iyokich’ oso itakauj. [Amo moneki tikoniluis ke ika tiontajtojtok Efesios 5:33. Komo tiontajtojtok iuan se siuat, uelis okachi kuali tikonixtajtoltis Efesios 5:28.] ¿Tikonnemilia ke komo namikuanij kichiuaj ijkon kemej kijtoua nejin tayolmajxitilis kinpaleuis?”.
4. ¿Toni uelis tikonchiuas achto ke tionmonauatis iuan akin poui itech se taneltokalis kampa amo kichiuaj kemej Cristo?
4 Achto ke tionmonauatis iuan taltikpaknenkej, xionmotenkaua kemanian oksepa tionmokepas uan nankisentokaskej nantajtoskej ika nejon tamachtilis. Keman tionmokepas, uelis nankiitaskej okse versículo tein moajsi itech netajtanil tein nankiitakej. Keman tikonitas ke uelis, xikonmelauili taltikpaknenkej ke nejon tayolmajxitilismej tein ika nantajtojkej uan tein semi tapaleuiaj mokixtijkej itech Biblia. Xikonmaka se amaix tein uelis kiyolnotsas, tein mouikas iuan tein ika nantajtojkej uan kemej kiita Biblia. (Xikonita amaix iTekiyo Dios tein Tikchiuaj diciembre 2013, páginas 3 hasta 6.)