KUEJMOLMEJ TEIN AXKAN ONKAK

3 | Xikonyekpia akin tikontasojta

¿KEYEJ SEMI MONEKI?

Keman okachi motaouijkantalia kampa tinemij, miakej amo kinyekpiajok ininchankauan.

Sekin amo kinekij yetoskej iniuan oksekin.
Akin namikyejkej okachi motajtolteuiaj.
Tetatmej amo kintekipachoua tein kinpanoua ininkoneuan.

¿Tikonmatia?

Keman tikpanouaj se ouijkayot, akin iniuan timouikaj techpaleuiaj maj amo semi timotekipachokan uan maj kuali timomachilikan.
Komo semi timotekipachouaj uelis kichiuas maj tochankauan no motekipachokan uan nejon uelis kinijtakos.
Komo mokoneuan kiitaj oso kikakij amo kuali tanauatilmej uelis kinmojmoujtis.

¿Toni uelis tikonchiuas?

Biblia kijtoua: “Se yekmelauj tetasojikniuj nochipa tetasojta, uan mochiua se teikniuj keman se kipanoua tajyouilis” (Proverbios 17:17).

Iuan xiontajto aksa akin mitsonajsikamatis uan uelis kuali mitsonyolmajxitis. Tikonmatis ke aksa mitsontasojta mitsonpaleuis xikonixnamiki ouijkayomej tein tikonpanoua.

KENIUJ TIKIXNAMIKISKEJ: Seki tayolmajxitilismej

Para tikonyekpias akin tikontasojta keman onkas kuejmolmej uelis tikonchiuas nejin

OKACHI XIONMOUIKA IUAN MONAMIK

Okachi xionmouika iuan monamik

Biblia kijtoua: “Okachi kuali omen uan amo se […]. Porin komo se uetsi, okse uelis kiajokuis” (Eclesiastés 4:9, 10). Akin namikyejkej kemej yeskia omen akin senmauiltiaj para sentataniskej uan amo moixnamikij.

Amo ximotajyouiltikan komo namechtekipachoua se kuejmol. Komo amo nanyolijsiuij okachi kuali nantajtoskej.
Maj amo pano se semana ika xitajtokan kuejmolmej tein nankipiaskej. Amo sayoj ximokualantikan, ta xikyektalikan kuejmol.
Xikxelokan tiempo uan xiksenchiuakan seki taman tein nankiuelitaj.
Xikelnamikikan seki taman tein kuali tein nankipanouanij. Xa uelis nankiitaskej taixkopimej keman nanmonamiktijkej oso okseki taman.

“Xa akin namikyejkej tataman kemej tanemiliskej, sayoj ke nejon amo kijtosneki ke amo uelis kisenchiuaskej seki taman. Uelis kisenixtaliskej teisa uan mochikauaskej maj kuali kisa” (David).

XIKONYEKPIA AKIN INIUAN TIONMOUIKA

Xikonyekpia akin iniuan tionmouika

Amo sayoj xikonchia maj mitsonyolchikauakan akin kuali iniuan tionmouika ta no xikonyolchikaua yejuan. Komo tikonpaleuia oksekin, no tionmopaleuis.
Mojmostaj xiontajto iniuan akin kuali tionmouika para tikonmatis keniuj yetokej.
Xikontajtani akin iniuan kuali tionmouika toni kichiuanij keman kipanouanij ouijkayomej tein tejuatsin tikonpanotok.

“Akin kuali iniuan timouikaj semi techpaleuiaj. Keman tikpiaj miak kuejmolmej, techiluiaj toni tikchiuaskej. Kemansa sayoj mitselnamiktiaj tein ipa tikmattokya. Yejuan mitstasojtaj uan kimatij ke no tikintasojta” (Nicole).

XIKONAJSIKAMATI MOKONEUAN

Xikonajsikamati mokoneuan

Biblia kijtoua: “Nochin moneki niman nantekakiskej, amo niman nantajtoskej” (Santiago 1:19, TNM). Xa mokoneuan amo kinekij kijtoskej tein kintekipachoua oso tein kinmoujtia. Sayoj ke, komo tikinkaki ika nejmachkayot, amo ouij kinkisas mitsoniluiskej keniuj momachiliaj.

Xikonchiua maj kuali momachilikan. Xa okachi kinekiskej tajtoskej keman nannemitij oso keman nanyouij itech carro, uan amo komo iniuan nanmotaliaj para nantajtoskej.
Xikonita maj mokoneuan amo semi kikakikan tanauatilmej tein kinmoujtis.
Xikonilui toni tikonchiujtok para maj kuali yetokan.
Xikonixtali toni tikonchiuas itech se ouijkayot uan xionmomachti iniuan mokoneuan toni nankichiuaskej.

“Xionmonojnotsa iniuan mokoneuan uan xikonkaua maj tajtokan. Xa moujtokej oso kualantokej, uan amo mitsoniluijtoyaj. Xikonilui ke no ijkon tionmomachiliani uan toni tikonchiuani para kuali tionmomachilis” (Bethany).