Tikselianij miak taman tein amo tikchiayaj uan timomachtianij miak taman porin tiktekitiliaj Jehová

Keman mochiujtoya Ojpatika Ueyi Neteuilis notatuan kiskej de altepet Estonia uan ajsikej Alemania, nejua ompa niyolik. Satepan kiixtalijkej maj tinemitij itech altepet Canadá. Keman tiajsikej, kampa yekinika tinemitoj amo uejka yetoya de xolal Ottawa. Tinemiaj itech se kali kampa kintsakuayaj piomej uan tepamit katka istak de tenex. Semi katka tipobres, sayoj ke nochipa tikpiayaj piotet para ika tialmasaloskej.

Se tonal, itaixpantijkauan Jehová kiixtajtoltilijkej nomaj tein kijtoua Apocalipsis 21:3, 4. Tein momachtij semi kiuelitak uan hasta peuak choka. Nopaj uan nomaj peuak momachtiaj uan tepitsin satepan moauijkej.

Maski notatuan amo semi tajtouayaj inglés, kiuelitayaj kitekitiliskej Jehová. Maski nopaj tekitia nochi youal kampa kiatiliaj tepos tein monotsa níquel ompa Sudbury (Ontario), miakpa itech sábados techuikaya nejua uan nokniuj Sylvia, akin xokoyot maj titanojnotsatij. Uan nochi semanas timosenmachtiayaj amaix Tanejmachtijkej kemej kalyetonij. Nomaj uan nopaj nechpaleuijkej maj semi niktasojta Dios, yejua ika nimotemaktij iuan Jehová uan nimoauij itech xiuit 1956 keman nikpiaya majtakti xiujmej. Keman nikelnamiki keniuj notatuan semi kitasojtayaj Jehová nechyolchikaua maj niksentoka niktekitili.

Keman nikisak secundaria amo semi niktekitiliayaok Jehová. Niknemiliaya ke komo nimochiuaya precursor, amo keman nikpiaskia tomin para nias itech se avión uan niixmatis kampa yeski ijkon kemej niknekia. Peuak nitekiti itech se estación de radio kampa niktaliaya tatsotson, uan semi nikuelitaya. Sayoj ke kemej nitekitia tiotak, amo niayaok nechikolmej, uan nochipa nietoya iniuan akin amo kitasojtayaj Dios. Satepan, notanemilil tein nikmachtijka ika Biblia nechpaleuij maj nimopata.

Ninemito ompa Oshawa (Ontario). Ompa nikixmatik Ray Norman, iikniuj Lesli uan okseki precursores. Nochin kualtsin nechselijkej. Keman nikitak ke semi yolpakiaj, nechpaleuij maj niknemili toni niknekia nikchiuas. Yejuan nechyolchikaujkej maj nimochiua precursor. Uan nipeuak septiembre xiuit 1966. Nejua niyolpakia uan nikuelitaya kemej ninemia. Sayoj ke yaya nikseliti seki taman tein amo nikchiaya tein kipataskia kemej ninemia.

KOMO JEHOVÁ MITSYOLEUA XIKCHIUA TEISA, XIKYEJYEKO

Keman niajtoyaok secundaria, nikpexontij amat para nias nitapaleuitiuj Betel ompa Toronto (Canadá). Uan satepan keman nimochiujkaya precursor, nechyoleujkej maj nitapaleuiti Betel naui xiuit. Sayoj ke semi nikueuelitaya Lesli uan niknemiliaya ke amo nikitaskiaok komo niaya Betel. Semi niktataujtij Jehová uan nikixtalij nias Betel, uan nikiluij Lesli ke niaskia maski semi nitayokoyak.

Ompa Betel nitekitik kampa tapakaj, uan satepan kemej secretario. Itech nejon xiujmej, Lesli mochiuak precursora especial ompa Gatineau (Quebec). Miakpa nimotajtaniaya toni kichiujtoya Lesli uan ox kuali tein nikixtalijka nikchiuas. Uan satepan semi nikmojkaitak maj Ray, iikniuj Lesli, no kiyoleuanij Betel, uan ompa Betel tisennemiaj. Nejon nechpaleuij maj oksepa niknojnotsa Lesli. Timonamiktijkej 27 de febrero xiuit 1971 uan nejon tonal nikisak de Betel satepan ke panokajya naui xiujmej.

