TAMACHTILIS 2

Xiontajto kemej ipa tiontajtoua

2 Corintios 2:17

TEIN MONEKI TIKONCHIUAS: Xiontajto kemej ipa tiontajtoua uan xikonijto tein yekmelauj tikonmachilia. Ijkon tikonnextis keniuj tikonita tamachtilis uan ke tikonneki tikonpaleuis akin mitsonkakij.

KENIUJ TIKONCHIUAS:

Xikontataujti Dios uan kuali xionmomachti. Xikontataujti Jiova maj mitsonpaleui okachi xiontanemili itech tamachtilis uan ijkon amo semi tionuiuiyokas. Kuali xikonita katiyejua tanemililmej tein tayekantokej tikonkuis itech motamachtilis. Amo sayoj xikonijto tein ijkuiliujtok, ta xikonmelaua ika motajtoluan.

Komo tikonixtajtoltiti Biblia oso okse amaix, xionmochikaua kuali tikonixmatis tein kijtoua uan ijkon uelis kuali tikonixtajtoltis. Komo ompa ixnesi ke aksa tajtoua, xikonchiua kemej yeskia yejua tajtojtoskia, sayoj ke amo xikontelpanolti.
Xikonijto tein tikonmachilia. Xikonnemili keyej taltikpakneminij moneki kikakiskej tamachtilis. Ijkon, tein tikonchiuas, kemej tionijkatos, tein tikonnextis itech moixko, kinextis ke yekmelauj tikonneltoka tein tikonijtojtok uan ke mitsonyolpaktia.

Amo xionauiltajto. Kuali xikonijto tajtolmej uan xiontajto kemej moneki, ijkon tikonnextis ke tamachtilis yekmelauj motelneki.
Xikonixita akin mitsonkakij. Komo kuali moita, xikonixita akin mitsonkakij. Keman tikontemakas se tanojnots, amo sayoj noyampa xiontachia, ta xikonixita sejsemej, yekinika se, satepan okse uan ijkon xikonsentoka.