“Namejuan nannotaixpantijkauan”

1, 2. 1) ¿Toni se taixpantikej? 2) ¿Keniuj kampa kitematiltiaj teisa itech nejin taltikpak amo kichiuaj kemej moneki? 3) ¿Keyej Jiova amo kijtakoua komo akin kitematiltiaj teisa amo kijtouaj tein melauak?

¿TONI se taixpantikej? Se diccionario kijtoua ke kijtosneki “aksa akin kiita teisa tein mochiua uan kitematiltia tein panok”. Kemej neskayot, itech altepet Pietermaritzburg ompa Sudáfrica, se periódico tein motokaytia The Witness (Taixpantikej) kiuika panoua ciento sesenta xiujmej mokixtijtok. Kinamiki maj ijkon motokayti, porin se periódico moneki ajsitok kitematiltis tein panoua itech taltikpak. Tajkuilojkej akin kipeualtij nejon amaix kijtoj ke ompa nochipa kijtoskiaj “tein melauak, nochi tein melauak uan sayoj tein melauak”.

² Tetayokoltij tikijtoskej ke kampa kitematiltiaj teisa itech nejin taltikpak, miakpa amo kimatij oso amo kitematiltiaj uejueyi taman tein mochiua itech taltikpak oso hasta kikejkepaj. Tein melauj, ijkon kichiuanij ika tein Dios, akin kipia nochi chikaualis, kijtoj ne uejkauj itechkopa itanauatijkauj Ezequiel: “Altepemej monekis kimatiskej ke nejua niJiova” (Ezeq. 39:7). Sayoj ke, akin okachi Ueyi Taixyekankej itech iluikak uan taltikpak, amo kijtakoua komo akin kitematiltiaj teisa amo kichiuaj kemej moneki. Yejuatsin kinpia kemej chikueyi millones itaixpantijkauan akin noyampa kintapouiaj taltikpakneminij akoni yejuatsin, toni kichiuak uan kichiujtok tein ika kinpaleuia taltikpakneminij. Nejin tel miakej itaixpantijkauan Jiova no kitematiltiaj tein Dios motenkaua kichiuas uan ijkon techtatiochiuis. Keman tiktayekanaltiaj nejin tekit, tiknextiaj ke yekmelauj tiitaixpantijkauan Jiova. Isaías 43:10 kijtoua: “Namejuan nannotaixpantijkauan —kijtoua Jiova—, notekitikauj akin nejua nikixpejpenak”.

3, 4. 1) ¿Kemanian Momachtianij ika Biblia peuak motokaytiaj itaixpantijkauan Jiova uan keniuj momachilijkej? (Xikonita taixkopin ipeujyan tamachtilis.) 2) ¿Toni netajtanilmej tikitatij axkan?

³ Se ueyi tatiochiualis maj timoteixmatiltikan kemej itaixpantijkauan Jiova porin yejuatsin “Totayekankau [...] [akin] nachipa yoltinemis”, Akin kijtoua: “Yejua nejin yeski notokay nochipaya, uan ika nejin nechelnamikiskej axkan uan nochipaya” (1 Tim. 1:17; Éx. 3:15; no xikonita Eclesiastés 2:16). Momachtianij ika Biblia kiselijkej tokayit itaixpantijkauan Jiova itech xiuit 1931, uan nejon xiuit uan satepan ixnesinij itech nejin amaix miak cartas kampa kitasojkamatij nejon. Se nechikol ompa Canadá kijkuiloj: “Tikmatiskej ke axkan tiitaixpantijkauan Jiova semi techyolpaktia. Senkis tikixtaliaj timonejnemiltiskej kemej tikueyitaliskej itokay”.

⁴ ¿Keniuj uelis tiknextiskej ke tiktasojkamatij tatiochiualis maj timoteixmatiltikan kemej tiitaixpantijkauan Jiova? Uan no, ¿uelis tikmelauaskej toni ika motajtojtoya itech texto kampa mokixtij tokayit itaixpantijkauan Jiova? Maj timomachtikan nejin netajtanilmej.