Techtitankej maj titapaleuitij itech se nechikol kampa tajtouaj francés ompa Quebec. Uan tepitsin satepan, maski amo tikchiayaj techyoleujkej maj tikinkalpanokan nechikolmej itech circuito. Kemej nikpiaya 28 xiujmej niknemiliaya ke ayamo niueliskia nikchiuas nejon tekit. Sayoj ke semi nechyolchikauak tein kijtoua Jeremías 1:7, 8. Maski ijkon ipa nechtanemililtiaya ox ueliskia tikinkalpanoskej nechikolmej porin Lesli miakpa mocochejuijka uan amo uelia yekkochia. Sayoj ke yejua nechiluij: “Komo Jehová techyoleua maj tikchiuakan teisa, ¿keyej amo tikyejyekouaj?”. Yejua ika peuak titakalpanouaj, uan ijkon tikchiujkej 17 xiujmej.

Nochipa nikpiaya miak tekit itech circuito, uan amo nikpiaya miak tiempo para nietos iuan Lesli. Yejua ika monekik nimomachtis teisa. Se lunes kualkan kakistik timbre. Keman nitatapoj amo akin yetoya, sayoj se chikiuit tein kipiaya se tasal, takilomej, queso, pan, se botella de vino, seki copas uan se amatsin kampa ijkuiliujtoya: “Xikuika mosiuatsin maj moixpetaniti”. Nejon tonal kualtsin tonatoya. Sayoj ke monekia nimomachtis keniuj nikpanoltis seki tanojnotsmej, yejua ika nikiluij Lesli ke amo ueliskia nias. Yejua nechajsikamatik, maski tepitsin motayokoltij. Keman nimotalij para nimomachtis, peuak nimotekipachoua uan amo kuali nimomachilij. Uan nikelnamik tein kijtoua Efesios 5:25, 28. Xa Jehová nechelnamiktijtoya ke monekia nikajsikamatis keniuj momachiliaya nosiuatsin. Nimotataujtij uan nikiluij Lesli: “Tiouij”. Semi mouelitak. Itech tocoche tiajkej hasta atenoj kampa semi takualtsinkan katka, tiksoujkej tasal uan semi tiyolpakkej nejon tonal. ¡Uan hasta nihorajtik nimomachtis!

Miakkan titakalpanojkej, desde Columbia Británica hasta Terranova, uan semi tiyolpakkej. Miakkanya niixmatia ijkon kemej ipa niknekia. Uan niknemilijka nikselis Tamachtilis tein motemaka Galaad, sayoj ke amo niknekia niyeski misionero itech okse altepet. Niknemiliaya ke amo nochin ueliskiaj mochiuaskej misioneros, uan nejua nikmachiliaya ke amo niueliskia. Nimouia maj nechtitanikan itech altepet África kampa onkak miak kokolismej uan mochiua neteuilis. Semi nikuelitaya kampa nietoya.

TECHYOLEUAJ MAJ TITAPALEUITIJ ESTONIA UAN ALTEPEMEJ TEIN YETOKEJ UEYIATENOJ

Itech xiuit 1992 itech seki altepemej kampa taixyekanaya Unión Soviética, oksepa peuak kinkauaj maj tokniuan taueyichiuakan. Yejua ika techtajtanijkej ox tikuelitaskiaj tiyeskij timisioneros para titapaleuiskej Estonia. Kemej amo tikchiayaj maj techyoleuakan, semi tiktataujtijkej Jehová. Oksepa tiknemilijkej: “Komo Jehová techyoleua maj tikchiuakan teisa, ¿keyej amo tikyejyekouaj?”. Uan tikixtalijkej tiaskej, niknemilij: “Kualia ke amo tiouij África”.

Niman peuak timomachtiaj tajtol estonio. Seki metsti satepan ke tietoyaj itech nejon altepet, techyoleujkej maj titakalpanokan itech nechikolmej. Monekia tikinkalpanoskej 46 nechikolmej uan okseki tein ayamo katkaj nechikolmej itech eyi altepemej tein yetokej tatenoj den ueyiat, uan ompa Kaliningrado (Rusia). Yejua ika monekik timomachtiskej tajtol letón, lituano uan ruso. Semi ouij techkisak, sayoj ke tokniuan semi kitasojkamatiaj maj timochikauanij timomachtiskej uan semi techpaleuijkej. Itech xiuit 1999 mochijchiuak se sucursal ompa Estonia uan nechixtalijkej maj nipouini iniuan Toomas Edur, Lembit Reile uan Tommi Kauko akin taixyekanayaj itech kali Betel.

