TAMACHTILIS ITECH IPEUJYAN AMAIX | TEJUATSIN UELIS KUALI TIONMOUIKAS IUAN DIOS
¿Tikonijtoskia ke kuali tionmouika iuan Dios?
“Kuali se mouikas iuan Dios teualkuilia yeknemilis uan yolseuilis. Tikmachilia ke nochipa mitsita uan ke kineki xikpia tein kuali.” (CHRISTOPHER, TELPOCH KAYOT GHANA)
“Dios mitsita keman titayokoxtok, uan okachi mitspaleuia uan mitsnextilia netasojtalis ke tein tejua tiknemilia.” (HANNAH, SIUAPIL AKIN KIPIA 13 XIUJMEJ KAYOT ESTADOS UNIDOS)
“Nikmatis ke Dios nechita kemej akin kuali iuan mouika kichiua maj kuali nimomachili. Kuali iuan nimouikas yejua okachi ueyi tatiochiualis tein nikpia.” (GINA, SIUAT KAYOT JAMAICA AKIN KIPIA KEMEJ 45 XIUJMEJ)
Christopher, Hannah uan Gina amo sayoj yejuan ijkon tanemiliaj. Noyampa taltikpak miakej kiyekmatij ke Dios kuali mouika iniuan. ¿Uan tejuatsin? ¿Tikonmachilia ke Dios amo uejka moajsi? ¿Tikonuelitaskia kuali tionmouikas iuan oso okachi tikonchikauas kuali uikalis tein tikonpia iuan? Xa tionmotajtania: “¿Keniuj uelis Dios akin kipia nochi uelilis kuali mouikas iuan se aksa kemej nejua?”.
UELIS KUALI TIMOUIKASKEJ IUAN DIOS
Biblia techyekiluia ke uelis kuali timouikaskej iuan akin tachijchiuak. Kemej neskayot, itech Isaías 41:8 kijtoua ke Dios kinotsak Abrahán se tayekankej hebreo “notasojikniuj”. No xikonita nejin kualtsin tayoleualis tein ixnesi itech Santiago 4:8: “Ximotokikan iuan Dios uan Yejuatsin no motokis namouan”. Kemej tikitaj, kemaj uelis kuali timouikaskej iuan Jiova. Sayoj ke ¿keniuj uelis timotokiskej iuan ta amo ueli tikitaj?
Tikmatiskej komo tiknemiliaj keniuj peua aksa kuali mouika iuan okse. Keman ome taltikpakneminij yekinika moixmatij, moiluiaj inintokay. Komo kisentokaj monojnotsaj, peuaj moiluiaj tein kinemiliaj uan tein kimachiliaj, ijkon kemej panoskej tonalmej nejon kuali uikalis moskaltia, uan kisentoka mochikaua ijkon kemej mopaleuiaj se iuan okse. No ijkon panoua iuan Dios uan tejuan. Maj tikitakan keniuj mochiua nejon.