Tein mokui keman tikitaj Tein timomachtiaj itech nechikol Tonemilis uan toTanojnotsalis
4-10 METSTI SEPTIEMBRE
TAMACHTILIS TEIN KIPIA BIBLIA | EZEQUIEL 42-45
Tein moixtajtoltia itech Biblia
(Ezequiel 44:1-9) Uan nechualkuik kampa ika puerta tein kipia kampa taueyichiuaj, taixpankopa moitaya tonalkisayampa, uan tatsaktoya. 2 Ompa Jiova nechiluij: “Nejin puerta kisentokas tsaktos. Amo kitaposkej uan nion se takat itech kalakis; porin Jiova, iDios Israel, ompa kalakini uan moneki kisentokas tatsaktos. 3 Sayoj ke, tayekankej ompa motokotstalis uan kikuas pan iixpan Jiova, porin yejua se tayekankej. Yejua kalakis itech puerta tein kipia kaltampa uan ompakauin kisas”. 4 Satepan nechuikak kampa puerta tein moajsi norte hasta iixpan templo. Uan xikita, nikitak iueyipanchiualis Jiova tein moajsia itech nochi itemplo Jiova. Uan nimoixpiloj hasta talixko. 5 Ompa Jiova nechiluij: “Ikoneuj taltikpaknenkej, xiknejmachkaki, xikita, uan kuali xikaki nochi tanauatilmej tein moixtaliani itech itemplo Jiova. Kuali xikita ikalakyan templo uan nochi kampa se kisa kampa taueyichiuaj. 6 Uan moneki tikiluis ichan Israel tein taixnamiki: ‘Yejua nejin tein kijtoua toTeko Jiova akin okachi Ueyi Taixyekankej: “Amo nikauasok xiksentokakan xikchiuakan tein amo nikitstani, ichan Israel. 7 Keman nankinkalakiaj kampa nanechueyichiuaj akin analtekojkayomej akin amo taneskayotilmej itech ininyolo uan itech ininnakayo, yejuan kipitsotiliaj notemplo. Nankitemakaj pan tein noaxka, tein chiauak uan esti, keman tein nimotenkauani tikixpoloua ika motachiualisuan tein amo nikitstani. 8 Amo nankiyekpianij tein noaxka tein yektik. Ta, nankinnauatiaj oksekin maj kichiuakan tein moneki kampa nanechueyichiuaj”’. 9 ”‘Yejua nejin tein kijtoua toTeko Jiova akin okachi Ueyi Taixyekankej: “Amo uelis kalakis kampa nanechueyichiuaj nion se analtekojkayot akin nemi Israel akin amo taneskayotil itech iyolo uan itech inakayo”.’
11-17 METSTI SEPTIEMBRE
TAMACHTILIS TEIN KIPIA BIBLIA | EZEQUIEL 46-48
Tein moixtajtoltia itech Biblia
(Ezequiel 48:13-22) ”Ompa inakastan tal tein kipiaj tiopixkamej, levitas kipiaskej inintal, ueyak veinticinco mil molikmej, uan patauak diez mil; uan sennochiya ueyak yeski veinticinco mil, uan patauak diez mil. 14 Yejuan amo moneki kinamakaskej, nion kipataskej ika okse, nion kipanoltiliskej aksa tepitsin tein okachi kuali tal; porin yektik iixpan Jiova. 15 ”Tein mokaua tein itamachiuj patauak cinco mil molikmej tein moajsi inakastan veinticinco mil molikmej, nejin nochi xolal kikuis, kampa mochantiskej uan kintakualtiskej inintapialuan. Uan xolal moajsis tatajkoyampa. 16 Uan nejin yejua itamachiuj xolal: hasta kampa tami ompa norte cuatro mil quinientos molikmej, uan hasta kampa tami ompa sur cuatro mil quinientos, uan hasta kampa tami ompa tonalkisayampa cuatro mil quinientos, uan hasta kampa tami ompa tonalkalakyampa cuatro mil quinientos. 17 Uan kampa kintakualtiskej inintapialuan ompa norte itech xolal, yeski doscientos cincuenta molikmej, uan ompa sur doscientos cincuenta, uan tonalkisayampa doscientos cincuenta, uan tonalkalakyampa doscientos cincuenta. 18 ”Uan itamachiuj tein mokauas tein poui iuan netetayokolil tein yektik, kipias diez mil molikmej ompa tonalkisayampa, uan diez mil ompa tonalkalakyampa. Nejin pouis iuan netetayokolil tein yektik, uan tein motachiuas itech tal yeski inintakual akin tekitij itech xolal. 