Tikinixmatkej miakej itaixpantijkauan Jehová akin kinkixtijkaj de ininaltepeuj uan kinuikakaj Siberia. Maski kampa kintsakkaj semi kintajyouiltijkaj uan amo iniuan yetoyaj ininchankauan, yejuan nochipa yolpakiaj uan kiuelitayaj tanojnotsaskej. Nejin techmachtij ke no ueliskia titaxikoskej uan tiyolpakiskej maski tikpiaskiaj ouijkayomej.

Kemej amo semi timoseuiayaj uan nochipa titekititoyaj, Lesli peuak tel sioui. Sayoj ke amo tikmatiaj ke nejin kipanotoya porin kipiaya se kokolis tein monotsa fibromialgia tein kichiuaya maj tel sioui. Yejua ika tiknemilijkej timokepaskej Canadá. Keman techyoleujkej maj tikselikan tamachtilis tein kinmakaj akin taixyekanaj itech kali Betel ompa Patterson (Nueva York), niknemilij ke amo ueliskia tikseliskej. Satepan ke semi timotataujtijkej, tikijtojkej ke tikseliskiaj. Uan Jehová techtatiochiuij. Keman tikselijtoyaj nejin tamachtilis, uelik kipajtijkej Lesli. Nejon techpaleuij maj ueli titekitikan kemej achto.

AMO TIKCHIAYAJ MAJ TECHTITANIKAN OKSEKO

Se youak itech xiuit 2008, keman timokepkajya Estonia, nechnotskej tokniuan akin tekitij itech ueyi kali kampa techixyekanaj uan nechtajtanijkej ox tikuelitaskiaj titapaleuitiuij República Democrática del Congo. Amo nikmatia toni nikchiuas, porin kinekiaj maj nitanankili mostika. Amo teyi nikiluij Lesli para maj kuali kochini. Sayoj ke nejua nochi youal niktapouij Jehová tein niknemiliaya ke ueliskia techpanos ompa África.

Mostika, keman niktapouij Lesli, tikijtojkej: “Jehová techyoleujtok maj tiakan África. ¿Keniuj tikmatij ke amo uelis tikchiuaskej oso amo tikuelitaskej komo amo tikyejyekouaj?”. Tinenkej 16 xiujmej ompa Estonia, uan satepan tiajkej Kinsasa, ompa República Democrática del Congo. Betel katka takualtsinkan uan taseujtoya. Keman tiajsikej Lesli kikixtij se tarjeta tein kipiaya desde ke tikiskej Canadá uan kitalij itech tocuarto. Tarjeta kijtouaya: “Xixochioua kampa mitstokaskej”. Keman katkaj timisioneros, tikinixmatiaj tokniuan uan titamachtiayaj ika Biblia, nejon techpaleuij maj tikitakan ke semi tiyolpakiaj. Satepan, peuak tikinkalpanouaj sucursales itech 13 altepemej ompa África. Nejin techpaleuij maj tikitakan keniuj xolalmej tatamamej uan kualtsitsin. Amo nimotekipachouayaok kemej achto, uan tiktasojkamatilijkej Jehová porin techtitanik África.

Ompa Congo-Kinsasa techtamakayaj ika seki taman okuiltsitsin tein tiknemiliayaj ke amo tikueliliskiaj. Sayoj ke keman tikitakej ke tokniuan semi kiueliliayaj, no tikyekojkej uan tikuelilijkej.

Uelik tikinyolchikaujkej tokniuan uan tikinuikilijkej tein kinpolouaya akin nemiaj itech xolalmej kampa ika ualkisa tonaltsin. Itech nejon xolalmej, akin amo yolkualmej kintajyouiltiayaj akin ompa nemiaj uan kinchiuiliayaj tein amo kuali siuamej uan konemej. Miakej tokniuan katkaj semi pobres. Sayoj ke tikmojkaitayaj porin takuaujtamatiaj ke oksepa nemiskiaj akin momikilijkejya, kitasojtayaj Jehová uan kitakamatiaj inechikol. Tein kichiuayaj techelnamiktiaya keyej tiktekitiliayaj Jehová uan nejon semi techyolchikauak. Seki tokniuan kinuejuelouilijkaj ininchan uan kinkuilijkaj tein kitokkaj. Nejin nechmachtij ke ijsiujka se kipoloua tein se kipia uan ke okachi kuali maj se mouika iuan Jehová. Maski tokniuan kipiayaj miak ouijkayomej, kisentokayaj yolpakiaj. Tein kichiuayaj techyolchikauak maj tikixnamikikan ouijkayomej uan kokolismej.

