Tein mokui keman tikitaj Tein timomachtiaj itech nechikol Tonemilis uan toTanojnotsalis
6-12 METSTI NOVIEMBRE
TAMACHTILIS TEIN KIPIA BIBLIA | AMÓS 1-9
Tein moixtajtoltia itech Biblia
(Amós 4:1-13) “Xikakikan nejin tajtol, kuakuejmej tein nanpouij Basán, tein nanmoajsij itech tepet Samaria, namejuan siuamej akin nankinkajkayaujtokej akin amo teyi kipiaj, akin nankintajyouiltijtokej akin kipanouaj tatasojtilis, akin nankiniluiaj nanmonamik: ‘¡Xitechualkuilikan teisa tein titayiskej!ʼ. 2 ToTeko Jiova akin okachi Ueyi Taixyekankej ika ichipaujkayo motenkauani: ‘“¡Xikitakan! Ejkos tonal keman yejua namechajokuis ika ganchos tein kikui akin kinamaka nakat uan akin mokauaskej kinajokuis ika tepos tein kikui amichkitskijkej. 3 Nankisaskej itech tekoyok tein kipia tepamit uan namechpantamotaskej itech Harmón”, kijtoua Jiovaʼ. 4 ”‘Xiualakan Betel xitaixnamikikij. Xiualakan Guilgal uan okachi xiktapanauilikij tanauatil, uan xikualkuikan nanmonetemaktilmej kualkan, uan uiptika nanmodiezmo. 5 Xikchichinokan pan tein taxokoltil uan ika ximotasojkamatikan, xiktematiltikan ke nankitemakanij netetayokolilmej, porin yejua tein nankiuelitaj nankichiuaskej, xolal Israelʼ, kijtoua toTeko Jiova akin okachi Ueyi Taixyekankej. 6 ”‘Uan nejua, nikchiuak xitanchipauayakan itech nochi nanmoxolaluan uan nikchiuak maj tasojti pan nanmokalijtik; sayoj ke amo nanechtemojkej’, kijtoua Jiova. 7 ”‘Uan no nikchiuak maj amo kioui eyi metsti achto ke nantapixkaskiaj; nikchiuak maj kioui itech se xolal sayoj ke itech okse amo. Itech se tal kiouia sayoj ke itech okse amo, uan uakia. 8 Akin nemiaj itech ome oso eyi xolalmej tekit yayaj itech okse xolal atayitij, uan amo amikseuiaj; sayoj ke amo nanechtemojkejʼ, kijtoua Jiova. 9 ”‘Namechijtakoj keman nikchiuak maj chikauak tona uan namechchauisuij. Tikinmiakiltij moxochitaluan uan mouvataluan, sayoj ke higuerajkouit uan olivojkouit okuilimej kinkuajkej; uan maski ijkon amo nanechtemojkej’, kijtoua Jiova. 10 ”‘Niktitanik se chauis ijkon kemej tein niktitanik Egipto. Ika espada nikinmiktij nanmotelpochuan uan nanmoichpochuan uan nimoaxkatilij mocaballos. Nikchiuak xikijnekuikan tein tsojyaxtoya itech nanmotakenkaluan; sayoj ke amo nanechtemojkej’, kijtoua Jiova. 11 ”‘Namechixpoloj ijkon kemej nikixpoloj Sodoma uan Gomorra. Uan nanmochiujkej kemej se koujtsontet tein kijkuanijkej kampa tatatoya; sayoj ke amo nanechtemojkej’, kijtoua Jiova. 12 ”Yejua nejon tein nikchiuati mouan, Israel. Porin yejua nejin tein nimitschiuiliti, xikchiua tein mitspaleuis Israel keman timoajsis iixpan moDios. 13 Porin ¡xikita!, yejua Akin kichijchiuak tepemej uan Akin kichijchiuak ejekat, Akin kiluia taltikpaknenkej tein kinemilijtok, Akin kichiua maj tatayouayantia keman tanesi, Akin taksa kampa okachi ajko itech taltikpak, Dios akin kinixyekana tateuianij, yejua itokay Jiova.”
