Se amaix tein tapaleuia
“Motajtol se tauil tein nechmetstauilia, uan kemej se tanex itech ojti kampa ninejnemi.” (SALMO 119:105)
¿KEYEJ TEL TAMAN? Seki amaixmej tein kiitaj ke tel kuali, amo nochipa tapaleuiaj itech tonemilis axkan. Hasta amaixmej tein teiluiaj keniuj se kichiuas teisa, moneki kiyekitaskej uan kiyektaliskej. Sayoj ke amo ijkon panoua ika Biblia, ta kijtoua ke “nochi tanextililis ten tikajsij tech in Tajkuilolamatsin [...] techijkuilouilijke para tejuan ika timomachtiske” (Romanos 15:4).
NESKAYOMEJ: Maski Biblia amo ika tajtoua tapajtilis, kemaj kitemaka tayolmajxitilis tein tapaleuia maj kuali se yeto uan maj kuali se momachili. Kemej neskayot, kimelaua ke “akin yolseujtok kimaka nemilis inakayo” (Proverbios 14:30). Uan no tanejmachtia ke “akin moxeloua kitemoua sayoj itanejnekilis; kiixtopeua tamatilis tein kuali” (Proverbios 18:1). Uan no, kijtoua ke “kachi yolpaktok in tagat ten tapaleuijtinemi ika ten niaxka uan ke ne tagat [tein] sayo kiselia tapaleuilis” (Hechos 20:35).
¿TONI KIAJSINIJ MOMACHTIANIJ? Taltikpaknenkej akin yolnejmach, akin kuali mouika iniuan oksekin uan tapaleuia, okachi kuali yetok. Amaix JAMA tein iaxka Asociación Médica Americana kijtoua ke “takamej tein niman kualanij okachi uelis kipiaskej se kokolis itech inintsontekon, ke akin amo niman kualanij”. Itech altepet Australia sekin momachtianij kiitakej, itech majtakti xiuit, ininnemilis taltikpakneminij, uan kiajsikej ke taltikpakneminij tein xiuejkejya “akin mosentiliaj iniuan inintasojikniuan uan kipiaj akin inintech takuaujtamatij” nemij okachi tonalmej. Uan itech xiuit 2008, sekin momachtianij kayomej Canadá uan Estados Unidos kiajsikej ke “okachi yolpaki akin kinpaleuia oksekin ika itomin ke akin sayoj yejua ika mopaleuia”.
¿KENIUJ TIKONITA? ¿Tikonixmati okse amaix tein moijkuiloj kemej 2,000 xiujmej achtopa tein uelis techpaleuis maj kuali tiyetokan? ¿Oso sayoj Biblia?
[Tanemilil itech página 8]
“Semi nikuelita tein kijtoua Biblia [...] porin teyolmajxitia keniuj amo se kokolispeuas.”—(DOCTOR HOWARD KELLY, AKIN KIPEUALTIJ TAMACHTILIS MEDICINA DE LA UNIVERSIDAD JOHNS HOPKINS)