19 Akin tekitij itech xolal akin ualeuaj itech uejueyi kalyetouanij Israel tekitiskej itech tal. 20 ”Nochi netetayokolil yeski veinticinco mil molikmej ika veinticinco mil. Moneki tikauas kemej se netetayokolil tein yektik iuan kampa yetok altepet. 21 ”Uan tein mokauas inajnakastan netetayokolil tein yektik iuan kampa yetok altepet yeski iaxka tayekankej. Moajsis itonalkisayampa uan itonalkalakyampa netetayokolil tein itamachiuj veinticinco mil molikmej. Tein moajsi inajnakastan, yeski iaxka tayekankej. Uan netetayokolil tein yektik uan kampa taueyichiuaj itech templo moajsis tatajkoyampa. 22 ”Tein yeski iaxka tayekankej moajsis inajnakastan tein ininaxka levitas uan kampa yetok altepet. Tal tein iaxka tayekankej moajsis kampa tami tein iaxka Judá uan kampa tami tein iaxka Benjamín.
18-24 METSTI SEPTIEMBRE
TAMACHTILIS TEIN KIPIA BIBLIA | DANIEL 1-3
Tein moixtajtoltia itech Biblia
(Daniel 2:31-43) ”Tejua, tekiuaj, tikitstoya, uan tikitak se ueyi takat tamachijchiuj. Nejon tamachijchiuj tein katka ueyi uan tein semi petania, ijkatoya moixpan, uan moitaya tel tamouilil. 32 Itsontekon chijchiujtoya ika kuali oro, iyolixpan uan imauan ika plata, ipox uan itajkoyan ika cobre, 33 ikesuan chijchiujtoyaj ika tepos, imetsuan ika tepos uan sokit tamanelol. 34 Tiksentokak tikitak hasta ke se tet kitekkej, amo ika imauan aksa, uan kimotak takat tamachijchiuj itech imetsko tein chijchiujtok ika tepos uan sokit tamanelol, uan kikuechoj. 35 Itech nejon tonal tepos, sokit, cobre, plata uan oro, nochi kikuechojkej, uan mochiuak kemej tajsolmomox tein onkak keman okachi tona, uan ejekat kiuikak uan senkis ixpoliujkej. Sayoj ke, tet tein kimotak ueyi takat tamachijchiuj, mochiuak se ueyi tepet uan ika pexonik nochi taltikpak. 36 ”Yejua nejin takochitalis uan tikiluiskej tekiuaj tein kijtosneki. 37 Tejua, tekiuaj akin okachi ueyi ke oksekin tekiuanij, Dios akin moajsi iluikak mitsmakani tekiuajyot, taixyekanalis uan chikaualis uan ueyipanchiualis, 38 uan mitsmakani xikinixyekana taltikpakneminij kampa yeski nemiskej, ijkon kemej koujtajtapialmej uan totomej tein patanij iluikak, tejua nejon tsontekon tachijchiuj ika oro. 39 ”Sayoj ke satepan moajokuis okse tekiuajyot tein okachi amo ueyi; uan okse tekiuajyot, se expatika, tein kiixnextia cobre, tekiuajtis itech nochi taltikpak. 40 ”Uan naujpatika tekiuajyot, yeski chikauak kemej tepos. Porin ijkon kemej tepos kipechia uan kikuechoua nochi okseki taman, kemaj, ijkon kemej tepos tein tauejueloua, kinkuechos uan kinixpolos nochi oksekin. 41 ”Uan ijkon kemej tikitak ke imetsuan uan iikxipiluan chijchiujtoyaj ika tepitsin sokit tein kialaxoj se sokikonchiujkej uan ika tepitsin tepos, tekiuajyot xejxeliujtos, sayoj ke yeski tepitsin chikauak kemej tepos, ijkon kemej tikitak ke tepos maneliujtoya ika sokit kuechauak. 42 Uan kemej imetsikxipiluan kipiaj tepitsin tepos uan tepitsin sokit taalaxol, tekiuajyot yeski tepitsin chikauak uan tepitsin amo. 43 Ijkon kemej tikitak ke tepos maneliujtoya ika sokit kuechauak, maneliujtoskej iniuan taltikpakneminij; sayoj ke amo pepechiujtoskej, ijkon kemej tepos amo momaneloua iuan sokit.