ITAIXPANTIJKAUAN DIOS NE UEJKAUJ

5, 6. 1) ¿Keniuj katkaj itaixpantijkauan Jiova tetatmej israelitas? 2) ¿Toni no kinnauatijkej maj kichiuanij tetatmej israelitas? 3) ¿Keyej axkan tokniuan tetatmej moneki maj no ijkon kichiuakan?

⁵ Israelitas akin nemiaj itech itonaluan Isaías katkaj ‘itaixpantijkauan’ Jiova, uan senolochmej kemej se xolal katkaj ‘itekitikauj’ Dios (Is. 43:10). Se taman kemej tetatmej israelitas ika tajtouayaj Dios yejua keman kinmachtiayaj ininkoneuan keniuj Dios kinpaleuij ininuejkaujtatuan. Kemej neskayot, keman kinnauatijkej maj kichiuanij Pascua xijxiujtika, se taman tanauatil tein kinmakakej yejua nejin: “Keman nanmokoneuan namechtajtaniskej: ‘¿Toni kijtosneki nejin talnamikilis?’, moneki nankiniluiskej: ‘Nejin tapial tikmiktiaj itech pascua kemej se netetayokolil iixpan Jiova, akin kinixpanauij ininkaluan israelitas ompa Egipto keman kintitanilij chauismej egipcios, sayoj ke amo teyi kinchiuilij tokaluan’” (Éx. 12:26, 27). Nejon tetatmej xa no kinmelauiliayaj ininkoneuan ke ijkuak Moisés yekinika kitajtanito faraón maj kinkauani israelitas maj kiueyichiuatij Jiova ompa taluakyan, yejua kinankilij: “¿Akoni Jiova uan yejua ika moneki niktakamatis itajtol uan niktitanis Israel?” (Éx. 5:2). Uan no ueliaj kintapouiayaj ke senkis monankilij inetajtanil faraón satepan ke majtakti chauismej taijtakoj ompa Egipto uan israelitas makiskej itech ueyiat Chichiltik keman tateuianij egipcios kintojtokayaj. Jiova kipiaya nochi chikaualis uan kisentoka kipia. Ika nejon tein mochiuak, xolal Israel iixpantik oso kiitak ke Jiova yejuatsin Dios akin melauak uan akin kichiua nochi tein motenkaua.

⁶ Tikyekmatij ke israelitas akin kitasojkamatiaj maj mochiuanij itaixpantijkauan Jiova, kintapouijkej nejon uejueyi taman, amo sayoj ininkoneuan ta no akin okseko kayomej katkaj akin mochiujkej inintakeualuan. No motelnekia kinmachtiskej ininkoneuan itanauatiluan Jiova ika chipaujkanemilis. Jiova kijtoj: “Moneki ximochiuakan xiyektikej, porin nejua Jiova nanmoDios niyektik” (Lev. 19:2; Deut. 6:6, 7). Nejon se kuali neskayot tein kinkauilijkej tokniuan tetatmej axkan, porin no moneki kinmachtiskej ininkoneuan itanauatiluan Jiova ika chipaujkanemilis uan ijkon yejuan uelis tapaleuiskej maj moueyitali itokay Dios tein semi ueyi (xikonixtajtolti Proverbios 1:8 uan Efesios 6:4).

7. 1) Keman Israel amo kikauaya Jiova, ¿keniuj momachiliayaj altepemej tein kiyoualouayaj? 2) ¿Toni moneki tikchiuaskej tinochin akin tikteixmatiltiaj itokay Dios?

⁷ Kemej tikitaj, ijkuak amo kikauayaj Dios, israelitas tel kuali kiteixmatiltiayaj itokay. Yejuan kiniluijkaj: “Nochi xolalmej itech taltikpak monekis kiitaskej ke motech moijtouani itokay Jiova uan yekmelauj mitsmouiliskej” (Deut. 28:10). Sayoj ke, tetayokoltij tikijtoskej ke itech xiujmej keman moajsik xolal Israel, okachi amo tatakamatkej. Miakpa kinueyichiujkej inintiotsitsin cananeos. Kemej nejon tiotsitsin, yejuan mochiujkej tel amo yolkualmej, uan hasta ininkoneuan kinchichinouayaj ininixpan nejon tiotsitsin uan ininka mauiltiayaj akin kipanouayaj tatasojtilis. Nejin tel kuali techmachtia maj nochipa timochikauakan tichipaujkanemiskej kemej Jiova akin okachi Yektik, porin tikteixmatiltiaj itokay.

