KUEJMOLMEJ TEIN AXKAN ONKAK

4 | Xikonchia tein kuali

¿KEYEJ SEMI MONEKI?

Kemej onkak miak kuejmolmej kichiua maj amo kuali timomachilikan uan maj tikokolispeuakan. Akin kipanouaj miak taman tein amo kuali amo kichiajok tein kuali. ¿Keyej?

Sekin amo kinekij ika tanemilijtoskej tein panos satepan.
Oksekin tauanaj oso kikuij drogas.
Sekin kinemiliaj ke nenkaj tinemij, yejua ika kemansa amo kinekijok nemiskej.

¿Tikonmatia?

Xa seki mokuejmoluan niman moyektaliskej oso xa kemej amo tikonchiaya.
Komo amo moyektaliaj uelis tikonchiuas teisa tein mitsonpaleuis xiontaxiko.
Biblia kijtoua ke nochi kuejmolmej amo uejkaua moyektaliskej.

¿Toni uelis tikonchiuas?

Biblia kijtoua: “Maj amo keman namechtekipacho tein mostika panos, porin mostika no namechtekipachos okseki taman. Sayoj xitanemilikan itech kuejmol tein onkas sejse tonal” (Mateo 6:34, TNM).

Ika xiontanemili sayoj se tonal. Maj amo mitsontekipacho tein tikonchiuas mosta porin ijkon amo tikonchiuas tein axkan tikonixtalijtok.

Komo semi mitsontekipachoua tein amo kuali tein ueliskia panos, kichiuas xionmotayokolti uan amo xikonchiaok tein kuali.

KENIUJ TIKIXNAMIKISKEJ: Seki tayolmajxitilismej

XIONTANEMILI ITECH TEIN KUALI

Biblia kijtoua: “Akin motayokoltijtok kiita ke amo kuali itonaluan; sayoj ke akin yolpaki, kemej yeskia kipia se tatakualis nochipaya” (Proverbios 15:15). Komo sayoj ika tiontanemilijtok kuejmol tein tikonpia, xa amo tikonitas ke uelis moyektalis. Sayoj ke, komo itech tiontanemilia tein kuali, uelis tikonmatis keniuj tikonyektalis se kuejmol.

Amo semi xikonkaki nion xikonita tanauatilmej tein kitematiltiaj.
Keman tamis se tonal ika xiontanemili ome oso eyi taman tein kuali tein mitsonpanok tein uelis tikontasojkamatis.
Xikonijkuilo sayoj tein uelis tikonchiuas itech se tonal. Komo tikonpia se ueyi tekit xikonxexelo uan yolik xikonchiujtiuj, ijkon satepan tikonitas tein uelik tikonchiuak.

XIONTAJTANI MAJ MITSONPALEUIKAN

Biblia kijtoua: “Akin moxeloua […] kiixtopeua tamatilis tein kuali” (Proverbios 18:1). Amo akin ueli iselti kiixnamiki se kuejmol, moneki maj aksa kipaleui.

Xikontajtani mochankauan oso akin iniuan kuali tionmouika maj mitsonpaleuikan.
Xikonelnamiki ke tejuatsin no uelis tikonpaleuis yejuan. Komo tikonpaleuia oksekin kichiuas amo semi xiontanemili itech mokuejmoluan.
Komo amo tikonchiaok tein kuali uan amo tikonnekiok tionnemis, semi kuali yeskia xikonitati se tapajtijkej. Porin kemansa, nejon kinextia ke tikonpia se kokolis, kemej depresión. Miakej keman kinmakaj pajti, okachi kuali momachiliaj.a

a ¡Taijxitilis! amo kijtoua keniuj timopajtiskej.

Biblia techpaleuia maj tikchiakan tein kuali

Akin kijkuiloj se nekuikatil tein ixnesi itech Biblia kiluij Dios: “Motajtol se tauil tein nechmetstauilia uan se tanex itech ojti kampa ninejnemi” (Salmo 119:105). ¿Toni kijtosneki nejon?

Se lámpara uelis techpaleuis maj tikmatikan kani uelis titaksaskej keman youak. No ijkon Biblia kuali techyolmajxitia para tikmatiskej toni tikchiuaskej keman tikixpejpenaskej teisa tein ouij.

Tanex ueli techpaleuia maj titachiakan taixpan. No ijkon, Biblia technextilia tein kuali tein mochiuas amo uejkaua.

Biblia amo sayoj se amatajkuilol tein ika tajtoua keman Dios kinchijchiuak taltikpakneminij. Ta no kichiua maj tikchiakan tein kuali tein mochiuas amo uejkaua. Kinankilia nejin netajtanilmej:

¿Keniuj?

¿Keniuj peuak tajyouilis? Biblia kijtoua: “Tajtakol kalakik nikan taltikpak itechkopa se takat uan tajtakol kichiuak maj se miki, uan ijkon nochin momikilijtiajkej, porin nochin motajtakolmakakej” (Romanos 5:12, TNM).

¿Keyej?

¿Keyej tejuan amo ueli tikyektaliaj kuejmolmej? Biblia kijtoua: “Nion kinamiki takat akin nejnentok kiyekanas itaksalis” (Jeremías 10:23). Nochi tein tikitaj ijkon kinextia.

¿Toni?

¿Toni kichiuas Dios para kiyektalis kuejmolmej? Biblia kijtoua: “Kinuachilis nochi ininixayo, uan amo akin momikilisok, nion tayokoyas nion chokas nion tajyouis” (Apocalipsis 21:4, TNM).