13-19 METSTI NOVIEMBRE
TAMACHTILIS TEIN KIPIA BIBLIA | ABDÍAS 1 HASTA JONÁS 4
Tein moixtajtoltia itech Biblia
(Jonás 3:1-10) Ompa Jonás ika ojpa kiselij itajtol Jiova uan kiluij: 2 “Ximoajokui uan xiyouj ueyi xolal Nínive, uan xiktematiltiti tein nimitsiluiti”. 3 Ompa, Jonás moajokuik uan yajki Nínive ijkon kemej Jiova kinauatijka. Uan Nínive katka se tel ueyi xolal, uejkauayaj eyi tonal kipanauiskej nochi xolal. 4 Ompa Jonás kalakik itech xolal, uan nejnemik nochi se tonal, uan kijtojtiyaya: “Sayoj poliui ome poual tonal uan Nínive ixpoliuis”. 5 Uan akin nemiaj Nínive peujkej taneltokaj itech Dios, uan peujkej kitematiltiaj maj mosauakan uan maj motakentikan ika tojmit, akin uejueykej ijkon kemej akin konemej. 6 Keman akin tekiuajtia Nínive kikakik nejon tajtolmej, moajokuik kampa tokotsyetoya itech itrono uan mokixtilij taken tein kikuia itech itekiuajyo uan motakentij ika tojmit uan motalij itech koujnex. 7 Uan no, kijtoj maj motematilti itech nochi Nínive nejin: “Tekiuaj uan uejueyi chiuanimej kiixtalianij nejin: Nion se takat oso se tapial, nion kuakuejmej oso ichkamej, moneki kikuaskej teisa. Maj amo akin takua nion no maj ati. 8 Uan maj taltikpakneminij uan tapialmej motakentikan ika tojmit; uan maj kitataujtikan Dios ika nochi ininyolo uan maj kikauakan tein amo kuali tein kichiuaj uan maj amo tateuikanok. 9 Xa ijkon Dios akin melauak kipatas tein kiixtalijtok kichiuas uan kiseuis ikualanyo uan amo techixpolos”. 10 Keman Dios akin melauak kiitak tein kichiujkej, keniuj kikaujkej tein amo kuali, oksepa kiixejekoj tatsakuiltilis tein yaya kinualkuiliti, uan amo kintatsakuiltij.
20-26 METSTI NOVIEMBRE
TAMACHTILIS TEIN KIPIA BIBLIA | MIQUEAS 1-7
Tein moixtajtoltia itech Biblia
(Miqueas 4:1-10) Itech itamian tonalmej, tepet kampa yetok ichan Jiova chikaujkayetos okachi ajko ke ininkuapan tepemej, uan yetos okachi ajko ke okseki tepemej; uan ompa yaskej xolalmej. 2 Uan miakej altepemej yaskej uan kijtoskej: “Xiualakan, maj tipankisakan itech tepet tein iaxka Jiova uan ichan iDios Jacob; uan yejua techmachtis iojuan, uan tinentinemiskej itech iojuan”. Porin ompa Sión kisas tanauatil, uan ompa Jerusalén itajtol Jiova. 3 Uan yejua kijtos tein kinnamiki kiseliskej miak xolalmej uan kinmelauas uejueyi altepemej tein uejka moajsij. Uan kinchiuaskej ininespadas teposmej tein ika talkaxaniaj uan ininlanzas kinchiuaskej kemej tein ika se tatejteki. Amo moteuisok se altepet iuan okse altepet, nion momachtiskejok neteuilis. 4 Sejse motalis iuvajmekatampa uan ihigokoujtampa uan amo akinok kinmojmoujtis, porin Jiova akin kinixyekana tateuianij ijkon kijtouani. 5 Porin nochin xolalmej sejse nentinemis itech itokay idios; sayoj ke tejuan tinentinemiskej itech itokay Jiova toDios nochipaya. 6 “Itech nejon tonal, kijtoua Jiova, nikualkuis akin koxoj; uan niksentilis akin moyaujtok, no akin niktajyouiltiani. 7 Nikchiuas maj akin koxojnejnemi mochiua se oloch, uan akin uejka moyaujtok maj mochiua se ueyi altepet; uan Jiova kinixyekanas itech tepet Sión, axkan uan nochipaya. 8 ”Uan tejua, tepankalikxit kampa kinyekpiaj ichkamej, tepelomojtsin tein iaxka iichpoch Sión, motech ualas, kemaj, ualas yekinika taixyekanalis, tekiuajyot tein iaxka iichpoch Jerusalén. 9 ”Axkan, ¿keyej chikauak titsajtsi? ¿Amo tikpia tekiuaj oso momikiliani motayolmajxitijkauj, yejua ika titajyouia kemej se siuat akin kipiati se konetsin? 10 Ximoixkekepa uan chikauak xitsajtsi, iichpoch Sión, kemej se siuat akin kipiati ikonetsin, porin axkan tikauati xolal uan tinemitiuj ixtauat. Uan tiyas uejka hasta Babilonia, uan ompa mitsmakixtiskej. Ompa Jiova mitsojpakakouas ininmako akin mitstauelitaj.