“¡XIKITAKAN! NIKCHIUATI TEISA TEIN YANKUIK”

8. 1) ¿Toni tekit Jiova kinauatij Isaías maj kichiuani? 2) ¿Keniuj tanankilij tanauatijkej?

⁸ Jiova achtook kijtojka ke xolal Israel kiitaskia uan semi kimoujkaitaskia keniuj yejuatsin kinmakixtiskia kampa kinuikaskiaj (Is. 43:19). Yekinika chikuasen capítulos tein kipia amaix Isaías, kipia miak tanejmachtilis ika tein kinpanoskia akin nemiaj Jerusalén uan itech xolalmej tein kiyoualouayaj. Jiova, akin kuali kiita tein tikpiaj itech toyolo, kinauatij Isaías maj kisentokani kiteixmatiltiani nejon tanejmachtilis maski xolal amo kikakiskia. Tanauatijkej semi kimoujkakakik nejon uan kinekik kimatis hasta kemanian ixolal Dios kisentokaskia amo tatakamatiskia. Yejua nejin tein Dios kinankilij: “Hasta keman altepemej xitiniskej uan amo akin nemisok, uan itech kalmej amo moajsis taltikpaknenkej, uan keman ompa tauejueliujtos hasta nochi mokauas taxitinil” (xikonixtajtolti Isaías 6:8-11).

9. 1) ¿Kemanian mochiuak tein Isaías achtook kijtojka ke kipanoskia Jerusalén? 2) ¿Toni tein motanejmachtijtok moneki tikakiskej?

⁹ Isaías kiselij nejon tekit itech xiuit tein ika tamik itekiuajyo Uzías, kemej itech xiuit 778 achto itech totonaluan. Tekitik kemej tanauatijkej kemej 46 xiujmej, hasta keman panok xiuit 732, miak xiujmej satepan ke Ezequías kiselij tekiuajyot. Satepan Jiova kisentokak kinnejmachtij hasta itech xiuit 607 keman ixpoliuik Jerusalén. Kemej tikitaj, xolal Israel tel miak xiujmej kinejmachtijkej toni yaya kipanoti. Axkan, Jiova no kinejmachtiani ixolal tel miak xiujmej achto toni mochiuas satepan. Nejin amaix Tanejmachtijkej tein mokixtianiya 135 xiujmej, nochipa kinmatiltiani akin kiixtajtoltiaj ke amo uejkaua tamis itaixyekanalis Satanás tein tel amo kuali uan mokauas iTekiuajyo Jesucristo tein uejkauas Mil Xiuit (Apoc. 20:1-3, 6).

10, 11. Israelitas akin kinuikakaj Babilonia, ¿toni tein Isaías achtook kijtojka kiitakej ke mochiuak?

¹⁰ Miakej judíos akin kitakamatkej Jiova uan motemakakej ininmako babilonios, makiskej keman ixpoliuik Jerusalén uan kinuikakej Babilonia (Jer. 27:11, 12). Keman ompa yetoyaj, kemej 70 xiujmej satepan, ixolal Dios iixpantik oso kiitak keniuj mochiuak se taman tein achtook moijtojka: “Yejua nejin tein kijtoua Jiova, Akin namechojpakakoua, akin Yektik itech Israel: “Yekmelauj namoka nitatitanis ompa Babilonia uan nikchiuas maj uetsikan tepostatsakuilmej’” (Is. 43:14).