TECHTITANIJ ASIA

Oksepa techyoleujkej maj titapaleuitij okseko. Techiluijkej maj tinemitij Betel tein moajsi Hong Kong. Amo keman tiknemilijkej ke tinemiskiaj Lejano Oriente. Sayoj ke kemej Jehová techpaleuijka keman tiajkaj titapaleuitoj itech okseki altepemej, amo timotekipachojkej uan tiajkej. Itech xiuit 2013, semi tichokakej porin tikinkaujkej totasojikniuan uan nochi tein onkaya ompa África, tikiskej de ompa maski amo tikmatiaj keniuj tinemiskiaj.

Semi taman katka xolal Hong Kong, porin semi takakistia uan ompa nemiaj akin ualeujkaj okseki altepemej, no semi ouij katka se momachtis tajtol chino cantonés, sayoj ke tokniuan kuali techselijkej uan tikuelilijkej takual tein ompa kikuaj. Onkaya miak tekit ompa Betel, sayoj ke kemej tel tapatiouak, tokniuan Oloch Taojtokaltianij kiixtalijkej maj mopatani kampa yetoya Betel uan maj monamakani miak taman tein kipiayaj. Tepitsin satepan itech xiuit 2015, Lesli uan nejua tinemitoj Corea del Sur, uan ompa titapaleuiaj hasta axkan. Tajtol tein nikan mokui no semi ouij. Maski monekiok maj timomachtikan miak taman, techyolchikaua keman tokniuan techiluiaj ke okachi kuali titajtouajya coreano.

NOCHI TEIN TIMOMACHTIANIJ KEMAN TIKTEKITILIANIJ JEHOVÁ

Kemansa ouij tekisa peuas kuali se mouikas iniuan oksekin. Sayoj ke tikitanij ke komo tejuan peua tikinnojnotsaj uan kuali tikinseliaj, okachi niman tikinixmatij. Tokniuan amo semi tatamamej uan Jehová semi kualtsin kemej techchijchiuak porin ueli titetasojtaj ika nochi toyolo, ueli timouikaj iniuan oksekin uan tikintasojtaj nochin (2 Cor. 6:11).

Timomachtianij ke moneki se kinitas oksekin kemej Jehová kinita, uan moneki tikitaskej seki taman tein kinextia ke yejuatsin techtasojta uan techixyekana. Nochipa keman tiknekiaj timosenkauaskej uan timotajtaniayaj ox tokniuan techtasojtayaj, oksepa tikixtajtoltiayaj tarjetas oso cartas tein techijkuilouilijkaj totasojikniuan. Axkan tikitaj keniuj Jehová technankiliaya keman tiktataujtiayaj, techpaleuiaya uan techyolchikauaya.

Lesli uan nejua, tikitanij ke maski semi tikpiaskej miak tekit, moneki tikxeloskej tiempo para tisenyetoskej. No tikitanij ke moneki tiueuetskaskej komo teisa amo tiuelij, uan okachiok keman timomachtijtokej okse tajtol. Uan mostaj youak tiknemiliaj teisa tein tikuelitakej uan tiktasojkamatiliaj Jehová.

Tein melauj, amo keman niknemilij ke ueliskia niyeski nimisionero oso ninemis itech okseki altepemej. Sayoj ke nikitani ke komo Jehová nechpaleuia, nochi uelis nikchiuas, uan nejon semi nechyolpaktia. Nitanemilia kemej tanauatijkej Jeremías akin kijtoj: “Jehová, [...] no taman kemej nitanemiliaya” (Jer. 20:7). Jehová techmakani miak taman tein kuali uan techtatiochiuiani kemej amo tiknemiliayaj. Hasta kichiuani maj niouj itech avión kemej niknekia keman katka nikonet. Tianij kampa amo keman niknemilijka ke niaskia. Titakalpanouanij Betel itech nochi taltikpak. Uan semi niktasojkamatilia Lesli, porin semi nechpaleuiani kampa tianij.

Nochipa tikelnamikij akoni tiktekitiliaj uan keyej. Nochi tein tikseliaj axkan kinextia nochi tein tikseliskej keman tinemiskej nochipaya, keman Jehová ‘kitapos imay uan kimakas nochi tein kineki akin yoltok’ (Sal. 145:16).