¿Techpaleuiaj nochin taneltokalismej maj timotokikan iuan Dios?

Tein Biblia kijtoua

Amo. Sejse taneltokalis tataman tein tamachtiaj. Itech Biblia tikajsij keniuj kiueyichiuanij Dios kemej amo kiyolpaktia. Maj tikitakan ome taman.

1: Tein kinueyichiuaj dioses

Biblia kijtoua ke nenkaj maj tikinueyichiuakan okseki dioses (Jeremías 10:3-5; 16:19, 20). Jehová kiluijka israelitas: “Xinechueyichiua nejua, amo xikinueyichiua okseki dioses” (Éxodo 20:3, 23; 23:24).a Keman israelitas kinueyichiujkej okseki dioses, “Jehová tel kualanik” (Números 25:3; Levítico 20:2; Jueces 2:13, 14).

Dios kisentoka kiita ke amo kuali yetok maj kinueyichiuakan “tein kiniluiaj ‘dioses’” (1 Corintios 8:5, 6; Gálatas 4:8). Akin kinekij kitekitiliskej, kiniluia maj kikauakan taneltokalis tein amo melauak. Biblia kijtoua: “Xikisakan uan amo iniuan ximonelokanok” (2 Corintios 6:14-17). ¿Keyej technauatiskia Dios nejin, komo nochin taneltokalismej techpaleuiskiaj maj iuan timotokikan?

2: Tein kiueyichiuaj Dios kemej amo kiyolpaktia

Israelitas kiueyichiuayaj Jehová uan no peujkej kinueyichiuaj okseki dioses kemej kichiuayaj itech okseki xolalmej, yejua ika Jehová kinixtopeuak (Éxodo 32:8; Deuteronomio 12:2-4). Jesús kiniluij fariseos uan tajkuilouanij akin ijkuak taixyekanayaj ke amo kiueyichiuayaj Dios kemej monekia. Kinextiayaj ke kitasojtayaj Dios sayoj ke taixkajkayaujtoyaj porin amo kichiuayaj “tein iTanauatil Moisés kijtoua ke okachi moneki: se kichiuas tein kuali yetok, se teiknelis uan se takuaujtamatis” (Mateo 23:23).

Axkan, taneltokalis tein techpaleuia maj timotokikan iuan Dios yejua tein tamachtia tein kijtoua Biblia (Juan 4:24; 17:17; 2 Timoteo 3:16, 17). Sayoj ke taneltokalismej tein amo tamachtiaj tein kijtoua Biblia techuejkatiliaj de Dios. Miakej kineltokaj ke Biblia tamachtia ke Dios se Trinidad, ke tikpiaj teisa tein kisentoka yoltok satepan ke timomikiliaj uan ke sekin kintitanij kampa nochipa tajyouijtoskej. Sayoj ke nejin tamachtiaj itech taneltokalismej tein amo melaujkej, uan amo techpaleuiaj porin amo kitojtokaj tein Dios tamachtia, ta tein kinmachtijkej ininuejkaujtatuan (Marcos 7:7, 8).

Dios amo kipaktia akin kijtouaj ke kiixmatij, sayoj ke ika tein kichiuaj kinextiaj ke kiixtopeuaj (Tito 1:16). Taneltokalis techpaleuis maj timotokikan iuan Dios komo techolinia maj tikchiuakan tein yejua kineki, uan amo sayoj tikchiuaj tein techmachtijkej touejkaujtatuan. Biblia kijtoua nejin: “Komo aksa kinemilia ke taneltoka sayoj ke amo kitsakuilia inenepil, moyolkajkayaujtok uan nenkajsan taueyichiua. ToTajtsin Dios kiita ke taneltokalis tein chipauak uan amo pitsotik yejua nejin: maj se kinpaleui akin amo kipiaj inintatuan uan siuatsitsin akin momikilijya inintakatsin keman tajyouijtoskej, uan maj amo tikauakan maj techpitsotili kemej nemij akin amo tatakamatij” (Santiago 1:26, 27). Keman ika tajtoua taneltokalis tein melauak uan tein amo pitsotik, Biblia La Palabra de Dios para Todos itech nejin versículo kikui tajtol “taneltokalis tein chipauak”.