Xikixtopeua taneltokalis tein amo melauak

Satanás uan iamokuali ejekauan amo kinekij xiktekitili Dios. Yejuan kinekij maj nochin taltikpakneminij mouejkatilikan uan maj amo kitasojtakan Dios. ¿Keniuj? Se taman tein ika ueli kichiua, yejua taneltokalis tein amo melauak (2 Corintios 11:13-15). Se taneltokalis amo melauak komo amo tamachtia tein Biblia kijtoua. Taneltokalis tein amo melauak, kemej eskia se tomin tein amo kualtia: taneltokalis uelis moitas majya melauak uan amo neli. Uan no uelis mitsualkuilis miak nekuejmololmej.

Taneltokalis tein amo melauak amo ueli kiyolpaktia Jiova, yejua Dios tein sayoj kijtoua tein melauak. Keman Jesús yetoya nikan Taltikpak, se oloch taneltokanij kinekiaj kimiktiskej. Yejuan moluiayaj ika ijkon kemej kiueyichiuayaj Dios ijkuia katka kuali. Kijtouayaj: «Ta, tikpiaj sayoj se totat uan Yejuatsin ne in toTajtsin Dios». Sayoj, ¿kijtoj Jesús ika kuali yetoya? Amo. Yej kininankilij: «Uan namejuan namotat yejua ne in amokuali Satanás» (Juan 8:41, 44). Axkan tonalmej, miakej taltikpakneminij moluiyaj kiueyichiujtokej Dios, uan tein neli kitekitilijtokej Satanás uan iamokuali ejekauan (1 Corintios 10:20).

Kemej se kuouit tein amo kuali amo kitemaka kuajkuali takilot, taneltokalis tein amo melauak kinchiua taltikpakneminij maj kichiuakan tein amo kuali. Noyampa taltikpakneminij kipiaj miak nekuejmololmej porin kichiuaj tachiualismej tein amo kuali. Onkak auilnemilis, neteuilis, tachtekilis, temiktilis, tajyouilis uan teikamauiltilis. Miakej taltikpakneminij tein kichiuaj nejin tachiualismej kipiaj imin taneltokalis, sayoj ika nejon taneltokalis amo kinpaleuia maj kichiuakan tein kuali. Amo uelis mochiuaskej itasojikniuan Dios komo amo kikauaj kichiuaskej tachiualismej tein amo kuali (Mateo 7:17, 18).

Taneltokalis tein amo melauak kinimachtia taltikpakneminij maj kintatataujtilikan tiotsitsin. Dios techiluia maj amo timotatataujtilikan imiuan tiotsitsin. Taixejekol nejin. ¿Tikuelitaskia maj aksa tein amo keman mitsnojnotsa, maj kinojnotsa motaixkopin? ¿Yekneli ueliskia mochiuaskia motasojikniuj? Amo, amo ueliskia. Jiova kineki maj yejua tiknojnotsakan, uan amo tiotsitsin tein amo kipiaj nemilis (1 Corintios 8:4).

Taneltokalis tein amo melauak kinimachtia taltikpakneminij ika uelis temiktiskej keman onkak neteuilis. Jesús kijtoj ika itasojikniuan Dios motasojtaskiaj se iuan okse. Amo tikinimiktiaj taltikpakneminij tein tikintasojtaj (Juan 13:35). Niono kuali yetok maj tikimiktikan taltikpakneminij tein amo yolkualmej. Keman ne tein kiteltauelitayaj Jesús yajkej kikitskitoj, yej amo kinkauj imomachtijkauan maj tateuikan uan maj kipaleuikan (Mateo 26:51, 52).

Taneltokalis tein amo melauak, tamachtia ika taltikpakneminij tein amo yolkualmej kijyouitiuij itech miktan. Sayoj ika Biblia tamachtia ika tajtakol teuika itech mikilis (Romanos 6:23). Jiova se Dios tetasojtakej. ¿Kinchichinojtoskia nochipaya taltikpakneminij se Dios tetasojtakej? Amo keman. Itech Xochital sayoj onkas se taneltokalis tein melauak, taneltokalis tein Jiova kiuelita (Apocalipsis 15:4). Nochin oksekin taneltokalismej tein moojtokaltiaj ika itakajkayaualis Satanás amo onkaskejok.