TAMACHTILIS 37
Keniuj kijtoua Biblia maj tikitakan tekit uan tomin
¿Kemansa mitsontekipachouani tekit oso tomin? Xa ouij techkisas timoixpanoltiskej uan tikueyichiuaskej Jiova kemej kinamiki. Biblia techyolmajxitia tein uelis techpaleuis.
1. ¿Toni kijtoua Biblia ika tekit?
Dios kineki maj techyolpakti totekiuj, Biblia kijtoua ke “amo onkak okse taman tein okachi kipaleuia takat, ta maj [...] yolpaki ika chikauak tekit tein kichiua” (Eclesiastés 2:24). Jiova semi tekiti. Keman semi titekitij kemej yejuatsin tikchiuaj tein kiuelita uan no tiyolpakij.
Maski semi moneki maj titekitikan, amo moneki tikauaskej maj okachi tayekanto ke tikueyichiuaskej Jiova (Juan 6:27). Komo tiktayekanaltiaj tiktekitiliskej, yejuatsin kijtoua ke techmakas tein monekis para tinemiskej.
2. ¿Keniuj moneki tikitaskej tomin?
Maski Biblia kijtoua ke “tomin tapaleuia”, no technejmachtia ke amo tiyolpakiskej sayoj ika tomin (Eclesiastés 7:12). Yejua ika, Biblia techiluia maj amo tiktasojtakan tomin uan techyolmajxitia: “Ximoyolpaktijtinemikan sayo ika ten nankipiaj ya” (xikonita Hebreos 13:5). Keman tiyolpakij ika tein tikpiaj, amo timoyolkokoskej porin amo tiknemilijtoskej ke amo ueli tikpiaj okachi. Uan amo timotauikaltiaj komo amo moneki (Proverbios 22:7). Amo timauiltiaj ika tomin nion tiktemouaj ijsiujka timotomintiskej.
3. ¿Keniuj uelis tikuiskej totomin para tikinpaleuiskej oksekin?
Jiova se Dios akin kiuelita kitemakas, uan tikchiuaj kemej yejuatsin keman tiktemakaj tein tikpiaj (1 Timoteo 6:18). Se taman kemej uelis tikuiskej tomin uan amo tikchiaskej teisa, yejua keman tiktemakaj para moixtauas tein monekis itech nechikol, tikinpaleuiaj akin kinpoloua uan okachiok tokniuan. Jiova okachi kipatiuita keyej tiktemakaj teisa uan amo kanachi. Komo tiktemakaj tein tikpiaj ika nochi toyolo, tiyolpakiskej uan tikyolpaktiskej Jiova (xikonita Hechos 20:35).
MAJ OKACHI TIMOMACHTIKAN
Maj tikitakan keniuj tapaleuia tikitaskej tekit kemej moneki uan komo tiyolpakij ika tein tikpiaj.
4. Keman kuali tiontekiti tikonueyitalia Jiova
Komo kuali timouikaj iuan Jiova tikitaskej tekit kemej moneki. Xikitakan VIDEO uan ika xitajtokan nejin:
¿Toni okachi mitsonyolnotsa kemej Jason kiitaya itekiuj uan tein kichiuaya?
¿Toni kichiuak para kiitas itekiuj kemej moneki?
Xikitakan Colosenses 3:23, 24 uan ika xitajtokan nejin:
¿Keyej moneki kuali tikitaskej tekit?
Moneki se tekitis, sayoj ke amo moneki okachi tiktayekanaltiskej ke tikueyichiuaskej Jiova.
5. Keniuj techpaleuia maj tiyolpakikan ika tein tikpiaj
Miakej kisentiliaj miak tomin, sayoj ke Biblia techiluia maj tikchiuakan okse taman. Xikitakan 1 Timoteo 6:6-8 uan ika xitajtokan nejin:
¿Toni techyolmajxitia Biblia?
Uelis tiyolpakiskej maski amo tikpiaskej miak taman. Xikitakan VIDEO uan ika xitajtokan nejin:
¿Keyej yolpakij nejin kalyetouanij maski amo kipiaj miak tomin?
¿Uan komo tikpiajya miak uan tiknekij okachi? Jesús ika tajtoj se taman para kinextis ke tamouilil nejon. Xikitakan Lucas 12:15-21 uan ika xitajtokan nejin:
¿Toni mitsonmachtia tein ika tajtoj Jesús? (Xikitakan versículo 15).
Xikitakan Proverbios 10:22 uan iuan xikitakan 1 Timoteo 6:10, uan ika xitajtokan nejin:
¿Toni tikonita ke okachi moneki: kuali se mouikas iuan Jiova oso se kipias miak tomin? ¿Keyej?
¿Toni uelis panos komo tiknekij tikpiaskej miak tomin?
6. Jiova techmakas tein techpoloua
Keman amo tikajsij tekit oso amo tikpiaj miak tomin, techpaleuis maj tikmatikan ox titakuaujtamatij iuan Jiova. Xikitakan VIDEO para tikmatiskej toni uelis tikchiuaskej keman tikpanotoskej nejin kuejmolmej, uan ika xitajtokan nejin:
¿Toni kuejmolmej kipanok tokniuj?
¿Toni monekik kichiuas para amo mosenkauas?
Xikitakan Mateo 6:25-34 uan ika xitajtokan nejin:
¿Toni kiniluia Jiova akin kitayekanaltiaj yejuatsin itech ininnemilis?
TEIN SEKIN KIJTOUAJ: “Moneki semi nitekitis para nikinixpanoltis nochankauan. Amo ueli niouj nechikolmej nochi semanas”.
¿Katiyejua texto mitsonpaleuia xikonneltoka ke se kitayekanaltis se kiueyichiuas Jiova yejua tein okachi kuali?
TEIN TIKITAKEJ
Tomin uan tekit tapaleuiaj, sayoj ke amo moneki techtsakuiliskej maj tiktekitilikan Jiova.
Maj tikelnamikikan
¿Toni mitsonpaleuis xikonita tekit kemej moneki?
¿Keyej mitsonpaleuis komo tionyolpaki ika tein tikonpia?
Kemej Jiova kijtoua ke kinmakas tein kinpoloua itekitikauan, ¿keniuj uelis tejuatsin tikonnextis ke iuan tiontakuaujtamati?
NO XIKONITA NEJIN
Xikonita ox Biblia kijtoua ke tomin teijtakoua.
“¿Tiene el dinero la culpa de todos los males?” (Artículo de jw.org)
Xikonita keyej kineki Dios maj tiktemakakan teisa.
¿Tajtakol maj se mauilti ika tomin?
“El punto de vista bíblico: Los juegos de azar” (¡Despertad!, marzo de 2015)
Xikonita toni kipaleuij maj mopata se takat akin kiuelitaya kiauiltis tomin uan tachtekia.
“Me apasionaban las carreras de caballos” (La Atalaya, 1 de noviembre de 2011)