27 METSTI NOVIEMBRE HASTA 3 METSTI DICIEMBRE
TAMACHTILIS TEIN KIPIA BIBLIA | NAHÚM 1 HASTA HABACUC 3
Tein moixtajtoltia itech Biblia
(Habacuc 2:15–3:6) ”’¡Teikneltij akin kinmaka teisa tein tayiskej akin iniuan mouika, tein kipia kualanyot uan ika kintauantia, porin kineki kiitas ininnakayo! 16 Senkis mitspinaujtiskej uan amo timoueyipanchiuas. Tejua no xitayi uan maj mitsitakan kemej akin amo taneskayotil. Copa tein moajsi iyekmakopa Jiova mitsejkos uan mitspinaujtiskej; 17 porin neteuilis tein mochiuak ompa Líbano mitskemis uan ixpoliuilis tein kinmojmoujtij koujtajtapialmej motech ualas, porin toyauik ininesyo motateuijkauan uan tikijtakoj taltikpak, xolalmej uan akin ompa nemij. 18 ¿Toni ika tapaleuia se tiotsin tamachijchiuj keman sayoj aksa kichijchiuak? ¿Uan toni ika tapaleuia se tiotsin tachijchiuj ika tepos uan akin tamachtia tein amo melauak? Maski akin kichijchiuak itech takuaujtamati, kinchijchiua tiotsitsin tein amo teyi uelij kichiuaj nion no tajtouaj. 19 ”’¡Teikneltij akin kiluia se kouit: “¡Xiijsa!” Oso se tet tein amo tajtoua: “¡Xiijsa! ¡Xitechmachti!”. ¡Xikita! Piktok ika oro uan plata uan amo mijyotia. 20 Sayoj ke Jiova yetok itech itemplo tein yektik. ¡Maj nochi taltikpak amo tajto iixpan!’”
3 Se netataujtil ika tayokol tein mokuikatij tanauatijkej Habacuc: 2 Jiova, nikakini tein tikchiuani. Nikmoujkakakini tein tikchiuani. ¡Itech totonaluan maj monexti motachiualis! Itech totonaluan xikteixmatilti. Ueliskia tikelnamikis tiknextis teiknelilis keman onkas ouijkayomej. 3 Dios ualeuak Temán, Akin yektik ualeuak tepet Parán. Sélah. Ika iueyiyo pexonik iluikak; uan ika iueyichiualis nochi taltikpak. 4 Uan milinik kemej tanex. Itech imay kisak ome tapetanilot, kampa kipia ichikaualis. 5 Iixpan kisaya chauis, uan chikauak totonkayot kisaya imetsko. 6 Motsakuilij uan kitsetseloj taltikpak. Ika itachialis kichiuak maj altepemej ajkotsikuinikan. Tepemej tein nochipa moajsinij kintsoniksak uan xitinkej, uan tepelomojtsitsin tein uejkauj kayomej moixpilojkej. Ojmej tein uejkauj kayomej iaxkauan.