Nochipa kuali ximouikakan

TATITANIL Pablo kiniluij tokniuan de Éfeso: “Ximoxikokan se iuan okse porin namotasojtaj. Dios namechsentilij ika ichikaualis. Yejua ika semi ximochikauakan kuali namouikaskej para amo nanxexeliujtoskej” (Efes. 4:2, 3).

Pablo kijtoj ke kuali timouikaj porin Dios ‘techsentilij ika ichikaualis’. Sayoj ke no kijtoj ke semi moneki timochikauaskej para amo tixexeliujtoskej. Uan tisejsemej moneki titapaleuiskej para maj tinochin ‘kuali timouikakan’.

Xikonnemili ke aksa mitsontayokolij se tasal tein tel patiyoj. ¿Akoni monekiskia kiitas maj amo teyi kipano? Ipa tejua, yejua ika, komo amo tikonyekpia nejon tasal uan tsayani, amo uelis tikontajtakoltis akin mitsontayokolij.

No ijkon, Dios techtayokolij teisa tein kualtsin: yejua kichiuak maj kuali timouikakan iniuan tokniuan. Sayoj ke tisejsemej moneki titapaleuiskej para maj nochipa ijkon tietokan. Yejua ika komo amo kuali timouikaj iuan se tokniuj, maj timotajtanikan: “¿Nimochikaujtok oksepa nimouikas iuan tokniuj para maj amo tixexeliujtokan itech nechikol?”.

“XIMOCHIKAUAKAN KUALI NAMOUIKASKEJ”

Tikitakejya ke tatitanil Pablo kijtoj ke kemansa semi moneki timochikauaskej para kuali timouikaskej. Uan nejin okachiok moneki tikchiuaskej keman se tokniuj techyolkokos. Tiknekij tinochin kuali timouikaskej. Sayoj ke, ¿nochipa monekiskia tikiluiskej tokniuj ke amo tikuelitakej tein kichiuak? Amo. Xionmotajtani nejin: “Komo iuan nitajtoua, ¿tapaleuis maj kuali timouikakan oso okachi timokualantiskej?”. Kemansa okachi kuali maj amo teyi se kijto uan maj se tetapojpolui (Prov. 19:11; Mar. 11:25).

Taixkopimej kampa nesi ke se tokniuj amo kualani keman kichiuiliaj tein amo kuali. 1. Mosenketsa keman se tokniuj kitsajtsilia. 2. Itech tanemilia tein kichiuak nejon tokniuj. 3. Kileroua Biblia uan itech tanemilia. — “Komo iuan nitajtoua, ¿tapaleuis maj kuali timouikakan oso okachi timokualantiskej?”.

Pablo tayolmajxitij nejin: “Ximoxikokan se iuan okse porin namotasojtaj” (Efes. 4:2). Se amaix kijtoua ke nejin xa kijtosneki ke “moneki se kintasojtas nochin maski mopolouaj” (Comentario para exégesis y traducción. Carta a los Efesios, Mariano Ávila Arteaga). No kijtosneki ke moneki tikajsikamatiskej ke tokniuan no tajtakolejkej kemej tejuan. Tinochin tiknekij ‘tinemiskej ijkon kemej Dios kineki’ (Efes. 4:23, 24). Sayoj ke nion akin ueli senkis ijkon kichiua (Rom. 3:23). Komo tikajsikamatij nejin, okachi amo ouij techkisas tikinxikoskej oksekin uan tikintapojpoluiskej, nejon techpaleuis maj nochipa ‘kuali timouikakan’.

Komo titetapojpoluiaj uan tikelkauaj tein oksekin techchiuiliaj, ‘kuali timouikaskej itech nechikol uan amo tixexeliujtoskej’. Tajtolmej ‘amo xixexeliujtokan’ tein moajsi itech Efesios 4:3 itech griego ika tajtojtok tein kichiua maj omimej sajsaliujtokan. No ijkon, komo kuali timouikaj iniuan tokniuan uan tikintasojtaj techpaleuis maj kemej yeskia tisajsaliujtokan oso maj amo tixexeliujtokan. Uan ijkon yeski hasta keman amo tikuelitaskej tein kichiuaj.

Yejua ika keman se tokniuj mitsonyolkokos, mitsonkualantis oso mitsonyolajxitis, xionmochikaua tikonajsikamatis uan amo sayoj xikonita tein amo kuali tein kichiua (Col. 3:12). Kemej tinochin titajtakolejkej, kemansa xa no tikyolkokouanij aksa. Komo tikelnamikij nejin, tikchiuaskej tein tapaleuis maj ‘kuali timouikakan uan maj amo tixexeliujtokan’.