¹¹ Ijkon kemej achtook moijtojka, se youak ipeujyan metsti octubre xiuit 539 achto itech totonaluan, mochiuak se taman tein kitelpatak tein panotoya itech taltikpak. Keman tekiuaj akin moajsia Babilonia uan itapaleuijkauan tayitoyaj vino ika vasos tein kikixtijkej itech itemplo Jiova tein moajsia Jerusalén uan kinueyichiujtoyaj inintiotsitsin, tateuianij akin pouiaj Media uan Persia moaxkatilijtoyaj altepet. Itech xiuit 538 oso 537, Ciro akin moaxkatilij Babilonia, tanauatij maj judíos mokepanij Jerusalén uan maj kiyekchijchiuanij itemplo Dios. Nochi nejon achtook kijtojka Isaías, uan no kijtojka ke Jiova motenkauaya ke kiyekpiaskia uan kiitaskia maj kuali moajsini ixolal akin moyolpatak keman mokepaskia Jerusalén. Dios kinotsak “xolal akin nikchiuak maj moajsi uan ijkon yejua kiteixmatiltis noueyitilis” (Is. 43:21; 44:26-28). Keman nejon israelitas akin kinuikakaj Babilonia mokepkej Jerusalén uan kiyekchijchiujkej templo, kiitakej ke Jiova, Dios akin sayoj yejuatsin melauak, nochipa kichiua tein motenkaua.

12, 13. 1) ¿Akonimej mosentilijkej iniuan israelitas keman yejuan oksepa peuak kiueyichiuaj Jiova? 2) ¿Toni moneki kichiuaskej ‘okseki ichkamej’ keman kipaleuiaj “Israel tein iaxka Dios”? 3) ¿Toni nechialis kipiaj ‘okseki ichkamej’?

¹² Tel miakej akin amo katkaj israelitas mosentilijkej iuan nejon xolal tein oksepa kiueyichiuaya Dios, uan satepan oksekin akin amo katkaj judíos kiselijkej inintaneltokalis judíos (Esd. 2:58, 64, 65; Est. 8:17). Itech totonaluan, “uel miak tagayot” akin moixmatij kemej ‘okseki iichkauan’ Jesús, senkis kinpaleuiaj tokniuan taixpejpenalmej akin moixmatij kemej “Israel tein iaxka Dios” (Apoc. 7:9, 10; Juan 10:16; Gál. 6:16, TNM). “Uel miak tagayot” no kipiaj tatiochiualis maj moteixmatiltikan kemej itaixpantijkauan Jiova, tokayit tein yejuatsin kimakani ixolal.

¹³ Keman Cristo Tekiuajtitos Mil Xiuit, “uel miak tagayot” kintelyolpaktis keman kinmelauiliskej akin moajokuiskej toni kipanokej kemej itaixpantijkauan Jiova itech tonalmej achto ke ualaskia ixpoliuilis. Tein melauj, sayoj uelis kichiuaskej komo monejnemiltiaj kemej kiueyitaliskej nejon tokayit uan mochikauaj chipaujkanemiskej. Uan no, maski motelchikauaskej amo tajtakoskej, mojmostaj moneki maj kitajtanikan Dios maj kintapojpolui ininnepololuan. Komo ijkon kichiuaj, kinextiskej ke kiajsikamatij ke tajtakouanij uan ke nion kinajsi tajtolmej tein ika kimelauaskej ueyi tatiochiualis tein kipiaj maj kiteixmatiltikan itokay Dios tein yektik (xikonixtajtolti 1 Juan 1:8, 9).

TEIN KIJTOSNEKI ITOKAY DIOS

14. ¿Toni kijtosneki tokayit Jiova?

¹⁴ Okachi tiktasojkamatiskej tatiochiualis tein tikpiaj maj timoteixmatiltikan kemej itaixpantijkauan Jiova, komo tiknemiliaj tein kijtosneki itokay. Itokay Dios tein motajtolkepa kemej “Jiova” ualeua itech se tajtol hebreo tein ika moijtoua teisa tein se kichiua uan motajtolkepa kemej “mochiua”. Yejua ika, moajsikamatini ke tokayit Jiova kijtosneki “Yejuatsin Kichiua maj Mochiua”. Nejin tanemilil kitelnamiki Jiova, porin yejuatsin kichijchiuak tein onkak iluikak uan taltikpak, iluikakneminij uan taltikpakneminij, uan no porin nochipa kichiua tein kiixtalia. Uan no, keman Jiova kijtoua ke teisa kichiuas, yejuatsin kichiua maj mochiua tein kinejneki uan tein kiixtalia uan amo akin, nion Satanás, uelis kitsakuilis.