25 METSTI SEPTIEMBRE HASTA 1 METSTI OCTUBRE
TAMACHTILIS TEIN KIPIA BIBLIA | DANIEL 4-6
Tein moixtajtoltia itech Biblia
(Daniel 4:29-37) Majtaktiomome metsti satepan nejnentoya kalkuako itech ikaltekiuaj ompa Babilonia. 30 Tekiuaj kijtouaya: “¿Amo yejua nejin ueyi Babilonia, tein kiixnextia kaltekiuaj tein nejua nikchijchiuani ika nochikaualis uan tein ika nimoueyipanchiua?”. 31 Ijkuak tekiuaj tajtojtoyaok, mokakik se tajtol ompa iluikak: “Tejua mitsiluiaj, tekiuaj Nabucodonosor: ‘Motekiuajyo mitskuiliskej, 32 uan amo tipouisok iniuan taltikpakneminij, uan tinemis iniuan koujtajtapialmej, uan tikuas sakat ijkon kemej kuakuejmej, uan panoskej chikome xiuit hasta keman tikmatis ke akin okachi Ueyichiujkej yejua Taixyekankej itech nochi taltikpak, uan akin yejua kineki kimakas, kimaka’”. 33 Itech nejon hora mochiuak itech Nabucodonosor nejon tein moijtojka. Uan kikixtijkej itech taltikpakneminij uan peuak kikua sakat ijkon kemej kuakuejmej, uan inakayo moapalouaya ika ajuach tein uetsi, hasta ke itson ueyakiak kemej iijuiyo águila uan iistiuan kemej tein kipiaj totomej. 34 “Keman tamik nejon xiujmej, nejua, Nabucodonosor, niajkotachiak iluikak, uan peuak oksepa kuali tekiti notanemilil; uan nikueyichiuak akin okachi Ueyichiujkej, uan akin nemi nochipaya, nikueyipanchiuak uan nikueyichiuak, porin itekiuajyo amo keman tami uan nochipa moajsi. 35 Nochin taltikpakneminij amo teyi chiuanimej, uan yejua kichiua tein kineki iniuan akin nemij iluikak uan iniuan akin nemij taltikpak. Uan amo moajsi aksa maj kitsakuili oso maj kilui: ‘¿Toni tikchiujtoni?’. 36 ”Itech nejon hora oksepa peuak kuali tekiti notanemilil, uan oksepa nikpiak tekiuajyot, ueyipanchiualis uan ueyiyot tein nikpiaya achto. Ueyichiuanimej akin nechtekitiliayaj oksepa senkis nechtemojkej uan oksepa nitekiuajtik ika okachi ueyiyot. 37 ”Axkan, nejua Nabucodonosor, nikueyichiua, nikueyitalia uan nikueyipanchiua akin Tekiuajti ompa iluikak, porin nochi tein kichiua melauak uan iojuan melaujkej uan porin akin moueyinekij yejua ueli kinpinaujtia.”