TAMACHTILIS 1
Dios kichijchiua iluikak uan taltikpak
Jiova Dios toTachijchiujkauj. Yejuatsin kichijchiuak nochi tein onkak: tein tikitaj uan tein amo tikitaj. Achto ke kichijchiuaskia tein tikitaj, kinchijchiuak tel miak ángeles. ¿Tikmati akonimej ángeles? Yejuan itekitikauan Jiova uan tamatij kemej yejuatsin. Tejuan amo ueli tikitaj Jiova uan amo no ueli tikinitaj ángeles. Yekinika ángel akin Jiova kichijchiuak mochiuak itapaleuijkauj. Yejua kipaleuij maj kichijchiua sitalimej uan nochi okseki taman, kemej kualtsin taltikpak kampa tinemij.
Satepan, Jiova tachijchiuak itech taltikpak kemej ueliskiaj nikan nemiskej tapialmej uan taltikpakneminij. Kichiuak maj Tonaltsin tauiani itech taltikpak. No kinchijchiuak tepemej uan ueyiamej.
¿Uan toni panok satepan? Jiova kijtoj: “Nikchiuati maj taxiujyoua uan maj onka koujmej”. Ijkon, itech taltikpak peuak mochiua tataman takilomej, kilmej uan xochimej. Jiova no kinchijchiuak nochi tataman tapialmej: tein patanij, tein nemij itech at uan tein moxoxolatsaj. Kinchijchiuak tapialmej tein tsikitsitsin, kemej tochij, uan tein uejueyin, kemej elefantes. ¿Katiyejua tapial okachi tikuelita?
Ompa, Jiova kiluij yekinika ángel: “Maj tikchijchiuakan takat”. Taltikpakneminij amo yeskiaj kemej tapialmej. Ueliskiaj kichijchiuaskej yankuik taman, tajtoskej, uetskaskej uan kitataujtiskej Dios. Kiyekpiaskiaj taltikpak uan tapialmej. ¿Tikmati akoni yekinika takat akin Dios kichijchiuak? Maj tikitakan.
“Keman peuak nochi, Dios kichijchiuak iluikak uan taltikpak.” (Génesis 1:1)