15. ¿Keniuj kinextij Jiova se taman kemej tamati ijkuak kimelauak tein kijtosneki itokay? (Xikonita recuadro “Semi ueyi tein kijtosneki itokay”.)

¹⁵ Keman Jiova kinauatij Moisés maj kikixtiani ixolal ompa Egipto, kimatiltij se taman kemej tamati yejuatsin keman kimelauilij itokay. Kikuik se tajtol tein mouika ika tajtol “mochiua”, uan axkan yejuatsin ika tajtoj. Kemej kijtoua tajkuilol, “Dios kiluij Moisés: ‘Nejua nimochiuas tein nimochiuas’ [oso, “Nejua Nimochiuas tein nejua niknekis”]. Uan kiajxitij: ‘Yejua nejin tikiniluis ikoneuan Israel: “Nejua nimochiuas nechualtitanik kampa nanmoajsij”’” (Éx. 3:14; nota). Kemej tikitaj, maski tein yeski panotos, Jiova uelis mochiuas tein monekis uan ijkon kichiuas tein kiixtalia. Keman israelitas katkaj takeualmej, Jiova mochiuak kemej akin kinmakixtij, kinyekpiak, kinyekanak uan kinmakak nochi tein ika moixpanoltiskiaj uan tein ika kichikauaskiaj inintakuaujtamatilis.

MAJ TIKNEXTIKAN KE TIMOTASOJKAMATIJ

16, 17. 1) ¿Keniuj uelis tiknextiskej ke tiktasojkamatij maj timoteixmatiltikan kemej itaixpantijkauan Jiova? 2) ¿Toni tikitaskej itech okse tamachtilis?

¹⁶ Axkan, Jiova kisentoka kichiua ijkon kemej kijtosneki itokay, ta techmaka tein ika timoixpanoltiskej uan tein ika tikchikauaskej totakuaujtamatilis. Sayoj ke, itokay amo sayoj kijtosneki tein yejuatsin kiixpejpena mochiuas, ta no kijtosneki ke kichiua maj itachijchiualis mochiua tein monekis uan ijkon mochiuas itanejnekilis. Kemej neskayot, kinkui itaixpantijkauan maj kichiuakan itekiyo. Komo itech titanemiliaj nejin taman, techolinis maj tiksentokakan timonejnemiltikan kemej tikueyitaliskej itokay. Kåre, se tokniuj takat akin kipia 84 xiujmej akin setenta xiujmejya kisentokani kitekitiliani Jiova ompa Noruega, kijtoua: “Nikita ke se ueyi tatiochiualis maj niktekitili Jiova, Tekiuaj akin amo kipia tamilis, uan maj nipoui iuan ixolal akin kiuika itokay tein yektik. Nochipa nikita ke se ueyi tatiochiualis maj nikinmelauili taltikpakneminij tein yekmelauj tamachtia Biblia uan nikitas itech ininixko keniuj tel yolpakij ijkuak kiajsikamatij. Kemej neskayot, semi kuali nimomachilia keman nikinmachtia ueyi nepaleuil tein kiualkui inemilis Cristo tein kitemakak, uan keniuj ika nejon uelis kipiaskej nemilis nochipaya itech yankuik taltikpak kampa onkas melaujkayot uan yolseuilis”.

¹⁷ Semi melauak ke kansaika okachi ouij se kiajsis aksa akin kineki kiixmatis Dios. Sayoj ke, ijkon kemej Kåre, ¿melauj ke titelyolpakij keman aksa techkaki uan ueli tikmachtiaj tein kijtosneki itokay Dios? Sayoj ke, ¿keniuj uelis timochiuaskej tiitaixpantijkauan Jiova uan no ijkon timochiuaskej tiitaixpantijkauan Jesús? Tikitaskej itech okse tamachtilis.